Республикæ Хуссар Ирыстоны Президент Бибылты Анатоли бабæрæг кодта Æлборты Феликсы номыл Цхинвалы музыкалон ахуыргæнæндоны вокалон хайады ахуыргæнæг Иринæ Ломидзейы.
Бибылты Анатоли йын бузныджы ныхæстæ загъта йæ куысты æмæ республикæйы царды активон хайдисты тыххæй. Президент йæ Барамындæй «Республикæ Хуссар Ирыстоны адæмон ахуыргæнæджы» кадджын ном радта Иринæ Ломидзейæн, йæ педагогон архайды, рæзгæ фæлтæр хъомыл æмæ ахуыр кæныны йæ лæггæдты æмæ бирæ азты дæргъы æнтысгæ фæллойадон архайды тыххæй.
«Дæу уарзынц, хъуыды дæ кæнынц æмæ, кæй зæгъын æй хъæуы, аргъ дын кæнынц де стыр хайбавæрдæн РХИ-йы культурæйы рæзты хъуыддагмæ. Мæнæн стыр кад у, дæ профессионалон лæггæдтæ банысан кæнын æмæ риуылдаргæ нысан радтын. Стыр бузныг дын», – загъта уый.
Йæ рады, Иринæ Ломидзе радзырдта йæ зынгæ ахуыргæнинæгты тыххæй – бирæ престижон хорзæхты хицау, æппæтуæрæсейон æмæ æхсæнадæмон конкурсты лауреат Геворг Григорян, оперон зарæггæнæг Хæбæлаты Лали, РЦИ-Аланийы Мариинаг театры филиалы солисткæ Цоциты Тамарæ æмæ æндæр артистты тыххæй, кæцытæ абон архайынц дунеон музыкалон фæзуæтты.
Уый ма загъта, зæгъгæ, йе нæниздзинадимæ проблемæтæ кæй ис, уый фæдыл уымæн йæ бон нæу профессионалон архайд кæнын.
Comments are closed, but trackbacks and pingbacks are open.