31 майӕ 4 июнмӕ Хуссар Ирыстоны Уӕлвӕткон уавӕрты министрады минӕвӕрттӕ министр Гассеты Ибрагимы сӕргълӕудӕй хайад райстой Æдасдзинад ифтонггæнæг фӕрӕзты фӕдыл ӕхсӕнадӕмон салон «Комплексная безопасность -2023»-йы.
Уӕлвӕткон уавӕрты министры хӕдивӕг Санахъоты Руслан ӕмӕ планкӕныны фӕдыл хайады сӕргълӕууӕг Цхуырбаты Сергей Инфомаци ӕмӕ мыхуыры пресс-центры радзырдтой Мӕскуымӕ министрады ацы балцы фӕстиуджыты тыххæй.
Санахъоты Русланы ныхӕстӕм гӕсгӕ салоны хайад райстой 24 бӕстӕйы минӕвӕрттӕ. Ацы салоны базӕйыл бадзырдӕуыд, Уӕрӕсе ӕмӕ Хуссар Ирыстоны Уӕлвӕткон уавӕрты министрадты къухдариуӕггӕнджыты ӕдзух фембӕлдтытӕ уадзын.
«Хъарм, ӕмбаргӕ уавӕрты цы фембӕлд уагъд цыд, уым рӕгъмӕ хаст ӕрцыдысты проблемон фарстатӕ. Уӕрӕсейы Федерацийы Уӕлвӕткон уавӕрты ми-нистрады къухдариуӕгад ӕмбаргӕ ахаст равдыста нӕ министрады проблемӕтӕм. Рауӕрӕх ӕрцӕудзысты Уӕрӕсейы Федерацийы Уӕлвӕткон уавӕрты ахуыргӕнӕн уагдӕтты ӕмӕ ахуырадон центрты ахуыр кӕнын, материалон-техникон ӕмӕ медицинон ифтонгады фарстытӕ. Афтӕ ма серьезон хъусдард аздахын хъӕуы министрады штатон структурӕ фӕивын ӕмӕ кусджыты социалон ӕмвӕзад фӕбӕрзонддӕр кӕнынмӕ. Уый тыххӕй арӕзт ӕрцыд кусӕгон къорд ӕмӕ йæ куысты руаджы биноныг цӕудзысты сӕвзӕргӕ проблемон фарстытӕ», – дзырдта Руслан.
Æхсӕнадӕмон салоны фӕлгӕтты ма уагъд ӕрцыд рауӕрӕхгонд ӕмбырд, цыран хайад райстой Уӕрӕсейы Федерацийы губернатортӕ ӕмӕ Уӕлвӕткон уавӕрты министрады минӕвӕрттӕ Александр Куренковы сӕргълӕудӕй. Дзырд дзы цыд Æмбӕстагон хъахъхъӕнынады тыхтӕ ӕмӕ фӕрӕзты архайдыл арӕнгӕрон районты. Кӕй зӕгъын ӕй хъӕуы, хайад дзы райстой Хуссар Ирыстоны уӕлвӕткон уавӕрты министрады минӕвӕрттӕ дӕр.
Ацы аз ахуырӕй ӕрыздӕхдзысты цыппар курсанты
Хуссар Ирыстонӕй Уӕрӕсейы Федерацийы Уӕлвӕткон уавӕрты министрады уӕлдӕр ахуыргӕнӕндӕтты – Зынгсирвӕзты ныхмӕ паддзахадон службӕйы ӕмӕ Æмбӕстагон хъахъхъӕнынады академиты ахуыр кӕнынц нӕ курсанттӕ. Уыдонӕй ӕртӕ рауагъдоны ацы аз каст фæуыдзысты Æмбӕстагон хъахъхъӕнынады академи ӕмӕ иу та – Зынгсирвӕзты ныхмӕ академи.
Бӕстӕйы Уӕлвӕткон уавӕрты министрады минӕвӕрттӕ Мӕскуымӕ сæ балцы рӕстӕджы бабӕрӕг кодтой, нӕ курсанттӕ кӕм ахуыр кӕнынц, уыцы уӕлдӕр ахуыргӕнӕндӕттӕ. Куыд радзырдтой, уымӕ гӕсгӕ студенттӕ ахуыр кӕнынц хорз, сӕ физикон цӕттӕдзинад дӕр ис ӕмбӕлон ӕмвӕзадыл – уый сӕйраг у Уӕлвӕткон уавӕрты министрады кусӕгӕн.
Министрады планкӕныны фӕдыл хайады сӕргълӕууӕг Цхуырбаты Сергей куыд банысан кодта, уымӕ гӕсгӕ министрад ӕнгом куыст кӕны академитимӕ ӕмӕ йӕ хъус дары курсантты ахуыр ӕмӕ уагахастмӕ. Алы сессийы фӕстӕ дӕр информаци цӕуы министрадмӕ, нæй сæ рахъастгæнæн, сӕхи дарынц иттӕг хорз ӕмӕ сӕрыстырӕй хъахъхъæнынц нӕ республикӕ ӕмӕ министрады кад.
Уӕлвӕткон уавӕрты министрады минӕвӕрттӕ куыд банысан кодтой, уымӕ гӕсгӕ министрады хаххыл цы курсанттӕ ахуыр кӕнынц, уыдон фӕстӕмӕ сӕ ахуырӕй куы ӕрыздӕхой, уӕд ифтонг æрцӕудзысты куысты бынӕттӕй.
Цы нӕ фаг кӕны уагдонӕн?
Техникӕ сног кӕныныл дзырд куы цӕуа, уӕд, сӕйраджыдӕр, ифтонг хъуамӕ ӕрцӕуа ӕнӕпилотон тӕхӕн аппараттӕй. Уыцы фарстыл дӕр куыст цӕуы ӕмӕ нын ныфс бавӕрдӕуыд.
Агурӕн-ирвӕзынгӕнӕн отряд ифтонг у алыфарсонӕй специалисттӕй – хӕххон цӕттӕдзинадæй, хӕххон зӕйтæй ӕмӕ доны бын ирвӕзынгӕнджытӕй. Дӕлдондзогтӕ сӕм ис ӕхсӕнадӕмон къласы дӕснытӕ. Сты иттӕг хорз цӕттӕ, кусынц сӕ квалификаци ӕдзух бӕрзонддӕр кӕныныл.
Брифинджы рӕстӕджы ма дзырд цыд, астӕуккаг скъолаты ӕмвӕзадыл семинартӕ ӕмӕ лекцитӕ уадзыныл бӕрӕг уӕлвӕткон рӕстӕджы фыццаг рады куыд архайын хъӕуы, уыдæттыл.
Санахъоты Руслан куыд банысан кодта, афтӕмӕй нормативон документтӕм гӕсгӕ организацитӕ ӕмӕ уагдӕтты ӕмбӕстагон хъахъхъӕнынад ӕмӕ зынгсирвӕзты ныхмӕ ӕдас мадзӕлттӕ райсыны фӕдыл мадзӕлттӕ уагъд хъуамӕ цӕуой ӕрдӕг аз иу хатт. Ахæм ахуыртӕ уадзыны руаджы уагдоны персонал, скъолаты ахуыргӕнинӕгтӕ цайдагъ кӕнынц растдӕр уынаффӕ райсыныл уӕлвӕткон уавӕры цард ирвӕзын кӕныныл.
КЪÆБУЛТЫ Маринæ
