Цæмæй нæ бæстæйы COVID-19 инфекци ма апарахат уа, уый тыххæй махмæ дæр волонтертæ æххуыс кæндзысты кардзыд адæймæгтæн, цæмæй сын карантинон режимы фæрогдæр кæной сæ уавæр. Уыдон сæ бæрæг кæндзысты, дыууæ бон иу хатт сæ ифтонг кæндзысты хæлцадон продукттæ æмæ хостæй. Ацы акци сорганизаци кодта волонтерон змæлд «Хуссар Ирыстон-Аланийы волонтертæ»-йы координатор Джиоты Аэлитæ.
«Карантины уавæрты Хицауад бар дæтты астæуккаг кары адæймæгтæн дыууæ бон иу хатт рахизын хæлцадон магазинтæм æмæ аптекæтæм. Ацæргæ адæймæгты та уыдонæй ифтонг кæнынц сæ сывæллæттæ æмæ сæ хиуæттæ. Фæлæ ма нæ горæты ис ахæм ка-тегорийы зæрæдтæ, кæцытæн нæй хиуæттæ, кæннод та сын сты республикæйы æддейæ. Мах, фыццаджыдæр, æххуыс кæнæм уыдонæн», – зæгъы Джиоты Аэлитæ.
Уый ма куыд зæгъы, афтæмæй инициативон къорд кусдзæн РХИ-йы коронавирус COVID-19 ма апарахат кæныны фæдыл оперативон штабимæ.
«Волонтертæ кусдзысты республикæйы районтæ æмæ ма дæрддзæф хъæуты дæр. Иунæг æвæгæсæг зæронд адæймаг дæр æнæхъусдард нæ баззайдзæн. Цалдæр амалиуæггæнæджы æмæ ма фермерон хæдзарад чи дары, ахæм арендатортимæ ба-дзырдтам ныридæгæн æмæ цæттæ сты нæ инициативон змæлды фарсмæ æрбалæууын æмæ хæл-цадон продукттæй баххуыс кæнын», – банысан кодта уый.
Аэлитæ ма куыд зæгъы, афтæмæй ацы бонты байгом кæн-дзыстæм сæрмагонд телефон дæр. Уырдæм æнæаргъæй æрбадзурæн уыдзæн алкæмæн дæр психологион консультаци райсыны тыххæй. Ныртæккæ, зæгъгæ, бирæ дам-думтæ цæуы уавæры тыххæй, фæлæ махмæ æрбадзургæйæ, алы хатт дæр райсæн уыдзæн раст информаци.
Джиоты Аэлитæ æрсидт нæ го-рæты цæрæг æвзонг, активон адæймæгтæм, цæмæй æрбацæуой ацы змæлды скондмæ æмæ сæрбахъуыды рæстæджы балæууой кардзыд адæймæгты фарсмæ.
Медицинон маскæтæ – æнæаргъæй
Бæрæг куыд у, афтæмæй нæ республикæйы аптекæты нæй медицинон маскæтæ.
Уымæ гæсгæ фæзынд хицæн инициативон къордтæ, кæцытæ архайынц хисæрмагонд фæрæзтæй маскæты хуыйыныл.
Хæрзаудæн фонд «Мах ныфс»-ы сæрдар Гаглойты Таирæ æрсидт, не ‘мбæстæгтæй фæрæзджын чи у, ахæмтæм, цæмæй баххуыс кæной æхцайы фæрæзтæй.
Гаглойты Таирæ куыд зæгъы, афтæмæй хæрзгæнджытæ кæд нырма цъус сты, уæддæр кæмæн йæ бон цас у, уымæй æххуыс кæны. Зæгъæм, ацы бонты уыцы инициативæмæ æрбаиу Мæскуыйæ не ‘мбæстаг Сергей Ушаков. Медицинон маскæтæ хуыйыны хæс та сæхимæ райстой Цардуагон лæггæдты хæдзары хуыйджытæ Гæбулты Мæдинæ, Джиголаты Нинæ, Харебаты Мæдинæ æмæ Бестауты Вадим. Фыццаг парти ныридæгæн сцæттæ. Ис дзы 300 маскæйы. Уыдон лæвæрд æрцæудзысты нæ рынчындоны медперсоналæн. Уый фæстæ кæй бахуыйой, уыдон та байуардзысты адæмыл æнæ аргъæй.
Пенситæ хæсдзысты хæдзæрттæм
Хуссар Ирыстоны постонтелеграфон службæйы кусджытæ хæдзæрттæм хæсдзысты пенситæ æмæ сывæллæтты пособитæ, цалынмæ карантины уавæр ис, уæдмæ. Уый тыххæй Хицауад райста ахæм уынаффæ. Куыд зонæм, афтæмæй постон-телеграфон службæ кусдзæн штатон режимы. Пенситæ æмæ сывæллæтты пособитæ уарыны рæстæджы та кусдзысты санитарон-эпидемиологион рекомендацитæ æххæстгæнгæйæ.
Карантины режим фехалджытæм æнхъæлмæ кæсы ивартæ
Республикæйы прокуратурæ бацæттæ кодта сæрмагонд документ уагдæттæ æмæ организацитæн, кæцымæ гæсгæ сæ куыст æруромдзысты карантинон режимы рæстæджы. «Ахæм объекттæ сты 200 фылдæр. Барадхъахъхъæнæг органтæ сгарынц хæлцадон магазинтæ æмæ аптекæтæй дарддæр иннæ объектты. Карантины рæстæджы гом цы объекттæ баййафой, уыдон ивар æрцæудзысты. Эпидемийы ныхмæ мадзæлттæ чи нæ æххæст кæна, уыцы æмбæстæгты ивар кæндзысты 10 мин сомæй 20 мин сомы онг. Сæ куыст та урæд æрцæудзæн 90 суткæйы», – зæгъы прокуратурæйы бæрнон кусæг.
УАЗÆГТЫ Марфа
Comments are closed, but trackbacks and pingbacks are open.