Æххæстæй Европæйы гиенæйы номы аккаг Польшæ æрæджы рацыд ног инициативæимæ, зæгъгæ, уæрæсейаг фехтованийы спортсментæй сæрмагонд æфсæддон операциимæ нæразыдзинадыл йæ къух чи æрфысса, уыдоны Польшæйы горæт Познанмæ бауадздзысты Дунеон кубокы ерыстæм.
Нæ зынаргъ Дмитрий Медведев куыд фыста, ситуацийы фæдыл комментарийæн цензурон ныхæстæ не ссардтон, зæгъгæ, уыйау мах дæр. Фæлæ бафæлварæм.
Уæлæнгай æркастæй ам спортсмен хъуамæ ма фæтыхса. Бафысс хъæугæ гæххæтты бын дæ къух æмæ ацу дæ Олимпиадæмæ, Дунеон кубокмæ, Евровиденимæ æмæ иннæ ерыстæм – чи йæ базондзæн? Дæ мидзæрдæйы та раздæрау æгæрон уарзтæй уарз æмæ нымай дæ райгуырæн зæхх, дæ бинонты, дæ мыггаг. Нæ, нæ зынаргъ газеткæсæг, дæ фын дæ ма фæсайæд. Ацы къухфыстытæ æмæ уагфыстытæ чи мысы, уыдон гитлерон нацистты фæдонтæ сты æмæ уыдоны фæлтæрддзинадæй пайда кæнынц. Ивгъуыд æнусы фашисттæ дзуттæгты бур æхсæзтигъон стъалытæй ифтыгътой, адон та къухфыстытæ домынц. Æрмæст ацы хатт та уæрæсейæгтæй. Дарддæр цы уыдзæн, зæгъгæ, куы бафæрсат, уæд уын зæгъдзынæн – ноджы фылдæр гæххæттытæ æмæ къухфыстытæ, кæронбæттæны та капитуляци æмæ репарацитæ бафидыны фæдыл акт.
Æрымысут-ма, сæрмагонд æфсæддон операцийы райдайæнæй ноджы тынгдæр æлхъивын куыд райдыдтой Уæрæсейы. Хъуыддаг уый уонг æрхæццæ, æмæ ИНО-йы Æдасдзинады Советмæ цæуæг дипломаттæн визæтæ нæ радтой. Уæдæ кæимæ фæнд кодтой цыма ацы «диссаджы адæм» конфликты фæдыл дзурын?
Никæимæ. Нæ сæ хъæуы уый. Уыдоны хъæуы æрмæст цагъайраджы æмыр разыдзинад. Уæрæсейаг специалистты «Северный поток»-ы срæмыгъды фæдыл фæдагуырдтæм æввахсдæр куыд нæ бауагътой, уый уын цæвиттонæн фæуæд.
О, разы стæм, спортсментæ тæригъæд сты. Цæрæнбонты сæхи фæцæттæ кæнынц уæддæр иу хатт Олимпиадæйы хайад райсыны сæраппонд æмæ уымæ гæсгæ спортсменты бамбарын æнцон у. Фæлæ ис альтернативæтæ дæр.
Зæгъæм, Канадæ йæ хуыздæр хоккеистты не ‘рвыста Олимпиадæтæм – уыдонæй Кубок Стэнли уæлдæр æвæрдта. Цалынмæ советон «Сырх машинæ» олимпиаг нæ рахызт, уæдмæ.
Нырыккон уавæрты Уæрæсейы бон дæр спорт размæ кæнынæн у йæхи спортивон ерыстæ, раст тæрхон æмæ зынаргъ æхцайы хорзæхтæй ифтонг ерыстæ уадзын, цалынмæ æддейæ дуархойджытæ сæ цæссыг згъалгæйæ фæзыной, уæдмæ. Сæ фыдахаст нæ фæивдзысты, фæсмоны хъизæмæрттæй сæ удтæ дæр нæ бахæрдзысты – уыдæтты тыххæй нæ калдзысты цæссыг. Бафæллайдзысты сæ диссаджы «олимпиадæтæй» – алыхуызон мутанттæ æмæ транcгендертæ кæм архайынц, уыцы ерыстæй.
ДАМБЕГТИ Иринæ
