Фадат аразæг у, фæзæгъынц. Уымæй кæнгæ у фылдæрбæрцæй цыфæнды чысыл хъуыддаджы сырæзт дæр. Нæ республикæйы хъæууон хæдзарады райрæзтæн дæр нæй æмбæлон фадæттæ æмæ уавæртæ, фыццаджыдæр та цухдзинад æййафынц алыхуызон техникæйæ. Кæд бынтон æххæстæй нæ, уæддæр нæм ис, техникæйыл кусын чи уарзы, чи йыл бакуса, хъæууонхæдзарадон культурæтæм афæдзы дæргъы цæстуарзонæй чи базила, ахæм механизатортæ. Дзæвгар нæм ис, зæххы куыст чи кæны, хъæууонхæдзарадон культурæтæм зилын æмæ сæ фæззæджы хъæздыг тыллæг æрзайын кæныныл æнæзæрдæхудтæй чи фæллой кæны, ахæмтæ дæр. Басæттæм ыл: къаддæр не сты, нæ радтæг зæхх бакусын кæй фæнды, фæлæ фадат æмæ уавæртæ кæмæн нæй, ахæм фæллойгæнджытæ дæр.
Нæ республикæйы цы кадавар техникæ ис, уый фаг нæу хъæууонхæдзарадон куыстытæ æххæстæй æмæ кæронмæ бакæнынæн. Уый тыххæй тыхсынц арендатортæ æмæ хицæн зæхкусджытæ. Уавæр зындгонд у нæ Хицауадæн æмæ архайы, цæмæй уыцы згъуыд иуварс æрцæуа æмæ йын æнтысгæ дæр кæны цасдæрбæрцæй Уæрæсейы Хицауады æдзухон æххуысы фæрцы. Æрæджы цы хъæууонхæдзарадон техникæ райстам, уый тыххæй нын радзырдта «Агропромсервис»-ы директор Сагкаты Витали. Районты хицæн хæдзарадтыл куыд дих æрцыдысты, уый тыххæй банысан кодта, зæгъгæ, зæххы иууыл фылдæр фæзуат бакусынц Ленингоры районы цалдæр хæдзарады æмæ Цъинагары хæдзарадæн лæвæрд æрцыд гербицидтæ æмæ минералон хъацæнтæ пырхгæнæн агрегат. Районы хæдзарадтæ дзæвгар гектартæ бакусынц æмæ æрзайын кæнынц æфсирон культурæтæ, фæлæ сын тауæн агрегаттæ дыууæ йедтæмæ нæй æмæ ма уымæ гæсгæ ахæм ног тауæн ратдзыстæм ацы хæдзарадæн. Иннæ тауæн та уыдзæн Цхинвалы районы æмæ дзы сæ куыстытæ æххæст кæндзысты йæ хæдзарадтæ, фæлæ куы бахъæуа, уæд кусдзæн Знауыры районы дæр. Цхинвалы районæн ма лæвæрд æрцыд Кировец трактор, уый кæны хуым, мæр фæлмæн æмæ хырыз кæны æмæ æххæст кæны тауыны куыст дæр. Цы ног комбайн нæм æрхæццæ, ууыл та кусдзысты Уелиты хъæуы фыццаг бригадæйы комбайнертæ.
Сагкайы фырт ма куыд банысан кодта, афтæмæй æрмæст уыцы техникæ нæ, фæлæ ма тагъд рæстæджы æнхъæлмæ кæсынц æндæр хъæууонхæдзарадон техникæмæ дæр. Зындгонд куыд у, афтæмæй нæ республикæйы хоргуыстгæнджытæм ис 9 комбайны, уыдонæй иу у ног, иннæтæ та зæронд кæй сты, уый тыххæй арæх сæ куыстæй æрлæууынц. Æввахс рæстæджы ма ноджыдæр райсдзысты цыппар комбайны æмæ уæд хоргуыстгæнджытæн фенцондæр уыдзæн, сæ тыллæг æфснайдзысты рæстæгыл æмæ æнæсæфтытæй.
Картофы куыст æнцон нæу, фæлæ уыцы куыст дæр фæрогдæр уыдзæн, ацы культурæ кусынмæ чи бавнала, уыцы хæдзарадæн. Уыдзæн нæм, чи йæ тауа æмæ йын стæй йæ тыллæг чи æфснайа, ахæм техникæ дæр. Дæргъвæтин рæстæджы нæ зæхх нал æййафы æмбæлон куыст, хицæн бынæтты та раздæры дыргъдæтты бæлæстæ бахус сты. Цæмæй зæххы ахæм фæзуæттæ ногæй куыстгонд цæуой, зæхх асæрибар уа, ахæм бæлæстæй, уый тыххæй нæм уыдзæн æмбæлон техникæ. Ахæм бакуыстгонд зæххы уый фæстæ бæздзæн хъæууонхæдзарадон культурæтæ тауынæн. Ног техникæйæ ма республикæ ноджыдæр райсдзæн Беларусь трактортæн гутæттæ, иу трактор Т-150 йæ культиватортимæ, бульдозер, прессгæнæн æмæ æндæр ахæмтæ. Ног техникæйыл кусыныл нæ механизатортæ цæмæй фæхæст уой, стæй йын бахъуыды рæстæджы йæ цалцæг кæнын дæр зоной, уый тыххæй нæ механизатортæй Харебаты Аланы арвыстой Ставраполмæ иу къуырийы æмгъуыдмæ æмæ сахуыр кодта, йæ бæрны цы «Кировец» трактор ис, уый.
Æнæмæнг, райхъуысдзæн ног хъæууонхæдзарадон тех-никæйы æхцондæттæг хъæлæба нæ быдыртæй, зæхкусæджы хъаруджын фæллойы фæрцы дзы уыдзæн бæркад дæр.
ХУЫБИАТЫ Никъала
Comments are closed, but trackbacks and pingbacks are open.