20 июлы Информаци æмæ мыхуыры паддзахадон комитеты пресс-центры уыд брифинг РХИ-йы Æнæниздзинад хъахъхъæныны министрады сæйраг терапевт, амбулаторон-поликлиникон центры къухдариуæггæнæг Санахъоты Тамарæ æмæ Тагъд æххуысы станцы сæйраг дохтыр Хъуылымбегты Емзарæн.
Коронавирусы пандемийы фыццаг уылæны рæстæджы, ома, ивгъуыд азы октябрь-ноябры Республикон бирæпрофилон медицинон центры баконд æрцыд исæн-сортировкæгæнæн хайад. Уырдæм исынц, гриппы æмæ вирусы нысæнттимæ температурæ кæмæ ис, уыцы рынчынты. Уым сæ басгарынц æмæ сбæрæг кæнынц, экстренон æххуыс кæнæ амбулаторон æгъдауæй хос кæнын кæмæн хъæуы, уыцы рынчынты.
Коронавирусы пандемийы фыццаг уылæны рæстæджы кæд хуссарирыстойнаг медиктæн æххуыс кодтой уæрæсейаг дохтыртæ, уæд ныр та сæ разылæууæг хæстæ æххæст кæнынц сæхи тыхтæй.
«Низы фыццаг уылæны рæстæджы нæм бирæ рынчынтæ цыд, фæлæ нын уæд баххуыс кодтой уæрæсейаг дохтыртæ, æрцыд нæм госпиталь. Ныр та архайæм нæхи тыхтæй. Цалынмæ коронавирусæй рынчынты нымæц не сбирæ ис, уæдмæ хайады куыстой иу дохтыр æмæ иу медицинон хойы, иу дохтыр та биоæрмæг иста», – загъта Санахъоты Тамарæ æмæ банысан кодта, зæгъгæ, ныр исæн-сортировкæгæ-нæн центр йæ куыст фæтыхджындæр кодта, кусы дзы медикты бригадæ.
1-æм июлæй рынчындоны исæн-сортировкæгæнæн хайад астæуккаг нымадæй бон райсы 50 адæймаджы. Хайады кусы 12 медицинон кусæджы, дыууæ дохтыр æмæ фараст медицинон хойы æххæст кæнынц алыгъуызон функцитæ, уыдонæй 5 адæймаджы пациенттæй исынц биоæрмæг ПЦР-тесттæн, дыууæ медицинон хойы анализы тыххæй исынц туг, дыууæ медицинон хойы кусынц дохтыртимæ, иу медрегистрацигæнæг та пациенттæн радты сæ анализты фæстиуджытæ. Исæн-сортировкæгæнæн хайад кусы, хуыцаубонæй дарддæр æрвылбон дæр, райсомы 9 сахатæй.
Хайады дохтыртæ рынчынты куы райсынц, уый фæстæ ацæуынц, хæдзæртты цы рынчынтæ ис æмæ температурæ кæмæ ис, уыдонмæ.
Санахъоты Тамарæ куыд радзырдта, афтæмæй Республикон бирæпрофилон медицинон центры исæн-сортировкæгæнæн хайадмæ 1-æм июлæй фæстæмæ бацыдысты 748 адæймаджы, 1094 адæймагæй райстой биоæрмæг, 131 хатты та уыдысты, хæдзæртты цы рынчынтæн хос кæнынц, уыдонмæ. Ныридæгæн дохтырты хъусдарды бын хæдзæртты хос кæнынц 250 адæймаджы, кæцытæ фæрынчын сты COVID-19-æй.
Сæйраг терапевт банысан кодта, зæгъгæ, æрвылбон дæр райсынц, коронавирусы низы бæрæггæнæнтæ æвæрццаг кæмæн сты, уыцы пациентты номхыгъд, уыдонмæ дохтыртæ телефонæй фæдзурынц æмæ сын раттынц æмбæлон рекомендацитæ.
Уый ма банысан кодта, зæгъгæ, кæд пандемийы фыццаг уылæны рæстæджы коронавирусы инкубацион рæстæг уыд дыууæ къуырийы, уæд ныр та у иу къуырийы бæрц.
Йæ ныхæстæм гæсгæ, низ ныр цырддæр темптæй парахат кæны. Æрвылбон дæр рынчынты нымæц фылдæрæй фылдæр кæны. Рынчындоны ис, коронавирусæй чи фæрынчын, ахæм сывæрджын сылгоймаг дæр, «ныртæккæ уый ис дохтырты хъусдарды бын». Ис ма, вакцинæ саразыны фæстæ чи фæрынчын, ахæм адæймæгтæ дæр, фæлæ, зæгъ, уыдон рог рынчынтæ сты».
Дарддæр куыд радзырдта, афтæмæй фылдæрæй фылдæр кæны, вакцинæ саразын кæй фæнды, уыдоны нымæц. Абоны бонмæ коронавирусы ныхмæ уæрæсейæг вакцинæ «Спутник V»-йы фыццаг компонент сарæзтой 702 адæймаджы, 308 адæймаджы та сарæзтой ацы вакцинæйы дыккаг компонент.
