Нæ республикæйы сывæллæтты поликлиникæйы æвдæм æмæ æстæм сентябры уæрæсейаг дохтыртæ дыууæ боны бæрæг кæндзысты нæ республикæйы хроникон низтæй рынчын сывæллæтты. Ацы дохтырты æрцыд у, Уæрæсейы Федерацийы Президенты цур сывæллæтты бартæ хъахъхъæныны фæдыл æххæстбарджын минæвар Львова-Белова Мария æмæ нæ республикæйы Президенты цур сывæллæтты бартæ хъахъхъæныны фæдыл æххæстбарджын минæвар Джиоты Аэлитæ къухтæ цы меморандумыл бафыстой, уый фæлгæтты.
Медицинон специалистты кусæгон къорды сконды сты: Мæскуыйы «Остеополиклиник»-ы клиникæйы бындурæвæрæг Дарья Бреева, дохтыр-невролог, остеопат медицинон уагдоны аналитикæйы фæдыл æххуысгæнæг, сæрмагонд сабидуг «Дети. про плюс»-ы фарсхæцыны проекты къухдариуæггæнæг Юлия Тарасова, аудиторты къорды сæргълæууæг: дохтыр-невролог, сывæллæтты реабилитолог, реабилитацион медицинæйы дохтыр Андрей Горлов.
Джиоты Аэлитæ куыд радзырдта, афтæмæй ацы медицинон специалисттæ нæ республикæмæ цæуынц Президент Гаглойты Аланы æххуысæй.
«Медицинон специалистты кусæгон къорд махмæ уый тыххæй цæуы, цæмæй бынаты басгарой хроникон низтæй рынчын сывæллæтты, цæмæй сæ уый фæстæ арвитой Мæскуы æмæ Санкт-Петербурджы федералон клиникæтæм. Кæй зæгъын æй хъæуы, уæрæсейаг дохтыртæ кусдзысты сæ хуссайраг коллегæтимæ. Ацы иумæйаг куысты рæстæджы рабæрæг уыдзæн, уæрæсейаг медицинон специалистты ма бахъæудзæн æрцæуын æви нæ. Цы меморандумыл бафыстам нæ къухтæ, уыцы пункттæй бирæтæ реализацигонд цæуынц ныридæгæн. Мæнæ ацы къахдзæф дæр у сæ иу», – радзырдта Джиоты Аэлитæ.
Куыд загъта, афтæмæй нæ горæты скъола-интернаты коррекцион кълæстæн æмæ къордæн лæвæрд æрцæудзæн специалон ифтонггæрзтæ балхæныны сертификат. Дыккаг сертификат та лæвæрд æрцæудзæн психологион æххуысы центрæн, кæцыйы тагъд рæстæджы райдайдзысты аразын. Ацы сертификаттæ нæ республикæйæн балæвар кодта Львова-Белова Мария.
ТАНДЕЛАТЫ Виленæ
