Абоны бон бирæ бæстæтæ «ныссагътой» сæ ныхтæ Уæрæсейы. Уавæрæй пайда кæнгæйæ, аразынц алыгъуызон цаммардзинæдтæ æмæ цъыф калынц канд Уæрæсейы разамынадыл нæ, фæлæ ма Уæрæсейы цæрæг нацитыл дæр. Ахæм хæрамдзаст бæстæты хсæнæй цалдæрæй хицæн кæнынц сæ уæлдай «хъыхъхъаг» ахастæй. Уыдонæй иу у Польшæ, кæцы нырма дæр æххæст паддзахадыл нымад нæу, афтæмæй йæхи хъомысджын бæстæты æмрæнхъ æвæрынмæ хъавы.
Польшæйы цæрæг адæмæн фыдæлтæй фæстæмæ Уæрæсейы лæггæадтæ бæсты никуы фæцыдысты. Æввахс рæстæджытыл куы дзурæм, уæд æрмæст Дыккаг дунеон хæсты 500 мин сырхæфсæддонæй фылдæр фæмардис Польшæйы территори фашисттæй асыгъдæг кæнгæйæ. Уымæй уæлдай ма сын хæсты фæстæ азты Советон Цæдис бакодта егъау экономикон æххуыстæ, кæцытæ ахызтысты бирæ миллиард сомтæй. Фæлæ «куыдзы гуыбыны — хъуыр-хъуыр». Æгæрыстæмæй ма ныридæгæн Уæрæсейæ æрдомдтой репорацитæ Дыккаг дунеон хæсты фæстиуæгæн, ома сымах аххосæй баййæфтам уыйбæрц зиæнттæ. Бынтон сæ сæры зæндтæ фæцыдысты.
Абоны бон Польшæ йæ гарзджын тыхтыл хардз кæны егъау æхцайы фæрæзтæ. Сæ экономикæ кæд раууатмæ æрхаудис, æппынæдзух Евроцæдисы «фæсдуар» «мæгуыргур» лæууынц, уæддæр сæм се фсадæн алцыдæр вæййы. Æмæ сын уыцы фæрæзтæ та самал кæнынц англосакстæ, кæцытæ тынг хорз зонгæ сты поляккæгты амбицитимæ — егъау, тыхджын паддзахад саразынимæ. Польшæйы политикты бæллиц рагæй фæстæмæ у сæ паддзахад «денджызæй денджызмæ» саразын, ома Балтиаг денджызæй Сау денджызмæ. Ахæм проекты фæстиуæгæн дунейы картæйæ, иууылкъаддæр, хъуамæ фесæфа ныгуылæн Украинæйы территори. Англосакстæ иттæг хорз психологтæ сты, зонынц æй поляккагтæ æнцон фæсайæн кæй сты. Уымæ гæсгæ сын стыр ныфысытæ æвæрынц, уырнын сын æй кæнынц «номдзыд» наци кæй сты Европæйы æмæ сæ ныры мæгуырау уавæры Уæрæсе кæй сты аххосджын. Комкоммæ зæгъгæйæ сæ куыйтау ардауынц Уæрæсейыл.
Бирæнымæц НАТО-йаг æфсæддонтæ абоны бон ис Польшæйы территорийыл æмæ азæй-азмæ фылдæр кæнынц. Уыимæ иумæ ма сæхи гарзджын тыхты хъомысад дæр фылдæр кæны. Пъланмæ гæсгæ 2035 азмæ сæ нымæц хъуамæ схиза 250 минмæ. Стæй ма дзы ноджы уыдзæнис территориалон хъахъхъæнынады тыхтæ дæр — 50 мины бæрц. Афтæмæй Польшæйы æфсад суыдзæнис иууыл егъаудæр Европæйы. Æмæ сæ кæй ныхмæ цæттæ кæнынц англосакстæ? Кæд æмæ ныридæгæн миллиардгай евротæ Уæрæсейы ныхмæ пропагандæйыл хардз кæнынц æмæ Европæйы бæстæты цæрджытæн æрвыл уысм дæр «æмбарын» кæнынц, ома уæм хурыскæсæнæй «æртхъирæн кæнынц», уæд кæй ныхмæ хæцдзысты Польшæйы фсад, уый дызæрдыккаг нæу.
