ТОХ – КАРЗ НИЗЫ НЫХМÆ

Ног короновирусон инфекцийы хуыз та радон хатт рапарахат куыд дунейы, афтæ нæ республикæйы дæр. Æвыдæй та дзы нæ баззадысты нæ республикæйы æмбæстæгтæ.  Уымæ гæсгæ та куыд  æппæт дунейы медицинон объекттæ, афтæ нæ республикæйы æппæт æнæниздзинад хъахъхъæныны уагдæттæн дæр сæ фылдæр раконд æрцыд ацы  ног вирусы ныхмæ тох кæнынмæ. Сæр та бахъуыд радон хатт нæ республикæйы æнæниздзинад хъахъхъæнынады фадыджы кусджыты сæ тыхст æмбæстæгты фарсмæ балæууын æмæ сæ бон куыд у, афтæ сын иузæрдион æххуыс бакæнын.

 

Дзауы район

Хъыгагæн, фæстаг дыууæ мæйы дæргъы куыд нæ горæты, афтæ районты медицинон кусджытæ дæр тох кæнынц ацы карз вирусы ныхмæ. Дзауы  рынчындоны  сæйраг  дохтыр Гасситы Константин нын куыд загъта, афтæмæй уыдонæн фадат нæй, цæмæй сæ районы рынчындоны баконд æрцæуа сырх зонæ, уымæн æмæ сæм нæй æмбæлон ифтонгæрзтæ. Уымæ гæсгæ, уыдон  уæззау рынчынты æрвитынц республикон бирæпрофилон медицинон центрмæ, цыран райсынц æмбæлон медицинон æххуыс. «Районы цæрджытæй рогдæр рынчын чи вæййы, уыдонæн хос фæкæнæм хæдзарон уавæрты, бафæдзæхсæм сæ, цæмæй  ма хизой адæмы ‘хсæнмæ æмæ бадой изоляцийы, цæмæй низ ма парахат кæна, уый тыххæй. Кæй зæгъын æй хъæуы, уыдон  сты медицинон кусджыты хъусдарды бын, исынц æмбæлон æххуыс», – банысан  кодта  Гасситы Константин. Уый  ма нын куыд загъта, афтæмæй сæ  рынчындоны медицинон кусджытæй бирæтæ сты рынчын ацы карз вирусæй, фæлæ уымæ нæ кæсгæйæ, уыдонæн сæ коллегæтæ дарддæр æххæст кæнынц сæ хæстæ.

Куыд иннæ медицинон уагдæтты, афтæ Дзауы районы медицинон уагдоны дæр баконд  æрцыдис сæрмагонд кабинет. Уым   медицинон кусæг  йæхимæ райсы рынчынты,   ист сын æрцæуы  тесттæ, цæмæй рабæрæг уа, ацы вирусæй рынчын у æви сезонон гриппæй, уый.  Уыцы ран рынчынтæн  сбарынц сæ сатураци, сæ тæвд. Æппæт басгæрстыты фæстæ дохтыр саразы æмбæлон хатдзæг. Рынчындоны сæйраг дохтыр нын куыд загъта, афтæмæй уыдон бон саразынц 20 тесты бæрц.

«Ацы фæстаг  дыууæ мæйы дæргъы-иу уыдис афтæ, æмæ-иу бон сарæзтам 44 тесты дæр. Хъыгагæн, иннæ районтæм абаргæйæ  æмæ статистикæмæ гæсгæ, нæ районы рынчынты нымæц у бирæ фылдæр. Фæлæ мæнæ ацы дыууæ боны дæргъы рынчынты нымæц фæкъаддæр ис. Уæлдæр ма йæ куыд банысан кодтон, афтæмæй нæ рынчындоны кусджытæй бирæтæ сты рынчын,  уыдоны ‘хсæн ис нæ лабораторийы дохтыр дæр. Уымæ гæсгæ бынаты арæзт нæ цæуы антителатæ сбæлвырд кæныны тыххæй анализ, рынчынтæ æрвыст цæуынц  нæ республикæйы  бирæпрофилон медицинон центрмæ, цыран саразынц ацы анализ», – загъта сæйраг дохтыр.

