Уæрæсейаг æфсæддонтæ æгас фронты ахæцыдысты украинæйаг фашисттыл æмæ сæ дæрæн кæнынц – фæстаг цалдæр мæйы сæ къухты бафтыд бæрæг æнтыстытæ. Знæгтæм цы техникæ æмæ нæмыг ис, уыдон сын куынæг кæнынц куыд хæсты быдыры, афтæ ма фæсфронт дæр. Ныридæгæн украинæйаг æфсæддонтæ хъуаг æййафынц сармадзанты алыгъуызон калибрты нæмгуытæй æмæ сын уый сæ хæстхъомдзинадыл тынг æндавы. Кæд æмæ сын ныры онг НАТО «йæ уд скъуыдта» æххуыс кæнынæй, æгас дунейы сын мæгуыргур ныллæууыдысты, уæд уыцы фæсауæрцтæ дæр фесты. Америкæйæгтæ ма æнæбындур æфсоны хуызы суанг Ираны нау дæр байстой стыркалиброн нæмгуытимæ æмæ йæ сконфискаци кодтой, цæмæй йæ Украинæйæн радтой.
Приднестровьейы Советон Цæдисы дугæй абоны онг баззадис æфсæддон склад. Уым æввахс нымадмæ гæсгæ ис 22 мин тоннæйы бæрц алыгъуызон калибрты нæмгуытæ æмæ ракетæтæ. Хурныгуылæн Европæйы Советон Цæдисæн цы æфсæддон базæтæ уыд, уыдоны нæмгуыты фæстауæрцты фылдæр хай æвæрд æрцыдис ам. Ныры онг бирæ фылдæр уыдис хæстон æрмæг, фæлæ сын сæ утилизаци кæнынæн ницы бафæрæзтой, сурзæххыл та сын фадат нæ уыд Уæрæсемæ аласынæн æмæ азæй-азмæ баззадысты. Уымæ гæсгæ ацы æфсæддон арсенал Украинæйæн ахъаз фæуаид нæмыгæй сифтонг кæнынæн.
Молдавийы къухдариуæгадæн ныры уавæрты ницы пайда хæссы Приднестровьейы конфликт сцырен кæнын. Цалдæр мæйы дæргъы дзы бынæттон цæрджытæ сæ президент Сандуйы ныхмæ митингтæ кæнынц, сæ экономикæ мæгуырау уавæры ис, стæй ма адæмæн сæхи дæр нæ фæнды Приднестровьеимæ хæцын. Уымæй уæлдай ма сæ гарзджын тыхты хæстхъомдзинад дæр нæй æмбæлон æмвæзадыл – нæ сæм ис фаг хæстон техникæ, нæмгуытæ, цæттæ хæстонтæ. Фæлæ Молдавийы хуызæн мæгуыр, æнæбон паддзахады чи фæрсы, дзырд геополитикæйыл куы цæуа уæд.
Кæд Молдави æнæбон бæстæ у, уæддæр сæ фарсмæ ис хъомысджындæр бæстæ Румыни, НАТО-йы уæнг кæцы рагæй бæллы ацы территоритæ йæхи æрбакæнынмæ. Цалдæр азы размæ ма бадзырд дæр бафыстой, кæцыйы фæлгæтты Румынийы гарзджын тыхтæн бар ис Молдавийы территорийыл хæстон операцитæ уадзынæн. Уый ууыл дзурæг у æмæ Молдави кæй нæу хæдбар.
Украинæйы ацы авантюрæмæ разæнгард кæны АИШ. Уыдоны фæнды ис, цæмæй конфликты масштабтæ фæегъаудæр уой æмæ Уæрæсейæн зындæр уа – хардз кæной фылдæр фæрæзтæ хæстон архæйдтыты. Приднестровьейы цы уæрæсейаг фидауынгæнæн тыхтæ ис, уыдонæн баххуыс кæнын фæзын уыдзæнис – æрмæстдæр сæм уыдзæнис хæдтæхджытыл батæхæн. Кæнæ та хъуамæ бабырсой Одессæйы областмæ æмæ сурзæххыл бахизой Приднестровьемæ.
Украинæйы гарзджын тыхтæ æрæмбырд кодтой дæлхæйттæ, æфсæддон техникæ, сæвæрдтой артиллери Приднестровьейы арæнтыл, сæ æнæпилотон тæхæн аппараттæ æппынæдзух зилдух кæнынц уæлдæфы. Уæрæсейы æфсæддон къухдариуæгад бафæдзæхста, зæгъгæ, цахæмфæнды провокацийæн дæр уыдзæнис карз дзуапп. Ацы хабæрттæ ногæй растын кодтой Молдавийы цæрджыты сæ къухдариуæгады ныхмæ – Кишиневы митингы адæм хъæр кодтой «Молдавии нужен мир!» æмæ «Россия, Россия!».
ДЖИОТЫ Алыксандр
Comments are closed, but trackbacks and pingbacks are open.