Польшæйы гарзджын тыхтæ практикон ахуыртæ цæуынц реалон хæстон уавæрты Украинæйы. Куыд райхъуысы, афтæмæй поляккаг æфсæддонтæй ныры онг Донбассы фæмардис 10 мин хæстоны бæрц. Фæлæ уыцы зиæнттыл Польшæй къухдариуæгад хъæцы — англосакстæ сын «царциаты» диисаджы паддзахад саразынæй бавæрдтой ныфс æмæ 10 мин адæймаджы цы сты ахæм бæллицы цур. Афтæмæй та сыл æрцæудзæнис Украинæйы ми — сайдæй та сыл разилдзысты æмæ сæ ныры паддзахад дæр нал фæуыдзæнис. Диссаг уый у æмæ сыл сæ историйы ахæм сæйдтытæ цалдæр хатты æрцыдис, фæлæ сæ рæдыдтытæй хатцæгтæ иу хатт дæр нæ сарæзтой.
Украинæйы кой куы кæнæм, уæд англосакстæн ацы проект хъуыдыгонд уыд 70 азы размæ. Советон дуджы рæстæджы дæр сæ пропагандæ нæ мынæг кодта — сусæгæй сын сæ хъуыдыкæнынад зыгъуыммæ кодтой, ардыдтой сæ уырыссæгтыл. Ӕмæ сын кæд скæсæн хайы территорийыл уыйбæрц æнтыстытæ нæ уыдис, уæд ныгуылæн хайы цæрджытæн уыйбæрц бакодтой, æмæ уырыссаг нацийæ сæ удхæссæг уынын райдыдтой. Ацы агрессивон пропагандæйæн æвдисæнтæ сты, ныгуылæн Украинæйы æфсæддон службæ чи хаста Советон дуджы, уыдон. Амеркæйаг проект «Украинæ» экспертты хъуыдымæ гæсгæ йæ тыхы бацыд 2004 азы евромайданы фæстиуæгæн. Фæлæ адæмы фылдæр хай Уæрæсейы рдæм кæй уыдысты æмæ президентæй Януковичы кæй равзæрстой, уый тыххæй англосаксты бахъуыд граждайнаг хæст расидын. Уымæн æмæ, пъланмæ гæсгæ, Украинæйы территори æгасæй хъуамæ æрцыдаид хицæнгонд Уæрæсейы æндæвдадæй, Хъырымы æрдæксакъадахы уæрæсейаг æфсæддон мауал хъуамæ уыдаид. Англосакстæн сæ бæллиц у, цæмæй Хъырымы æрæвæрой сæ æфсæддон базæтæ. Фæлæ сын сæ фæндтæ сæ «хъуыры фæбадын кодта» Путин.
Польшæ та ныр 200 азæй фылдæр англосакстæн у «санитарон кардон» Уæрæсейæ Европæйы хсæн, æмæ йæ территори цас егъаудæр уа, уыйбæрц сын стырдæр æндæвдад уыдзæнис Европæйы. Уæрæсе ресурстæй æххæст у æмæ Европæйы хъомысджын бæстæты технологитимæ куы баиу уоиккой, уæд, æвæццæгæн, æгас дуне контроль кæниккой. Уыцы хъуыддаг англосаксты нæ фæнды æмæ æппынæдзух архайынц, цæмæй Уæрæсемæ хæрамдзаст уой европæйаг бæстæтæ. Историктæ куыд сбæлвырд кодтой, афтæмæй Напалеоны дæр уыдон «сардыдтой» Уæрæсейыл — уæды рæстæджы Уæрæсейы импери æмæ Францæн уыд тынг æнгом ахастытæ æмæ англисæгты «марг» æвзагæй знæгтæ фестадысты. Ӕниу англисæгтæн уый сæ туджы ис, фыдæлтæй фæстæмæ сын ардауæн æвзаг ис. Ирландийы баззад ахæм ныхас — кæд æмæ дæ сыхæгты хылгæнгæ фенай, уæд дзы æнæмæнг кæцыдæрмæ уазæгуаты уыд англисаг.
