Уæрæсейы мидхъуыддæгты министрады Воронежаг институты хуссарирыстойнаг 4-æм курсы курсанттæ практикон ахуыртæ рацыдысты РХИ-йы мидхъуыддæгты министрады бастдзинад, спецтехникæ æмæ автоматизацийы центры. Стажертæн сæ практикæ райдыдта 29 июны æмæ суанг 26 июлмæ сæ кусæгон ахуыры пъланмæ гæсгæ райсомы 9 сахатæй изæры 6 сахатмæ æххæст кодтой сæ кураторы хæслæвæрдтæ.
Курсанттæ сты æхсæзæй – дыууæ чызджы æмæ цыппар лæппуйы. Сæ дæсныйады профилтæ та сты – «Компьютерная безопасность», «Информационная безопасность телекоммуникационных систем» æмæ «Специальные радиотехнические системы». Практикон ахуырты къухдариуæггæнæг, Центры хистæр Сергей Акопов куыд зæгъы, афтæмæй практиканттæ æнувыдæй кусынц, ахуыр кæнынц, цымыдис кæнынц æмæ иттæг хорз æххæст кæнынц сæ разы æвæрд хæстæ.
«Æз райгонд дæн сæ зонындзинæдтæй, сæ практикæйы фæстиуджытæй. Æнцонтæй сæххæст кодтой æппæт хæслæвæрдтæ. Исты куы нæ фæзонынц, уæд уæндонæй бафæрсынц, зыны сыл, кæй сæ фæнды дæсны кусджытæ суæвын», – раппæлыд сæ Сергей Акопов.
Стажер Хъæцмæзты Хетæг тынг райгонд у йæ практикæйы къухдариуæггæнджытæй æмæ дзы цы зонындзинæдтæ райстой, уымæй.
«Мах уый æнхъæл нæ уыдыстæм æмæ ахæм цымыдисон уыдзысты нæ практикон ахуыртæ. Ам æввахсмæ базонгæ стæм сæрмагонд техникон фæлындæнтимæ, сæ куысты принциптимæ, интернеты æмæ радиойы бастдзинæдты системæтимæ. Фыццаг хатт нын уыдис ахæм практикон ахуыртæ. Фыццæгæм курсы дæр ма нын хъуамæ уыдаид практикæ, фæлæ нæ коронавирусон пандеми бахъыгдардта», – зæгъы Хетæг.
Практиканттæ сæ ахуырты базонгæ сты информаци æмбырдгæнæн æмæ иртасæн систе-мæтимæ, зианхæссæг компьютерон программæтимæ æмæ сæ хибахизыны амæлттимæ, æмбæхст информацион файлтæ сбæлвырд кæнын æмæ сын анализ саразыны сусæгдзинæдтимæ æмæ афтæ дарддæр.
ДЖИОТЫ Алыксандр
