Цхинвалы цæгатварсæрдыгæй раздæры бигæдзаумæтты фабрикæйы территорийыл активон темптæй арæзт цæуы фондзуæладзыгон хæдзар. Ацы объект у Республикæ Хуссар Ирыстоны социалон-экономикон рæзтæн ахъазгæнæг Инвестицион программæмæ гæсгæ 2020 азæй 2021 азмæ чи рахызт, уыдонæй. Хæдзары арæзтадыл кусы арæзтадон фирмæ «СТМ-Юг». Ацы фирмæйæн хæдзæрттæ аразыны хъуыддаджы стыр фæлтæрддзинад ис.
Бирæуæладзыгон хæдзары цæрынæн уыдзæн æппæт фадæттæ дæр. Йæ фарсмæ арæзт æрцæудзæн ноджыдæр иу ахæм бирæуæладзыгон хæдзар. Фыццаг эксплуатацимæ лæвæрд æрцæудзæн азы кæрон, дыккаг та 2021 азы. Уымæн ныридæгæн арæзт æрцыд йæ ныккæнд, ацы бонты та хъавынц систæ амайæн куыстытæм бавналынмæ. Ныртæккæ уым бирæ кусджытæ нæ архайы, фæлæ фадыджы хистæр куыд зæгъы, афтæмæй куыстытæ куыд фылдæр кæной, афтæ фæфылдæр кæндзæнис кусджыты нымæц дæр.
Уыцы иурæстæг ма ацы фирмæ кусы Гуыбаты æфсымæрты уынгыл цы бирæуæладзыгон хæдзар рæзы, уым дæр. Ацы хæдзары уыдзæн 75 фатеры. Хæдзар арæзт æрцыд Гуыбаты æфсымæрты уынгыл цы ахуыргæнæндон уыд, уый æмдзæрæндоны бынаты. Банысан хъæуы уый, æмæ аразджытæ зымæгон бонты дæр æнцад кæй нæ бадтысты. Арæзт æй куы фæуой, уæд бирæуæладзыгон хæдзарæн хæрзарæзт æрцæудзæнис йæ кæрт, æвæрд дзы æрцæудзæнис фæхсбандæттæ, хъазæн фæзуат. Хæдзар арæзт цæуы, йæ фарсмæ цы ног бирæуæладзыгон хæдзæрттæ ис, уыдоны планировкæмæ гæсгæ. Арæзтады цы кусджытæ кусынц, 25 адæймаджы бæрц, уыдон сты бынæттон кусджытæ, æххæст сты арæзтадон æрмæджытæй, куыстмызд дæр сын фыст цæуы афоныл. Ацы бирæуæладзыгон хæдзары арæзтад раздæр нысан цыд нæ горæты Гаглойты Владимиры уынгыл. Фæлæ республикæйы разамынады инициативæмæ гæсгæ уый рахаст æрцыд ацы бынатмæ, цæмæй рæза æмæ рæсугъддæр кæна ЦАРЗ-ы микрорайон дæр. Фидæн аз та ацы микрорайоны сырæздзæн кæстæр кары сывæллæттæн сабидон.
Куыд зонæм, афтæмæй Дзауы райцентры 2020-22 азтæн Инвестпрограммæйы фæлгæтты ноджыдæр арæзт цæуы дыууæ бирæфатерон хæдзары. Хæдзæрттæн сæ сæйраг куыстытæ фæуд сты. Объектты арæзтадыл æдæппæт кусынц 20 адæймаджы. Арæзтадон куыстытæ æххæст кæны фирмæ «Шанс». Ам цы кусджытæ ис, уыдон сты бынæттон æмæ сæ куыстмæ нæй фау æрхæссæн. Уыдон ма ахæм куыстытæ бакодтой ивгъуыд аз, раздæры санатори «Дзау»-ы территорийыл цы æртæуæладзыгон хæдзар сырæзт, уым дæр. Ныртæккæ дæр дзы цы æртæуæладзыгон хæдзæрттæ арæзт цæуы, уыдоны уыдзысты дыууæхатæнон фатертæ. Хæдзары кæрты сывæллæттæн арæзт æрцæудзæн хъазæн фæзуат, афтæ ма улæфæн зонæ, цыран æвæрд уыдзæнис фæхсбандæттæ. Машинæтæн дæр дзы арæзт æрцæудзæнис бынæттæ. Ахæм æртæуæладзыгон хæдзар арæзт цæуы Знауыры районы дæр.
Уазæгты Марфа
Comments are closed, but trackbacks and pingbacks are open.