18-æм июны Цхинвалы киноконцертон зал «Чермен»-ы фойейы цытджын æгъдауæй байгом хуссарирыстойнаг æвзонг нывгæнджыты равдыст «Цхинвал 5». Равдыст баст у Уæрæсейы бонимæ. Ам сæрмагондæй æвæрд æрцыдысты Дзæгъиаты Альбинæ, Саулохты Георги Дзигойты Каринæ æмæ Кокойты Марияйы куыстытæ, кæцытæн аргъгæнæг уыдысты сæ аивадæн табугæнджытæ. Уыдонæн сæ куыстытыл зыны сæ курдиат æмæ сæ тырнындзинад аивады бæрзæндтæм. Куыстытæ сты хицæн æмæ хицæн темæтыл. Нывгæнджытæ дзы, зæгъæм, æвдисынц райгуырæн бæстæйы рæсугъддзинад, йæ алæмæтон æрдз, йæ урссæр хæхты æмæ афтæ дарддæр. Банысан кæнын хъæуы уый, æмæ ацы æвзонг курдиæттæ кæй сты нæ горæты Колыты Аксойы номыл Аивæдты лицейы раздæры рауагъдонтæ.
Бæрæгбонон равдыст сорганизаци кодтой Республикæ Хуссар Ирыстоны «Россотрудничество»-йы минæварад Сергей Скворцовы сæргълæудæй.
Равдыстмæ фæуазæг сты нæ республикæйы Культурæйы министр Зассеты Жаннæ, Хуссар Ирыстоны Уæрæсейы Федерацийы æххæстбарджын минæвар Марат Кулахметов æмæ РХИ-йы Ахуырад æмæ зонады министр Гасситы Натали.
Культурæйы министр Зассеты Жаннæ йæ раныхасы фыццаджыдæр бузныджы ныхæстæ загъта «Россотрудничество»-йæн, ахæм равдыст кæй сорганизаци кодтой æмæ аивадмæ сæ хъусдарды сæраппонд. Афтæ ма банысан кодта, культурæ æмæ аивадæн æхсæнадон царды егъау нысаниуæг кæй ис æмæ сæ кæддæриддæр размæ кæнын кæй хъæуы. «Алкæцы нывыл дæр зыны зæрдæйæ конд кæй сты, æвзæрын кæнынц цымыдис æмæ мæ бузныг зæгъын фæнды куыд нывгæнджытæн сæхицæн, афтæ ма сæ чи цæттæ кодта æмæ сын аивад чи бауарзын кодта, сæ уыцы ахуыргæнджытæн дæр. Махмæ бирæ курдиатджын фæсивæд ис æмæ сæ стæм сæрыстыр», – банысан кодта культурæйы министр.
Нывгæнджытæн ма сæ равдысты тыххæй арфæйы ныхæстæ загътой «Россотрудничество»-йы минæварады къухдариуæггæнæг Сергей Скворцов, РХИ-йы ахуырад æмæ зонады министр Гасситы Натали æмæ æндæртæ.
Мадзалмæ æрбацæуджытæ зылдысты нывтыл, зонгæ кодтой курдиатджын авторты æрмдзæ-фимæ.
Нæ уацх.
Comments are closed, but trackbacks and pingbacks are open.