Бæрæгбонон мадзæлтты фæлгæтты паддзахадон драмон театры уыд иумæйаг концерт Хуссар Ирыстоны Адæмон инструментты паддзахадон оркестр «Айзæлд», Цæцæны республикæйы адæмон зарды ансамбл «Нур Жовхар» æмæ РХИ-йы Президенты цур нæлгоймæгты хорæн. Концертон программæйы хайад райстой Уæрæсейы, Цæгат Ирыстон æмæ хуссарирыстойнаг зарæггæнджытæ дæр.
Сфæлдыстадон изæрмæ æрбацыдысты куыд нæ республикæйы цæрджытæ, афтæ уазджытæ дæр. Стыр æхсызгонæй концертмæ фæуазæг сты Турчы цæрæг ирæтты делегаци, Никарагуа æмæ Приднестровьейы бæстæты минæвæрттæ.
Зынаргъ сценæмæкæсджытæн хъæлдзæг æмæ аив зарджытæ сæххæст кодтой Бекъойты Вано, Амага Готти, Лалыты Альберт, Зульфия Ильясова, Сланты Ацæмæз, Сиукъаты Иринæ æмæ æндæртæ. Сфæлдыстадон коллективтæ дæр сæ репертуартæй сæххæст кодтой, адæймаг хъусынтыл кæмæ фæцис, ахæм æхцонхæссæг музыкалон композицитæ.
Цæцæйнаг ансамблы аивадон къухдариуæггæнæг Аймани Айдамирова йæ арфæйаг раныхасы рæстæджы сценæмæкæсджытæн ныфс бавæрдта, ирон зарæг кæй сахуыр кæндзæн æмæ йæ радон концерты Цхинвалы кæй сæх-хæст кæндзæнис, уымæй.
«Мæнæн тынг фæцыдис мæ зæрдæмæ ирон æвзаг. Ирыстоны зæххыл æм лæмбынæгдæр куы байхъуыстон, уæд æй бамбæрстон аив кæй у уæ мадæлон æвзаг, уый. Уымæ гæсгæ, æнæмæнгдæр, сахуыр кæндзынæн уæ адæмон зарджытæй иу æмæ уын æй азардзынæн», – банысан кодта Аймани. Адæм ацы ныхæстыл сæмбæлдысты стыр æхсызгонæй æмæ йын амдзæгъд кодтой.
Концерты кæрон раныхас кодта Культурæйы министр Зæгъойты Рада. Уый алкæмæн дæр арфæ ракодта бæрæгбоны сæраппонд æмæ цыбыртæй банысан кодта уымæн йæ нысаниуæг, ирон адæмæн цавæр хорздзинæдттæ æрхаста, уый.
«Абон ацы датæ махæн у нæ ивгъуыд ногæй æрæмысыны, æмæ нæ фидæныл ахъуыды кæныны ма-дзал. Хæсты фæстæ ацы азтæ уыдысты алыгъуызон цаутæй хъæздыг. Мах Стыр Уæрæсейы æххуысы руаджы арæзтам æмæ аразæм къахдзæфтæ нæ хорз фидæны сæ-раппонд. Ацы фæндæгтыл цæугæйæ, махæн фылдæрæй-фылдæр кодтой нæ ног хæлæрттæ. Абон Хуссар Ирыстон йæ бастдзинæдтæ фидар кæны Уæрæсейы Федерацийы бирæ регионтæ æмæ фæсарæйнаг паддзахæдтимæ. Нæ тыхст рæстæджы уыдон уыдысты нæ фарсмæ æмæ нын æххуыс кæнынц абон дæр», – банысан кодта министр.
Уый фæстæ Республикæ Хуссар Ирыстоны Президенты барамындмæ гæсгæ «Республикæ Хуссар Ирыстоны сгуыхт артист»-ы номæй хорзæхджын æрцыд Цæцæны Республикæйы адæмон зарды паддзахадон филармонийы аивадон къухдариуæггæнæг Аймани Айдамирова. Ансамблы коллективы та схорзæзджын кодтой арфæйы фыстæгæй. Арфæйы фыстæг ма Культурæйы министрадæй райста Дагъыстаны адæмон артисткæ Зульфия Ильясова.
Аймани Айдамирова йæ хорзæхы тыххæй бузныг загъта республикæйы къухдариуæгадæн æмæ радон хатт бæрæгбоны цытæн арфæ ракодта æгас Хуссар Ирыстоны адæмæн. Нæ адæмæн йæ цæст бауарзта фидар æнæниздзинад, сабырад æмæ рæсугъд фидæн.
ЦХУЫРБАТЫ Ларисæ