«Коронавирусæй цæмæй уæззау рынчын ма фæуай, уый тыххæй вакцинæ аразын кæй хъæуы, уый адæм бамбæрстой», – загъта сæйраг терапевт æмæ банысан кодта, зæгъгæ, вакцинæ чи саразы, уыдонæн лæвæрд цæуы сертификаттæ, цыран нысан сты препараты сери, дозæ æмæ номыр.
Амбулаторон-поликлиникон центры къухдариуæггæнæджы ныхæстæм гæсгæ, цæмæй коронавирусы ныхмæ вакцинацийы фæстæ цы сертификаттæ цæуы лæвæрд, уыдон нымад цæуой Уæрæсейы Федерацийы дæр, уый тыххæй Хуссар Ирыстоны Æнæниздзинад хъахъхъæныны министрады къухдариуæгад кусы Уæрæсейы Федерацийы Æнæниздзинад хъахъхъæныны министрадимæ.
«Мæнмæ гæсгæ нын нæ сертификатты бындурыл дæтдзысты уæрæсейаг сертификаттæ. Нырма ацы фарстыл куыст цæуы, фæлæ тагъд рæстæджы скъуыддзаг æрцæудзæн», – загъта Санахъоты Тамарæ.
Йæ рады Тагъд æххуысы станцы сæйраг дохтыр Хъуылымбегты Емзар радзырдта, йæ дæлбар куыстуат медикаменттæй куыд ифтонг у, уый тыххæй.
«Медикаменттæй хорз ифтонг стæм, ис нæм хи хъахъхъæнæн комбинезонтæ, халаттæ. Уыдис нын хи хъахъхъæнæн æрмкъухты дефицит, фæлæ уыцы проблемæ дæр скъуыддзаг æрцыд», – загъта Хъуылымбегты Емзар.
Кæд пандемийы фыццаг уылæны рæстæджы Тагъд æххуысы станц вазыгджын уавæрты куыста, уæд ныр та, сæйраг дохтыры ныхæстæм гæсгæ, куыст цæуы нормалон уавæрты.
«Фарон пандемийы ныхмæ тох кæнын вазыгджын уыд, уымæн æмæ медиктæ куыстой уæззау уавæрты, уымæй дæр низы ныхмæ куыд архайын хъуыд, уый бæрæг нæма уыд. Астæуккаг нымадæй-иу тагъд æххуысы службæмæ фæсидтысты бон сæдæйæ фылдæр хатты, æмæ физикон æгъдауæй мах куыстыл нал тых кодтам, уымæн æмæ уыцы рæстæджы вирусы тыххæй ницы уыд зындгонд. Фыццаг уылæны рæстæджы тагъд æххуысы дохтыртæ куыстой æнæ баулæфгæйæ фæндзгай суткæтæ. Ныр нæ куыст фенцондæр ис, уымæн æмæ базыдтам низы ныхмæ куыд архайын хъæуы, уый.
Йæ ныхмæ куыд тох кодтаиккам, уый мах нæ зыдтам, нæ зыдтам, рынчынты рынчындоны куыд схуыссын кодтаиккам, уый дæр. Ахæм уавæры æрмæст мах нæ уыдыстæм, ахæм уавæры уыдысты дунейы æндæр бæстæтæ дæр.
Цæмæй коронавирусы инфекци ма апарахат уа, уый тыххæй абоны бон кусæм дырыс планмæ гæсгæ. Кæд фыццаг уылæны рæстæджы тагъд æххуысы службæйы кусджытæн сæ 90 проценты фæрынчын сты коронавирусы инфекцийæ, уæд нæ кусджытæй ныртæккæ вирусæй ничи фæрынчын.
Хъуылымбегты Емзар æрсидт цæрджытæм, цæмæй чысыл температурæйы тыххæй рынчынтæ ма дзурой тагъд æххуысы службæмæ.
Уый куыд загъта, афтæмæй рынчыны температурæ 38 градусæй къаддæр куы уа, уæд гæнæн ис, фæдзура «тæвд хахмæ», кæнæ та æрбакæна фадыгон дохтыры, цæмæй йын æмбæлон консультаци радта.
«Цалынмæ рынчын ПЦР-тесттæ æмæ компьютерон томографи ма сараза, уæдмæ пациентты инфекцион рынчындон нæ исы, уымæн æмæ, гæнæн ис, пациент йæхи низæй дарддæр фæрынчын уа коронавирусы инфекцийæ дæр.
Дохтыртæ æрсидтысты цæрджытæм, цæмæй хъахъхъæной маскæты æмæ дистанцийы режим, уымæн æмæ бирæтæн низ æнæ симптомтæй вæййы æмæ иннæтыл æнцонтæй бахæцы.
ОСИАТЫ Индирæ
Comments are closed, but trackbacks and pingbacks are open.