Иумæйаг информацион-координацион центры цы тир сарæзтой, уый эксплуатацимæ радтой æмæ ныр тыхон структурæтæн фадат ис практикон ахуыртæ уадзынæн. Ныридæгæн уал дзы райдыдтой тренировкæтæ уадзын Гæззаты Вадимы номыл милицийы сæрмагонд нысаниуæджы къорды кусджытæ.
Хæстон цæттæдзинады пъланы фæлгæтты ОМОН-ы кусджытæ тиры сæ арæхстдзинад равдыстой табелон æхсæнграз пистолетæй æхсынæй. Инструктор сын развæлгъау радзырдта æдасдзинады домæнтæ – цы нæй гæнæн аразын, куыд хъæуы архайын æхсæнгарзимæ æмæ афтæ дарддæр.
Спецкъорды кусджытæ алыгъуызон дистанцитæй дамбацайæ мысанмæ бахауынмæ архайдтой, къуындæг уавæрты – æдæрсгæ дзы фезмæлæн нæ уыд . Инструктор сын нымадта сæ бахардз кæныны рæстæг, цал нæмыджы фехстой, цал очкойы райстой, мысанмæ цал нæмыджы нæ бахаудта. Иууылдæр сæхи равдыстой иттæг цæттæ, æвзыгъдæй, æмæ сæ разы æвæрд хæстæ сæххæст кодтой бæрзонд æмвæзадыл.
Ӕхсæнгарзæй æхсынæй практикон ахуыртæ ахъаз сты милицæйы кусæджы хæстон цæттæдзинад фæбæрзонддæр кæнынæн. Ахæм мадзæлтты рæстæджы фæхуыздæр вæййы йе ‘взыгъддзинад, æндыгъд уавæрты йæ бон вæййы æхсæнгарзæй спайда кæнын.
Ацы тиры дарддæр сæ цæттæдзинад бæрзонддæр кæндзысты милицæйы иннæ дæлхæйттæ дæр. Уымæй уæлдай ма, ардæм цæудзысты республикæйы иннæ тыхон структурæты минæвæрттæ дæр.
Джиоты Алыксандр
