Райстой сæрмагонд приз

Куыд ма хъусын кодтам, афтæмæй ивгъуыд къуырийы Цæгат Ирыстон-Аланийы уагъд цыдис Националон театрты 9-æм æхсæнадæмон фестиваль «Сцена без границ», цыран хайад райста Хетæгкаты Къостайы номыл Хуссар Ирыстоны паддзахадон драмон театр дæр. Нæ театр цæгатирыстойнаг сценæмæкæсджыты размæ фыццаг хатт рахаста Къостайы æнæмæлгæ уацмыс «Фатимæ»-мæ гæсгæ æвæрд спектакль, кæцыйы æрæджы сæвæрдта режиссер Дзудцаты Тамерлан.

Хуссар Ирыстоны паддзахадон драмон театры пресс-службæйы нын куыд фехъусын кодтой, афтæмæй премьерæ тынг фæцыдис аивадуарзджыты зæрдæмæ æмæ йыл сæмбæлдысты тыхджын къухæмдзæгъдимæ.

Фестивалы спектакль «Фатимæ»-йæн лæвæрд æрцыдис сæрмагонд приз «За сохранение традиций и сценическое воплощение поэмы Коста в спектакле «Фатима». «Фестиваль рауадис тынг цымыдисон, хорз нæ суазæг кодтой. Нæ артисттæ дæр бацархайдтой, цæмæй хорз сæххæст кодтаиккой сæ ролтæ æмæ сценæмæкæсджыты зæрдæмæ фæцыдаиккой. Уый сæ къухты бафтыдис æмæ сæ гастролон балцæй æрхастой фестивалы радон хорзæх», – загъта Зæгъойты Рада.

Уый ма куыд банысан кодта, афтæмæй фестивалы сылгоймаджы хуыздæр ролы тыххæй хорзæх райста Адыгейы паддзахадон драмон театры артисткæ Асиет Вайкок. Нæлгоймаджы хуыздæр роль та радтой А. Салаватовы номыл Хъумыхъæгты националон драмон театры артист Имам Акаутдинов, кæцы спектакль «Ханума»-йы ахъазыдис Вано Пантиашвилийы ролы. Компетентон жюри ма спектакль «Ханума»-йы сценографи дæр банымадтой иууыл хуыздæрыл, кæцыйы нывгæнæг у Борис Голодницкий. «Хуыздæр актерон ансамблы» тыххæй та хорзæхджын æрцыдис С. Чамбайы номыл республикæ Абхазы паддзахадон драмон театр, кæцы сценæмæкæсджыты размæ рахаста режиссер Валерий Ковейы æвæрд спектакль «Берег неба». Фестивалы ма хорзæхтæ райстой æндæртæ дæр.

Нæ театры пресс-службæйы нын куыд фехъусын кодтой, уымæ гæсгæ ма Хетæгкаты Къостайы номыл паддзахадон драмон театр хуынд æрцыдис радон æхсæнадæмон театралон фестиваль «Южная сцена»-мæ, кæцы уагъд цæудзæнис горæт Налцыччы 17-æм ноябрæй 22 ноябрмæ. Театр фестивальмæ хæссы Жан Ануйы уацмысмæ гæсгæ æвæрд спектакль «Антигона». Фестивалы фæлгæтты ма хаст сты æндæр æмæ æндæр профилон мадзæлттæ, уыдоны ‘хсæн мастер-къластæ æмæ тымбыл фынгтæ.

Цхуырбаты Ларисæ