Цхинвалы районы администрацийы сӕргълӕууӕг Мамытаты Вахтъанг ӕмӕ цӕрӕнуатон-коммуналон хӕдзарад (йӕ хистӕр Хъотайты Барис) ӕппӕт амӕлттӕй дӕр архайынц хъӕууон цӕрджыты домӕнтӕ ӕххӕст кӕныныл. Хъӕууон адӕймаджы аудинӕгтӕ та дзӕвгар сты. Уӕддӕр иууыл ахсджиагдӕртыл нымад сты нуазыны дон, фӕндӕгтӕ ӕмӕ уыцы ӕмӕ ӕндӕр скъуыддзаггӕнинаг фарстатӕ ӕрбӕстон кӕныныл куыстӕуы.Зӕгъын хъӕуы, районы ӕмбӕлон хӕдзарад дзӕвгар кусы ацы ӕнӕмӕнгхъӕуӕг хъуыддӕгтӕ ӕвӕрццагӕй ахицӕн кӕныныл, фӕлӕ дзы уӕддӕр разыны ног бакӕнинаг куыстытӕ дӕр. Цӕвиттонӕн сисӕм Къостайыхъӕу, ам хӕдзарад рагӕй архайы нуазыны донӕй бынӕттон цӕрджыты домӕнтӕ сӕххӕст кӕныныл, фӕлӕ дзы уӕддӕр нырма ис иуӕй-иу проблемӕтӕ. Хъотайы фырт куыд загъта, уымӕ гӕсгӕ ма хъӕуы амӕйразмӕ бацархайдтой доны ног гуырӕн ссарыныл, уый сын ӕнтысгӕ дӕр бакодта. Фӕлӕ дзы нырма пайдагӕнӕн нӕй, кӕронмӕ арӕзт кӕй нӕу кусӕн техникӕйы цухдзинады аххос, уымӕ гӕсгӕ. Хӕдзарад йӕ хъусдард аздӕхта хъӕууон хосгӕнӕн уагдӕттӕ фӕткмӕ ӕркӕнынмӕ ӕмӕ йын ӕнтысгӕ дӕр бакодта. Зӕгъӕм, Бихъары хъӕуы амбула-тори ӕрцыд цалцӕггонд, уагъд ӕм ӕрцыд нуазыны дон, раивтой йын йӕ асин, бахи-зӕны та мӕнгагъуыст сарӕзтой. Сарабучъы фельдшерон-акушерон пункт дӕр уыд мӕгуырау уавӕры ӕмӕ йӕ хъуыд ӕмбӕлон ӕгъдаумӕ ӕркӕнын. Уым арӕзтадон-цалцӕггӕнӕн куыстытӕ бакодтой иууылдӕр, йӕ алфӕмбылай йын ӕрӕмбонд кодтой, ӕрбӕстон кодтой канализацион системӕ дӕр. Арӕзтадон-цалцӕггӕнӕн куыстытӕ ма бакодтой Къостайыхъӕуы хосгӕнӕн амбулаторийы иу хатӕны дӕр. Дменисы хъӕуы цыппархатӕнон агъуысты дӕр кусынц кусджытӕ, уымӕн йӕ уӕлхӕдзары фӕзуат ӕдӕппӕт у 300 квадратон метры ӕмӕ йӕ агъуындыны куыст фӕуыдзӕн ацы ӕввахс бонты. Бакӕндзысты ма дзы ӕндӕр куыстытӕ дӕр.
Сӕххӕст Гудзабары хъӕуы цӕрджыты домӕн дӕр, уым та аразджытӕ куыстой канализаци аразыныл. Зын уыд ацы фарст ӕрбӕстон кӕнын дӕр, иуӕй сӕ тынг къуылымпы кодта техникӕйы цухдзинад, стӕй хатт мӕгуырау боныгъӕдтӕ дӕр хъыгдардтой куыстытӕ афоныл ӕххӕст кӕнын ӕмӕ йыл уый аххосӕй бахъуыдысты 3 мӕйы. Ацы куыстыты фӕстӕ хъӕуы уынгтӕ сты антисанитарон уавӕры ӕмӕ адӕм зындзинад ӕвзарынц. Фӕлӕ уыцы фарст дӕр ӕрбӕстон уыдзӕн хӕдзарады кусджыты руаджы. Канализацийы фарстыл дзырд кӕм ӕрхауд, уым ма Хъотайы фырт бафиппайдта, ацы фарст кӕй аскъуыддзаг кӕндзысты Ногхъӕуы дӕр. Уым та канализаци арӕзт ӕрцӕудзӕн дыууӕ уынджы ӕмӕ йӕ дӕрддзӕг уы-дзӕн иу километрӕй фылдӕр. Уымӕй дарддӕр ма лигъдӕтты хъӕуы дӕр сараздзысты канализацион системӕ 1,5 км дӕрддзӕгӕн ӕмӕ йӕ баиу кӕндзысты Шанхайы районмӕ. Ӕр-мӕст уыцы куыстытӕ ацы бынаты бакӕндзысты фидӕнмӕ.
Куыстӕуы хъӕуӕй хъӕумӕ ӕмӕ бынӕтты фӕндӕгтӕ аразыныл дӕр. Зӕгъӕм, Дменисӕй Сатихъары хъӕумӕ цалцӕггонд ӕрцыд фӕндаг 800 метры бӕрц, уым ныккалдтой хуыр ӕмӕ йӕ слӕгъз кодтой. Уымӕй уӕлдай ма Дменисы хъӕуы бынӕттон фӕндаг иу киллометры дӕрддзӕгӕн ӕрцыд цалцӕггонд. Сатихъарӕй Наниаурийы хъӕумӕ дӕр аразджытӕ бакодтой хъазуатон куыст ӕмӕ дзы сырӕзт хӕрзарӕзт фӕндаг 1 км ӕввахс. Ӕххӕст кӕны Галуанты хъӕуы цӕрджы-ты домӕн дӕр нуазыны донӕй, уым амӕйразмӕ хӕдзарады кусджытӕ сзынын кодтой дон ӕмӕ дзы пайда кӕнынц цӕрджытӕ. Фӕлӕ зӕгъын хъӕуы, ацы хъӕуы цӕрджытӕ фылдӕр сты зӕрӕдтӕ ӕмӕ, йе нӕниздзинадӕй чи хъаст кӕны, ахӕмтӕ. Уымӕ гӕсгӕ йӕ хъуамӕ хъӕумӕ феввахсдӕр кӕной.
ХУЫБИАТЫ Никъала
Comments are closed, but trackbacks and pingbacks are open.