Дохтыр ма куыд банысан кодта, афтæмæй сæ куысты кæд æмбæлынц проблемæтыл, уæддæр уыдонмæ нæкæсгæйæ, куыст иу ран нæ лæууы, сæ хæстæ æххæст кæнынц, рæстæг сæ куыд домы, афтæ.

Нæ республикæйы Æнæниздзинад хъахъхъæныны министрады уынаффæмæ гæсгæ, Дзауы районы цæрджытæй вакцинæ карз вирусы ныхмæ саразын кæй фæнды, уый йæ саразы нæ республикæйы бирæпрофилон медицинон центры. Уымæн æмæ Дзауы район у горæтмæ æввахс æмæ цæрджытæн зын нæу горæтмæ æрцæуын. Сæйраг дохтыры ныхæстæм гæсгæ, хъыгагæн абоны бонмæ Дзауы районы цæрджытæй вакцинæ сарæзтой  æрмæстдæр 29 адæймаджы. «Ныртæккæ нæ республикæйы карз вирусы ныхмæ вакцинæтæ фесты, фæлæ нæ республикæйы Æнæниздзинад хъахъхъæныны министрад хъавынц æрласынмæ вакцинæйы ног парти. Уымæ гæсгæ мах балхæдтам сæрмагонд уазалгæнæн, цæмæй вакцинæты уым нывæрæм, æмæ кæд раздæр не ‘мбæстæгтæ вакцинæ аразынмæ горæты сæйраг рынчындонмæ цыдысты, уæд,  вакцинæ куы райсæм, уæдæй та араздзыстæм ам, бынаты. Рагацау  фехъусын кæндзыстæм районы цæрджытæн, цæмæй æрцæуой æмæ саразой карз вирусы ныхмæ вакцинæ æмæ бахъахъхъæной се ‘нæниздзинад», – загъта районы сæйраг дохтыр.

 

Знауыры район

Знауыры район горæтæй кæд  дæрддзæф у, уæддæр рынчынтæ районон рынчындоны райсынц æмбæлон æххуыс.  Рынчындоны сæйраг дохтыр  Цъæритты Иннæ нын  куыд фехъусын кодта, афтæмæй ныртæккæ ацы  карз вирусæй  районы æмбæстæгтæй амбулаторон режимы хос  кæнынц 81 адæймаджы. Æхсæз адæймаджы та  стационарон æгъдауæй хос кæнынц нæ республикæйы инфекцион рынчындоны.

«Низæй рынчын сты хистæр кары адæймæгтæ, фæлæ уыдоны ‘хсæн ис сывæл-лæттæ дæр. Хæдзары уавæрты хос кæмæн цæуы, уыдон фæдзæхст æрцæуынц, цæмæй æхсæнадмæ ма хизой æмæ изоляцийы уой. Кæй зæгъын æй хъæуы, куыд иннæ рынчын-дæтты, афтæ мах дæр бынаты исæм карз вирус рабæрæг кæныны фæдыл тесттæ, уыдон арæзт цæуынц алы бон дæр, сабат æмæ хуыцаубон  бонтæй  дарддæр.

Кæд нæ районы цæрджытæй искæцы адæймаг йæхи æвзæр фæхаты, уæд уыдон, фыццаджыдæр, фæдзурынц тагъд æххуысмæ. Уый фæстæ рынчыны басгарынц æмæ  бæрæг æрцæуынц, ацы карз вирусæй рынчын у æви  сезонон гриппæй.

Кæй зæгъын æй хъæуы,  рынчынты   ‘хсæн рабæрæг вæййынц уазалдзыдтæ дæр. Уыдонæн дæр рæстæгыл хос æрцæуы», – банысан кодта районы сæйраг дохтыр.

ТАНДЕЛАТЫ Виленæ