Цæгатирыстойнаг æвзонг курдиатджын зарæггæнæг Айларты Эллинæ ссис популярон шоу «Голос»-ы 11-æм сезоны хайадисæг. «Алыхатт дæр мæ фæндыд ацы проекты хайад райсын, фæлæ мæ ныфс нæ хастон, цæттæ нæ уыдтæн психологон æгъдауæй. Мæ тыхтыл баууæндыдтæн æмæ аскъуыддзаг кодтон шоуйы хайад райсын æмæ алцыдæр рауад тынг хорз. Куыд алкæцы райдайгæ артист, афтæ мæн дæр фæнды, цæмæй мæ зоной фылдæр адæм, зæгъгæ, Ирыстоны ис чысыл чызг, кæцы æнахуыр уарзт кæны музыкæ æмæ йæ цард нæ уыны æнæ уый», – радзырдта уый «15-æм регионæн».

Артисткæ банысан кодта, зæгъгæ, бынтондæр нæ тыхст сценæйыл йæ ралæуды рæстæджы. Æвæццæгæн, уый у, ацы конкурсмæ цæттæ кæй уыдтæн, уый фæстиуæг.Тыхстæн райдиан байхъуыстыты, шоуйы сæ тыхтæ фæлварæг бирæ æвзонг адæймæгты куы федтон, уæд. Фæлæ загътон мæхицæн: «Эллинæ, дæуæн дæ бон суыдзæн алцыдæр, æрмæст равдис, цы зоныс. Уый у дæ шанс, æмæ йæ ма хъуамæ ауадзай», –  загъта уый.

Йæ ныхæстæм гæсгæ ацы проекты хайадистæй адæймаг фылдæр ногдзинæдтæ базоны. «Атмосферæ уыд тынг хорз, алчидæр фæтыхсы кæрæдзийы тыххæй. Ацы проект уæвынад кæны Уæрæсейы телеуынынады Фыццаг канал æмæ йæ организаторты фæрцы», – радзырдта зарæггæнæг.

Айларты Эллинæ хайад иста бирæ вокалон проектты, уыцы нымæцы уæрæсейаг канал «Россия 1»-ы телепрограммæ «Ну-ка, все вместе!»-йы, афтæ ма  телеканал «Осетия-Ирыстон»-ы проект «Азар ма»-йы. Телешоу «Голос»-ы хайад райсыны тыххæй чызг аскъуыддзаг кодта ивгъуыд аз. Йæ ныхæстæм гæсгæ йæм жюрийы уæнгтæ цыппар дæр кæй разылдысты, уый ныридæгæн у чысыл уæлахиз.

«Нымайын афтæ, æмæ æцæг тох фæцæуы, æппæт Уæрæсейæ  æмæ æндæр бæстæтæй курдиатджын вокалисттæ куы æрбацæуынц, уæд. Алкæйы дæр фæфæнды йæхи хорз равдисын, фæлæ  кастингмæ æрбацæуæг бирæнымæц адæймæгтæй ныууадзынц æрмæстдæр 120 адæймаджы», – загъта уый.

Айларты Эллинæмæ кæсгæйæ, зæрдæ йедзаг кæны сæрыстырдзинады æнкъарæнтæй, æгайтма нæ чысыл Ирыстоны ахæм курдиатджын æвзонг адæймæгтæ ис. Чызгæн ис æнахуыр зæрдæмæдзæугæ æмæ тыхджын хъæлæс. Элинæйæн нæ зæрдæ зæгъы стыр сфæлдыстадон æнтыстытæ.

Нæ уацх.

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.