Фыццаг дунеон хæсты размæ та Уæрæсе æмæ Герман бангом сты æмæ та сæ цыбыр рæстæгмæ знæгтæ фестын кодтой. Англосаксты фæндыд Уæрæсейæ сæхицæн калони скæнын æмæ дзы сарæзтой революции уæйгæнæг Ленины фæрцы. Уыцы хъуыддаг сæ къухты куы нæ бафтыд, уæд Германы сæргълæууæгæй сæвæрдтой Гитлеры, кæцы фæстæдæр тугуарæн ныккодта æгас Европæйы. Дыккаг дунеон хæстæй иууыл фылдæр фæпайда кодтой англосакстæ — абоны онг дæр контроль кæнынц æгас Европæйы континенты æмæ ма дунейы бирæ бæстæты.
Ӕппæт ацы процессты Польшæ æппынæдзух уыд активон архайæг — кусæг тыхæй æххæст, хæстонтæ дзæвгар, сæры зонд мæгуырау. Англосакстæн ахæм адæмыхаттæй «фæсдзæуинтæ» саразын зын нæ уыд æмæ ма абон дæр поляккагтæ æххæст кæнынц æппæт барамындтæ. Ӕрæджы Польшæ æрдомдта Германæй репарацитæ Дыккаг дунеон хæсты фæстиуæгæн. Кæй зæгъын æй хъæуы, Герман иу сом дæр нæ бафиддзæнис æмæ поляккаг политиктæ дæр тынг хорз æмбарынц уыцы хъуыддаг. Ам дзырд цæуы англосаксты пъланыл, кæцыты фæнды Евроцæдис ныппырх кæнын. Ныры кризисы рæстæджы Герман, Франц æмæ æндæр европæйаг бæстæты фæнды сæ тыхтæ æрбаиу кæнын, цæмæй сæ экономикæтæ бынтон раууатмæ ма æрхауой. Англосакстæ та Польшæйы марионеткæты фæрцы архайынц Европæйы бæстæты æрлæмæгъ кæныныл, цæмæй фидæны дæр сæ дæлбар уой.
Англосакстæ Польшæйæн ныфсытæ æвæрынц, ома уын баххуыс кæндзыстæм ныгуылæн Украинæйы территоритæ æрбайсынæн. АИШ-ы фæрцы Зеленский бар радта, цæмæй поляккæгтæн Украинæйы территорийыл уа бынæттон цæрджыты хуызæн бартæ. Уый та ууыл дзурæг у æмæ цыбыр рæстæгмæ ныгуылæн Украинæйы территориты кæй «æлдариуæг» кæндзæнис Польшæ. Ныридæгæн дæр полякæгтæ активонæй æлхæнынц Украинæйы ныгуылæн хайы уæвæг заводтæ, фабрикæтæ æмæ æппæт хъæууонхæдзарадон куыстуæттæ. Уадзынц дзы агрессивон пропагандæ — бынæттон цæрджытæн уырнын кæнынц, ома уын уырыссæгты уæлдай махимæ хуыздæр уыдзæнис. Уыимæ ма иумæ сæхи рæвдз кæнынц хæстон архæйдтытæм дæр.
Польшæйæн ис пълан ныгуылæн Украинæйы территори бацахсыны тыххæй. Сæ хъуыдымæ гæсгæ уалдзæджы Украинæйы æфсадæн ныхмæ фæлæууын йæ бон нал уыдзæнис æмæ поляккаг æфсæддонтæ сæрибарæй бахиздзысты йæ территоримæ. Уый фæстæ сæ фæнды референдумтæ ауадзын Донбассы регионтау. Куыд уынæм, афтæмæй англосакстæ Польшæйæ хъавынц хæстмондаг бæстæ саразынмæ. Поляккæгтæ ныридæгæн цин кæнынц, ома нæ паддзахад рæзы, хъомысджын кæны. Фæлæ, фыццаджыдæр, Польшæйы паддзахад уæвынад кæндзæнис æрмæстдæр иу нысанæн — фидæны хъуамæ схæцой Уæрæсеимæ.
ДЖИОТЫ Алыксандр
