МИЛИЦИЙЫ СÆРМАГОНД НЫСАНИУÆДЖЫ  КЪОРДЫ СЫРÆЗТЫЛ СÆХХÆСТ 27 АЗЫ

Хуссар Ирыстоны адӕм бирӕ зындзинӕдтӕ ӕмӕ хъизӕмӕрттӕ бавзӕрстой 1989 азӕй фӕстӕмӕ. Ӕддагон знагимӕ тох кӕнынимӕ ма  не ‘хсӕнады цы криминалон элементтӕ фӕзынд, уыдон ныхмӕ дӕр хъуыд фидар фӕлӕууын. Уыцы фыдгӕнджытӕ бынӕттон цӕрджыты къаддӕр не ‘фхӕрдтой ӕмӕ не ‘мбӕстӕгтӕ цардысты ӕдзухдӕр тасы мидӕг. Ахӕм уавӕрты ӕнӕмӕнгӕй хъуыд фӕтк ӕрӕвӕрын, фыдгӕнджыты карзӕй ӕфхӕрын.

1992 азы Гӕззаты Вадимы хъӕппӕрисӕй арӕзт ӕрцыд милицийы Сӕрмагонд нысаниуæджы къорд. Йӕ фарсмӕ балӕууыдысты 13 лӕппуйы ӕмӕ цыбыр ӕмгъуыдмӕ Къорд йӕ хӕстӕ ӕххӕст кӕнын райдыдта ӕхсӕнадон фӕтк ӕрӕвӕрыны фӕдыл. Тынг зынвадат дуг уыд, – нӕ фаг кодта хӕцӕнгарз, нӕмыг. Милицийы сӕрмагонд нысаниуæджы къорды сырӕзты кой айхъуыст Ирыстоны къуымты ӕмӕ сӕ рӕнхъытӕм райдыдтой цæуын бирæ ирон лӕппутӕ. Афтӕмӕй цыбыр ӕмгъуыдмӕ Къорды нымӕц бӕрӕг фӕфылдӕр. Цы зæронд техникæ сæм уыд, уыдон сæхи тыхтæй сцалцæг кодтой, самал кодтой æхсæнгæрзтæ æмæ нæмгуытæ. Гæззаты Вадим йæ хисæрмагонд автомашинæ дæр ауæй кодта Къордæн уавæртæ сразыны тыххæй. Бынат та равзæрстой Цхинвалы хурныгуылæн фарс, тулдзы къохы пионерты лагеры бæстыхай. «Уыцы уӕззау азты Милицийы сӕрмагонд нысаниуæджы къорд уыд иунӕг ахӕм тыхон структурӕ, кӕцы не ‘рыгон республикӕйы ӕвӕрдта фӕтк ӕмӕ хъахъхъӕдта адӕмы сабырад. Ӕххуыс кодтой гуманитарон æххуыс ласынæн, кӕцы блокадӕйы рӕстӕджы стыр ахъаз фæцис цӕрджытӕн», – зӕгъы Къорды командир Плиты Игорь.

Ӕмӕ ӕцӕгӕйдæр ОМОН-ы кусджытæ стыр хайбавæрд бахастой Ирыстоны фæтк ӕрӕвӕрын æмæ сабырад æрхæссынмæ, æмæ ныры онг дæр сæ службæйон хæстæ æххæст кæнынц цæсгомджынæй. Активон хайад истой æддагон знæгтæй нæ райгуырæн бæстæ бахъахъхъæнын дæр  . Бирæ æрыгон кусджытæ дзы сæ цард радтой Ирыстоны тыххæй æрмæст хæсты быдыры нæ, фæлæ ма фыдгæнджытæ æмæ барадхалджыты ныхмæ тохы дæр. Абоны бон дæр ОМОНы къухдариуæгад материалон æх-хуыс бакæны, йе службæйон хæстæ æххæстгæнгæйæ æмæ хæсты быдыры чи фæмард, уыдоны бинонтæн.

