Культурӕйы министрады хъӕппӕрисӕй 26-ӕм августы нӕ Республикӕйы сабитӕн организаци ӕрцыд цымыдисон æмæ хъӕлдзӕг бӕрӕгбон. Хетӕгкаты Къостайы уынджы Театралон фӕз-уатмæ æввахс, республикӕйы сывӕллӕтты сфӕлдыстадон коллективты хайадистæй ауагътой концерт. Концертон программӕмӕ хаст ӕрцыдысты ирон ӕмӕ уырыссаг популярон зарджытӕ. Сывæллæттæ сæххæст кодтой алыгъуызон кæфтытæ. Куыд зарджытæ афтæ кæфтытæ дæр ӕххӕст кодтой нӕ чысыл стъалытӕ. Организаци ма ӕрцыдис акци «Нывтæ асфалтыл», зæгъгæ. Мадзалы сӕйраг темӕ уыд Хуссар Ирыстон ӕмӕ Уӕрӕсейы хӕларадон ахастытӕ равдисын. Сывӕллӕтты ирхӕфстой аниматортӕ дӕр. Æнкъардæуыд бæрæгбонон хъæлдзæг зæрдæйы равг. Сывӕллӕттимӕ цин кодтой ныййарджытӕ ӕмӕ уазджытӕ дӕр, систой зӕрдылдарӕн къамтӕ. Сывӕллӕттӕн уӕлдай циндзинад ӕрхаста, ӕнӕаргъæй сæ сӕлдӕгæй кӕй суазæг кодтой, уый. Уый фӕстӕ сӕ адджын фынгмӕ фæхуыдтой горӕты рӕсугъддӕр кафетӕй сӕ иу – «Vincenzo»-мӕ.
Сабиты мадзалмæ æрбацыдысты РХИ-йы Президент Гаглойты Алан, РЦИ-Аланийы Сӕргълӕууӕг Сергей Меняйло, Кӕсӕг-Балхъары Республикӕйы Сӕргълӕууӕг Казбек Коков, Республикӕ Хуссар Ирыстоны Уӕрӕсейы ӕххӕстбарджын минӕвар Марат Кулахметов ӕмӕ республикӕйы ӕндӕр официалон архайджытæ.
КОКАЙТЫ Зӕринӕ
