Мидхъуыддæгты министрады дæлхæйттæн уагъд цæуынц практикон ахуыртæ табелон хæцæнгарзæй æхсынæй. Ныридæгæн уал Цхинвалы районы милицийы æмæ æнæведомствойон хъахъхъæныны управлениты рæнхъон сконд ацыдысты полигонмæ æмæ нысанмæ фехстой автомат Калашниковайæ. Семæ ма ацыдысты Мидхъуыддæгты министрады медикон-санитарон хайы кусджытæ дæр, цæмæй фыдбылыз æрцæуыны рæстæджы уайтагъд медицинон æххуыс бакæной.
Райдианы уал сын инструктортæ бафæдзæхстой, цæмæй сæрхизæн мадзæлттæ æххæст кæной æмæ æнæ командæйæ мацы аразой. Ӕхсгæ кодтой 100 метры дæрддзæфмæ лæугæйæ, уæрагыл бадгæйæ æмæ хуысгæйæ. Практикон мадзæлттæн хатдзæгтæ саразыны фæстиуæгæн рабæрæг ис, практикон ахуырты хайадисджытæ иууылдæр кæй сæххæст кодтой нормативтæ.
Табелон хæцæнгарзæй æхсынæй барадхъахъхъæнæг органты кусджытæ арæх рацæуынц ахæм фæлварæнтæ. Сæ фæрцы бæрзонддæр кæны милицийы кусджыты службæйон æмæ психологон цæттæдзинады æмвæзад. Дарддæр ведомствойы æппæт дæлхæйттæ дæр рацæудзысты ацы практикон ахуыртæ.
ДЖИОТЫ Алыксандр
Comments are closed, but trackbacks and pingbacks are open.