Плиты Игорь йæхæдæг дæр хæрзæвзонгæй æрбацыд ОМОН-ы рæнхъытæм æмæ уæдæй фæстæмæ иузæрдионæй лæггад кæны йæ адæмæн. Каст фӕцис Уӕрӕсейы Мидхъуыддӕгты управленийы академи. Зонгæ у къорды алы проблемон фарстаимæ дæр, кад ын кæнынц йæ дæлбар кусджытæ æмæ ныфс у йæ Ирыстонæн. Йæ хорз куысты тыххæй йæ нæ бæстæйы къухдариуæгад бирæ хæттыты схорзæхджын кодта алыгъуызон хорзӕхтӕй.

Мидхъуыддæгты министрады фæстаг рæстæджы цæуы оптимизаци, фæкъаддæр кодтой милицийы кусджыты нымæц, цæмæй фæфылдæр кæной куыстмыздтæ æмæ фæхуыздæр кæной техникон ифтонгад. «Оптимизаци ОМОН-ыы рæнхъыты тынг нæ бахъыгдардта, иу кусæг дæр æрвыст не ‘рцыд куыстæй. Ӕрвылбонон хæстæ æххæст кæнынæн фаг стæм, фæлæ исты бæрæгбонон мадзæлтæ уадзыны рæстæджы кусджытæ нал фæфаг кæнынц», – банысан кодта Плиты Игорь.

Раздæр куыстмыздтæ хæрзцъус кæй уыдысты, уый фæстиуæгæн нæ республикæйы кыстуæтты егъау коллективты ног кадрты ивындзинад стыр уыди.  Плиты Игоры ныхæстæм гæсгæ фæстаг азты ОМОН-ы ахæм ныв фенæн нал ис, – иу стæм хаттæй дарддæр йæ куыст ничиуал ныууадзы. Уый та ууыл дзурæг у æмæ куысты уавæртæ кæй хуыздæр кæнынц, кæд ма дзы бæлвырд цухдзинæдтæ ис, уæддæр.ОМОН-ы бынат ис горæты Ирæтты уынгыл, раздæры скъола-интернаты бынаты. Сæ куысты уавæртæ сты хуыздæрхъуаг. Фыццаджыдæр сын нæй казарматæ æмæ спортивон залæй сарæзтой казармӕ. Уый фӕстиуӕгӕн ОМОН-ы кусджытӕ рахау-бахауаг фæвæййынц, – сӕ спортивон ерыстӕ уадзгӕйӕ ӕмӕ фӕлтӕрддзинад райсыны фӕдыл ацӕуынц горӕты æндæр спортивон залтӕм. «Фæтыхджындæргонд режимыл куы фæкусæм, уæд стыр зындзинæдтæ февзарæм, – нæ вæййы кусджытæн æрулæфынӕн бынат. Ацы проблемæимæ зонгæ сты мидхъуыддæгты министрады дæр æмæ нæ Респуб-ликæйы къухдариуæгад дæр», – зæгъы Плиты Игорь.

Бӕстӕйы Президент Бибылты Анатоли ныфс бавӕрдта, бацархӕйдзысты, цӕмӕй ОМОН-ы кусджытӕн арӕзт ӕрцӕуа казармӕ ӕмӕ сын фӕхуыздӕр кӕной сӕ куысты уавӕртӕ.

ОМОН-ы службӕйон автомашинӕтӕ дӕр базӕронд сты ӕмӕ арӕх фехӕлынц. Сӕ техникӕйӕн фароны онг агъуыст дӕр нӕ уыд ӕмӕ-иу уыдысты  гом арвы бын. Президент Бибылты Анатоли сын баххуыс кодта ацы хъуыддаджы. Фӕлӕ уæддæр агъуыст ӕппӕт техникӕйы фаг нӕу. Бӕстӕйы президент куыд банысан кодта, афтӕмӕй ма ноджы арӕзт ӕрцӕудзӕнис агъуыст.

