Хуссар Ирыстоны мобилон бастдзинады компани «Остелеком» республикæйы æнæниздзинад хъахъхъæныны министрадæн радта пайда кæныны æмгъуыд кæмæн нæй, ахæм аст номыры æнæаргъ мобилон бастдзинадимæ, – хъусын кæны æхсæнадимæ бастдзинады фæдыл компанийы специалист Бежанты Заринæ.
«Остелеком», пайда кæныны æмгъуыд кæмæн нæй ахæм телефонон номыртæ æнæлимитон тарифимæ радта республикон æмæ сывæллæтты рынчындæтты исæн хайадтæн, поликлиникæйы регистратурæйæн, афтæ ма мобилон номыртæ райстой Цхинвалы æмæ республикæйы районты Тагъд æххуысы станциты диспетчертæ, уыдон рахиздзысты æнæлимитон тарифон пъланмæ», – загъта Бежанты чызг.
Æнæаргъ бастдзинадимæ номыртæ радтыны тыххæй уынаффæ компанийы генералон директор Николай Фрисов банысан кодта ацы фадыджы организацийы куысты ахсджиагдзинад.
«Æнæниздзинад хъахъхъæныны министрады социалон нысаниуæджы дæлхай – Тагд æххуысы станц мобилон бастдзинадæй сифтонг кæнын компанийæн у стыр бæрндзинад. Не специалисттæ цыбыр рæстæджы сорганизаци кодтой бастдзинады лæггæдтæ, кæцытæ баххуыс кæндзысты дохтыртæн алыгъуызон уавæрты сæ профессионалон архайд æххæст кæнынæн. Ацы службæйæн гъæдджын æмæ стабилон бастдзинад уæлдай ахсджиаг у», – ахæм у йæ хъуыды гендиректорæн.
Æнæниздзинад хъахъхъæнын æмæ социалон рæзты министр Плиты Агуындæ бузныг загъта компа-нийæн реализацигонд социалон инициативæйы тыххæй, кæцыйæн уыдзæн ахсджиаг нысаниуæг ведомствойы куысты.
