Гæззаты Вадимы номыл Милицийы сæрмагонд нысаниуæджы къорды кусджытæ сарæзтой автоалыгъд згъæрварс техникæйыл. Ахæм сæрмагонд техникæйыл ОМОН-ы нымад сты «БТР-80». Ис ма сæм дыууæ ног рауадзгæ згъæрварс æфсæддон автомашинæйы «Тигр», фæлæ дзы хайад нæ райстой – уыдон хицæнæй арæх рацæуынц фæлварæнты æмæ сæ техникон уавæрмæ зæрдæ не ‘хсайы.
Автоалыгъды хайад райстой 40 спецкъорды кусæджы æмæ колоннæйы та уыд 10 «БТР-80». Семæ ма уыдысты медицинон хайы кусджытæ дæр. Сæ дистанци рауад 75 километры бæрц æмæ маршрут та арæзт уыд Цхинвал-Джер-Дзау-Цхинвал.
Автоалыгъды нысан у, цæмæй шофыр-механиктæ сæ квалификаци фæбæрзонддæр кæной, бакæсой сын сæ арæхстдзинадмæ хæххон фæндæгтыл, феной сæ, талынджы куыд арæхсынц скъæрын. Сæххæст ма кодтой хистæрты хæслæвæрттæ дæр – бафæлвæрдтой сæ техникæ къуылдымты æмæ адгуыты скъæргæйæ, уынгæг бынæтты бацæуæнты, буксирæй раст куыд хъæуы пайда кæнын æмæ ма æндæр ахæм маневртæ. Колоннæйы цæугæйæ ма кастысты дистанцимæ дæр, цæрæн хæдзæртты хсæнты куыд хъæуы скъæрын, рацийæ куыд хъæуы архайын кæрæдзимæ бастдзинад аразгæйæ. Фæлтæрд шофыртæ амыдтой æрыгæттæн, куыд хъæуы раст архайын, цæмæй сæрбахъуыды рæстæджы ма фæтыхсой.
Шофыртæ равдыстой хорз цæттæдзинад æмæ иттæг хорз сæххæст кодтой сæ разы лæууæг хæстæ. Ахæм автоалыгъдтæ ОМОН саразы аз дыууæ кæнæ фылдæр хатты.
ДЖИОТЫ Алыксандр