Сæрмагонд уӕлӕдарӕсӕй ифтонг сты къорды кусджытӕ. «Фӕстаг азты нын никуы уыд уый фæдыл проблемӕ. Алы ног ӕрбацӕугӕ кусӕджы дӕр сифтонг кӕнӕм уӕлӕдарӕсӕй ӕмӕ афæдз иу хатт та се ‘ппæт дæр райсынц ног дарæс», – банысан кодта Къорды командир.

Цæттæдзинады фæдыл републикон ерысты ОМОН-ы кусджытӕ райсынц активон хайад ӕмӕ арӕх свӕййынц уӕлахизуӕвджытӕ. Ӕгӕрыстӕмӕй ма сӕ фӕхонынц Уӕрӕсемӕ дӕр ерыстӕм ӕмӕ уым дӕр бацахсынц призон бынӕттӕ. Алы кусӕг дӕр ӕрвылаз сӕххӕст кӕны нормативтӕ ӕмӕ, Плиты Игорь куыд зӕгъы, афтӕмӕй нырма иу ахӕм кусӕг дӕр нӕ разынд ОМОН-ы рӕнхъыты, кӕцыйы бон нӕ бацис фаг фӕлтӕрддзинад равдисын. «Цӕмӕй  ОМОН-ы рӕнхъытӕм ӕрбацӕуай, уый тыххӕй хъуамӕ радтай фӕлварӕнтӕ, ома нормативтӕ, стӕй та рацӕуай психологон тесттӕ. Куыстмӕ райсӕм иууыл ӕвзыгъддӕр, фӕлтӕрддӕр ӕмӕ аккагдӕр лӕппуты», – банысан кодта Плиты Игорь.

ОМОН-ы бирӕ дӕлхæйттæ ис ӕмӕ дзы алкӕцы дӕр у хъӕугӕ. Зӕгъӕм, инженерон-техникон хаймӕ хауынц сапертӕ ӕмӕ кинологтӕ, ӕмӕ кӕд сӕ куыст, уӕлӕнгай бакӕсгӕйӕ, нӕ зыны, уӕддӕр сын ис ӕнтыстытӕ. Стыр ӕххуыс сты рӕмудзӕн ӕрмӕ-джытӕ ссарын ӕмӕ скуынӕг кӕныны хъуыддаджы, ӕмӕ ма фыдгӕнджыты ӕрцахсыны рӕстӕджы дӕр. Кинологтӕ ацӕуынц ерыстӕм Уӕрӕсемӕ ӕмӕ ӕрхӕссынц призон бынӕттӕ. «Нӕ кинологтӕй иу ныртæккæ дӕр ис Уӕрӕсейы, – йӕ куыдз базӕронд ис ӕмӕ хъуамӕ сахуыр кӕна ӕндӕр куыдз йӕхиуыл. Ацы аз майы мӕймӕ уыдзӕн уым ӕмӕ стӕй ӕд куыдз ӕрцӕудзӕн ӕмӕ та ногӕй ӕххӕст кӕндзысты сӕ службӕйон хӕстӕ», – зӕгъы ОМОН-ы командир.

Уӕдӕ рӕстӕг куыд цӕуы, афтӕ уавӕртӕ дӕр хуыздӕр кӕнынц. «Адӕмы цӕст уынаг у», зӕгъгӕ, фӕзӕгъынц. Хуссар Ирыстоны цӕрджытӕ хорз зонынц, ОМОН-ы кусджытӕ цавӕр лӕггад бакодтой сӕ райгуырӕн бӕстӕйӕн, сӕ адӕмӕн. Сӕ рӕнхъыты цы ӕрыгон кусджытӕ ис, уыдон кӕддӕриддӕр сӕрыстыр уыдзысты сӕ историйӕ ӕмӕ сын цӕвиттон та уыдзӕн ОМОН-ы бындурӕвӕрӕг, йæ фыццаг легендарон командир Гӕззаты Вадим.

Джиоты Александр

Comments are closed, but trackbacks and pingbacks are open.