Райстой ахсджиаг закъæтты проекттæ

Джуссойты Константины сæрдариуæгадæй ауагъдæуыд Хицауады æмбырд. Боны фæткы фарстатæй иу уыд «РХИ-йы закъондæттæн акттæй иуæй-иутæм  ивындзинæдтæ бахæссыны тыххæй» закъоны проект. Уынаффæмæ йæ раразмæ кодта экономикон рæзты министр Тадтаты Дзамболат.

Уый куыд загъта, афтæмæй барастгæнинæгтæ арæзт æрцыдысты Экономикон рæзты министрады закъоны фæлгæтты æмæ сæ нысан у РХИ-йы закъоны лицензи кæныны тыххæй  ныхмæвæрдтытæ аиуварс кæнын.

Лицензигæнæн органты реестртæ æмхуызон аразыны тыххæй сфидар кæнын хъæуы лицензийы реестры фæтк æмæ лицензийы формæ.

Министр куыд бамбарын кодта, афтæмæй «Архайды хицæн хуызты лицензи кæныны тыххæй» РХИ-йы закъоны 17-æм статьяйы фидар æрцыд архайды хуызты номхыгъд, кæцыты лицензи кæнын хъæуы Хуссар Ирыстоны. Уыимæ иумæ уыцы номхыгъды сты, сæрмагонд акттæм гæсгæ лицензи кæнын цы архайды хуызты нæ хъæуы, уыдон дæр, кæцытæ сты республикæйы территорийыл æмæ фæтк æвæрынц  банысангонд хуызтæн.

«2013 азы 18 декабры рйстæрцæуæг «Кондады æвзарæнтæ æмæ фæлхас кæныны тыххæй» РХИ-йы закъоны нысан æрцыд, зæгъгæ, лицензи кæнын хъæуы тæссаг æвзарæнты æмбырд кæнын, пайда кæнын, æдас кæнын, ласын æмæ сæ æвæрыны фæдыл архайд», – банысан кодта Тадтаты Дзамболат æмæ ма йæ ныхасмæ бафтыдта, зæгъгæ, проектмæ гæсгæ РХИ-йы Хъалонты Кодексмæ дæр хаст æрцæудзысты ахæм ивддзинæдтæ, зæгъгæ, Кодексы 360-æм статьяйы фыццаг пунктмæ бахастæуыдзæн баххæсткæнинаг – лицензигæнæн органы куырдиат равзаргæйæ æмæ реестрæй сфыст ратгæйæ ист цæудзæн сæдæгай  сомтæ.

Министрты кабинет закъоны проект райстой æмхъæлæсæй.

Æнæниздзинад хъахъхъæнын æмæ социалон рæзты министр Плиты Агуындæ доклад сарæзта «Наркотикон фæрæзтæ æмæ психотропон буарадты тыххæй» РХИ-йы закъонмæ ивындзинæдтæ бахæссыны тыххæй.

Уый куыд радзырдта, афтæмæй амæй размæ Æнæниздзинад хъахъхъæныны министрад барадон экспертизæйы тыххæй Юстицийы министрадмæ арвыста алкоголон, наркотикон кæнæ токсикон расыг сбæрæг кæныны фæдыл медицинон басгæрсты фæткы тыххæй барамынды проект.

Экспертизæ ауадзыны рæстæджы Юстицийы министрад сбæрæг кодта закъоны банысангонд статьяйы ныхмæвæрд пункттæ.

«Закъоны 44 статьяйы фæндзæм пункты нысан æрцыд, зæгъгæ, æнæниздзинад хъахъхъæныны фадыджы медицинон басгæрстæн фæтк æвæрынц æххæстгæнæн хицауады органтæ Мидхъуыддæгты министрады разыйæ. Статьяйы ацы пунктæн иннæ пункт у ныхмæвæрд», – бамбарын кодта министр æмæ бахатыд хицауады уæнгтæм, цæмæй закъоны фæндзæм пункт æппæрст æрцæуа, æхсæзæм пункт та фыст æрцæуа ног редакцийæ, бæлвырддæрæй та – «гоймаджы медицинон басгæрст медицинон фадыджы аразы æххæстгæнæг орган мидхъуыддæгты фадыджы æххæстгæнæн хицауадæй, Генералон прокуратурæйы æмæ  юстицийы фадыджы æххæстгæнæг хицауадæй  бар райсгæйæ», – банысан кодта министр.

Хацауады уæнгтæ хъæлæсæппæрсты фæстиуæгæн райстой закъоны проект.

Дарддæр ныхасы рацыд юстицийы министр Гаглойты Олег. Уый министрты кабинеты размæ рахаста уагæвæрды проект, Юстицийы министрады Æфхæрд æххæст кæныны управленийы чи службæ кæны, уыдоны æмæ Тæрхондоны приставты службæгæнджыты азты сгуыхтдзинад банымайыны, пенситæ, компенсацитæ æмæ пособитæ снысан кæнын æмæ бафидыны фæткы тыххæй, уыцы нымæцы сæ бинонтæн дæр.

Докладгæнæг загъта, зæгъгæ,  уагæвæрды проект арæзт æрцыд, ивгъуыд аз уый тыххæй цы закъон райстæуыд, уый реализацийы нысанæн.

Гаглойты  Оледжы ныхæстæм гæсгæ, закъон йæ тыхы бацæудзæн 1-æм августæй æмæ цæмæй æххæст хъомысæй скуса æмæ адæм райсой августы мæйы пенси, уый тыххæй проекты райсын хъæуы.

Уагæвæрды проект министртæ райстой æмхъæлæсæй.

Хицауады рабадты рæстæджы Юстицийы министрады хайады сæргълæууæг Кристина Хачатрянæн радтой РХИ-йы паддзахадон æмбæстагон службæйы къласон чин – РХИ-йы паддзахадон службæйы 3-аг къласы уынаффæгæнæг.

ОСИАТЫ Индирæ