Дыгурон литературæйы бындурæвæрæг Гуырджыбеты Бласкайæн цытджын æгъдауæй байгом кодтой бюст Сырх-Дыгуры хъæуы. Куысты автор у Соскъиты Владимир. Бюст æвæрд æрцыд хъæуы астæуккаг скъолайы кæрты. Йæ байгом кæныны цытæн скъоладзаутæ бацæттæ кодтой цытджын программæ: бакастысты æмдзæвгæтæ, сæххæст кодтой кафты номыртæ, азарыдысты зарджытæ.
Уазджыты ‘хсæн уыдысты хъæуы цæрджытæ, æхсæнадон организациты минæвæрттæ, скульптор Соскъиты Владимир, республикæйы фысджыты цæдисы уæнгтæ æмæ Æрæфы районы къухдариуæгад.
Банысан кæнын хъæуы уый дæр, æмæ бюст æвæрд кæй æрцыд Цæгат Ирыстоны Фысджыты цæдисы æмæ Æрæфы районы администрацийы хъæппæрисмæ гæсгæ.
Гуырджыбеты Бласка ныууагъта хъæздыг сфæлдыстад. 1903 азы поэт рауагъта 19 æмдзæвгæты æмбырдгонд «Дигорон уадзимистæ» æмæ комеди «Æдули». Иу азы фæстæ йын мыхуыры рацыд фыст поэмæ «Сæхи рæсугъд» ирон адæмон фольклоры бындурыл. 1904 азы Гуырджыбеты Бласка бархионæй ацыд уырыссаг-япойнаг хæстмæ. Фæмард 1905 азы цæрæн пункт Санвайцзыйы цур япойнаг ахсджиаг арæзтад штурм кæныны рæстæджы.
Нæ уацх.
