Йӕ гъӕдмӕ гӕсгӕ хорзыл нымад цӕуы, Цхинвалы районы Къостайыхъӕуы цы фыдӕлтыккон суадон ис, уый, цӕрджытӕ йӕ фырбуцӕн къоди хонынц. Уымӕ гӕсгӕ дзы пайда кӕнынц канд бынӕттон цӕрджытӕ нӕ, фӕлӕ ма горӕты ӕмбӕстӕгтӕ ӕмӕ фӕндаггонтӕ дӕр. Ӕнӕмӕнг, цӕстуарзонӕй дын ӕдзухдӕр уырдыг чи лӕууа, уымӕ адӕймаг тынгдӕр хъуамӕ раздаха йе ‘ргом ӕмӕ йын аргъ дӕр кӕна. Фӕлӕ фӕстаг цалдӕр азы ацы суадонмӕ бынтондӕр йӕ хъус ничиуал дары ӕмӕ ис антисанитарон уавӕры, сындз-къутӕртӕ йӕ алфӕмбылай ӕрбынат кодтой. Суадоны раз арӕзт уыд цалдӕр бетонгонд тӕгӕнайы, уыдонмӕ хӕццӕ кодта дон ӕмӕ уыцы донӕй та пайда кодтой цӕрджыты фос. Фӕлӕ уый кӕйдӕрты зӕрдӕмӕ нӕ фӕцыд ӕмӕ сӕ сыджытӕй байдзаг кодтой. Кӕмӕндӕр, дам, йӕ бӕндӕн иу дагъӕй не ‘ххӕссыд ӕмӕ йӕ дыдагъ кодта. Афтӕ ӕрцыд иу рӕстӕджы ацы суадоныл дӕр, уӕд та йын йӕ иу хай раздӕры дзулфыцӕнмӕ уагътой, фӕлӕ сын дзы ницы рауад. Къорд азты размӕ нӕ республикӕйы разамынд аскъуыддзаг кодта, йӕ гъӕд иттӕг хорз кӕмӕн уыд, ахӕм дон Рустауы хъӕуӕй ӕруадзын ӕмӕ уыцы куыст ӕххӕст дӕр ӕрцыд. Фӕлӕ уӕлӕнгай арӕзт кӕй ӕрцыд, уымӕ гӕсгӕ дзы пайда кӕнын райдыдтой, доны хахмӕ цы ӕввахс хъӕутӕ уыд, уыцы цӕрджытӕ ӕмӕ дзы Къостайыхъӕумӕ иу цъыртт дӕр нал рацыд. Уӕд та районы цӕрӕнуатон-коммуналон хӕдзарад бацархайдта ӕмӕ хъӕуы сӕрмӕ сзынын кодта дон, уым ӕвӕрд ис егъау цистернӕ, куы байдзаг вӕййы, уӕд ӕй бонцухӕй рауадзынц куы иу уынгмӕ, стӕй та – ӕндӕрмӕ. Ацы донӕн та йӕ гъӕд у мӕгуырау ӕмӕ дзы пайда кӕнынц ӕрмӕстдӕр хардзӕн. Цӕвиттон, лабораторон анализ ӕй фенын кодта, ацы дон нуазынӕн кӕй нӕ бӕззы, уый.
Афтӕ ӕмӕ нуазыны доны фарст Къостайыхъӕуы нырма кӕронмӕ нӕу скъуыддзаг ӕмӕ уый фӕстиуӕгӕн цӕрджытӕ ӕвзарынц зындзинӕдтӕ.
Хуыбиаты Никъала
Comments are closed, but trackbacks and pingbacks are open.