Терроризмы ныхмæ тохы бон – 3 сентябры Беслӕны трагедийы амæттæгты мысыны охыл Цхинвалы горæты Сӕрибары фæзуаты Мады Майрӕмы аргъуаны раз уагъд æрцыд мысæн мадзал. Традицимæ гæсгæ уæларвмæ суагътой террористон акты амæттæгты нымæц – 334 тымбылæджы.
Мысæн мадзалы хайад райстой Хуссар Ирыстоны бæрнон кусджытæ, Парламенты депутаттæ, скъоладзаутæ æмæ ахуыргæнджытæ, студенттæ ӕмӕ æхсæнады минæвæрттæ.
Фæзуаты стендтыл æвæрд уыд, уыцы æбуалгъ трагедийы чи фӕмард, ӕмӕ терристон акты рӕстӕджы ист къамтӕ. Трагедийы амæттæгты нæмттæ мысынæн Сӕрибары фӕзуаты акцийы хайадисджытӕ Хъынцъымгӕнӕг зӕды цырты размӕ æнæсымæй, сæркъулæй хастой дидинджытæ, нуазыны дон, хъазæнтæ, скъолайон тетрæдтæ – нæ урæдтой сæ цæстысыг, афтӕмӕй.
Скъоладзаутӕ дзырдтой, 2004 азы Беслӕны скъолайы трагикон цауты тыххæй, трагедийы амӕттӕгты рухс нæмттæ мысынӕн кастысты ӕмдзӕвгӕтӕ. Ӕнусон кад уыдзӕн, Беслӕны терроризмы дӕрзӕг дзӕмбытӕ цы бинонтӕм баххӕссыдысты, йӕ амӕттӕгтӕ чи баисты, уыцы сывӕллӕттӕ, ахуыргӕнджытӕ, ныййарджытӕ ӕмӕ трагедийы амӕттӕгты ирвӕзынгӕнгӕйӕ чи фӕмард, уыдонӕн. Уыцы ӕнӕадӕймагадон террористон акт нызмӕлын кодта ӕгас дунейы, уый рох нӕ уыдзӕн, цалынмӕ зӕххыл адӕймагад уа, цалынмӕ цӕрӕм, уӕдмӕ.
Ацы уæззау трагедийы уӕззау хъӕдгӕмттӕ никуы байгас уыдзысты…
Ӕмырӕй алӕугӕйӕ, мадзалы хайадисджытӕ ссардтой, ӕнӕаххосӕй чи фӕмард, уыдоны рухс нӕмттӕ.
Уыцы бон ма Беслæны трагедийы амӕттӕгты мысынӕн нӕ республикӕйы аргъуанты уагъд ӕрцыдысты мысӕн службӕтӕ.
Рæстæг цæуы, азтæ азты ивынц, фæлæ ацы трагеди баззад уæззау мысинагæй махæн ӕмӕ нæ фидæны фæлтæртæн.
Нæ уацх.
