Хъӕууон цӕрӕджы экономикӕйы рӕзтмӕ хауынц фосдардӕй райсгӕ ӕфтиӕгтӕ дӕр ӕмӕ уыцы къабаз райтынг кӕнынмӕ стыр хъусдард здахынц ацы куыстыл лӕуд куыстуарзаг фӕллойгӕнджытӕ. Куыд раздӕр азты, афтӕ ныр дӕр ацы зын, фӕлӕ ахсджиаг куыстмӕ бӕрнон цӕстӕй чи кӕсы, уыдонӕн фылдӕр кӕнынц сӕ райсгӕ ӕфтиӕгтӕ. Фӕлӕ фосдард ӕмӕ сӕ продуктивондзинады рӕзт фылдӕрбӕрцӕй баст у се ‘нӕниздзинадыл. Уыцы ахсджиаг куыстмӕ та хорз хъусдард чи здахы, уыдоны нымӕцмӕ хауы Цхинвалы районы ветеринарон службӕ дӕр, сӕйраг ветеринарон дохтыр Дудайты Ефимы разамындӕй. Дудайы фырт куыд банысан кодта, афтӕмӕй ацӕугӕ азтимӕ абаргӕйӕ, фӕкъаддӕр фыстӕ ӕмӕ сӕгъты нымӕц. Уый хыгъд сӕм стуртӕ нымадӕуы 3700. Ветеринарон службӕйы архайд здӕхт у алыгъуызон низты ныхмӕ фосӕн судзинтӕ аразын ӕмӕ сын уый ӕнтысгӕ дӕр кӕны. Цӕвиттон, амӕйразмӕ «Тъбет»-ы фермерон хӕдзарады стуртӕй систой анализ рӕуджыты, бруцеллез ӕмӕ ӕндӕр низтӕ рабӕрӕг кӕныны тыххӕй. Зӕрдӕ барухс, ацы фермерон хӕдзарады фос иууылдӕр ӕнӕниз кӕй сты,уымӕй. Уый та ныфс дӕтты, сӕ ӕркӕнгӕ продукци кӕй у гъӕдджын ӕмӕ дзы уымӕ гӕсгӕ фӕлхасгӕнджытӕн ис уӕй кӕныны бар. Хорз уавӕры ис , Ирыхъӕуы цы фосдарды фермӕ ис, уый дӕр.
Абоны онг службӕйы цы хостӕ ис, уыдон сын фаг сты дыууӕ мӕйӕн, стӕй сӕ уӕдмӕ сифтонг кӕндзысты ӕндӕр ӕмӕ ӕндӕр низты ныхмӕ хостӕй. Ацы аз дӕр веткусджыты раз лӕууы дзӕвгар куыстытӕ бакӕныны хæс. Эмкар, фадниз, пастереллез ӕмӕ ӕндӕр низты ныхмӕ вакцинатӕ фӕхъӕуы ӕхсӕз мӕйӕ ӕхсӕз мӕймӕ ӕмӕ уыцы ӕнӕмӕнгхъӕуӕг куыстытӕн нӕй аргъӕвӕн. Стуртыл ма фӕзыны тӕппалниз дӕр, сӕ буар иууылдӕр рафады, сцъутхӕлттӕ вӕййы. Адӕймагыл нӕ хӕцы, фӕлӕ дзы фӕрынчын вӕййынц куыд стуртӕ, афтӕ сӕгътӕ ӕмӕ фыстӕ дӕр. Уымӕ гӕсгӕ ветеринарийы фельдшертӕ бакодтой хъаруджын куыст ӕмӕ фосы фылдӕр хайӕн арӕзт ӕрцыд судзинтӕ. Фӕлӕ зӕгъын хъӕуы, иуӕй-иу цӕрджытӕ, куыд Дменисы хъӕу, сӕ фосӕн нӕ бауагътой судзинтӕ аразын алы ӕфсӕнттӕй. Цалдӕр азы размӕ районы дӕр фӕзынд хуыты африкӕйаг емынӕ ӕмӕ дзы дзӕвгар хуытӕ фӕцагъды сты. Зӕгъын хъӕуы, ацы вирусӕн кӕй нӕй вакцинӕ, фӕлӕ уӕддӕр службӕйы кусджытӕ бакодтой хъаруджын куыст низ фесафыны тыххӕй. Уымӕ гӕсгӕ ныр дыууӕ азы ацы низ нал фӕзынд ӕмӕ уый та фадат радта хуыдарды куыст райтынг кӕнынӕн. Цӕрджытӕ хатынц, цӕмӕй сын бар лæвæрд æрцæуы хуыты фермерон хӕдзарад сӕндидзын кӕны-нӕн.
Ветеринарон службӕйы кусджытӕ ацы бонты хъуамӕ ацӕуой Зары хъӕумӕ, цӕмӕй сбӕрӕг кӕной, уым хуытыл цы низ кӕй фӕзынд, уый. Сисдзысты анализтӕ, арвитдзысты сӕ лабораторимӕ ӕмӕ уыдон сбӕлвырд кӕндзысты низ, уый фӕстӕ йӕ ныхмӕ райдайдзысты вакцинатӕ аразын. Районы хъӕууон цӕрджытӕ ма тынг тыхсынц алыгъуызон хъӕддаг сырдтӕй дӕр. Уыдон фосмӕ лӕбурынц, стӕй сыл куы фӕхӕцой, уӕд тӕссаг у ӕрранизӕй. Ацы хъуыддагыл дӕр куыстӕуы, Леуахийӕ фалӕмӕ бынӕтты калынц ӕмбӕлон хос ӕмӕ бирӕгъ кӕнӕ ӕндӕр тугдзых сырд хӕдзарон фосыл куы фӕ-хӕца, уӕд низӕй нал фӕрынчын уыдзӕн.
Ӕнтыстыты ӕмрӕнхъ Дудайы фырт банысан кодта, сӕ кусджыты куыстӕн ӕмбӕлон уавӕртӕ кӕй нӕй, уый дӕр. Ветфельдшерӕн хъуамӕ уа, йӕ дзаумӕттӕ кӕм раива, хостӕ кӕм бафснайа ӕмӕ ӕндӕр ахӕмты тыххӕй сӕрмагонд хатӕн, фӕлӕ уыдонӕй иууылдӕр сты цух. Хъӕуы сӕ сӕхи сӕрмагонд транспорт, цӕмӕй ветслужбӕйы кусджыты къорд сӕрибарӕй ацӕуа иу кӕнӕ иннӕ хъӕумӕ фосӕн ӕмбӕлон ӕххуыс бакӕныны сӕраппонд.
Хуыбиаты Никъала
Comments are closed, but trackbacks and pingbacks are open.