«Цæрæн пункт «Питомник»-ы цы ног хæдзæрттæ ис, уырдæм дæс боны æмгъуыдмæ уагъд æрцæудзæнис электроэнергийы хæххытæ»-ныфс дæтты Паддзахадон унитарон куыстуат «Энергоресурс»-ы генералон директор Къæбысты Ацæмæз.
Фыццаг хæдзæрттæ Шанхайы микрорайоны сæрмæ быдыры фæзындысты 2000-æм азты. Ам раздæр уыд Талахъомылгæнæндон. Райдианы дзы, Æхсæнадæмон Сырх Дзуары комитет чысыл хæдзæрттæ сарæзта лигъдæттæн. Уый фæстæ та дзы сарæзтой сæхи тыхтæй адæм дæр, æмæ уый адыл сырæзт ног цæрæн пункт. Хъыгагæн, хæдзæрттæм коммуникацитæ уагъд нæй, се’мбисмæ та электроны рухс дæр. Фыццаг цы хæдзæрттæ сырæзт, уыдонæн. Сырх Дзуары комитет сæвæрдта чысыл трансформатор. Ногæй цы хæдзæрттæ сырæзт, уыдонмæ та бауадзын хъæуы ног электрохæххытæ. Цæрджытæ тынг тыхстысты ацы уавæрæй æмæ коллективон фыстæг ныффыстой Президентмæ. Уый фæдыл сæм 13-æм июлы фæуазæг Гаглойты Алан. Йемæ ма уыд «Энергоресурс»-ы сæргълæууæг Къæбысты Ацæмæз дæр. Цæрджытæ сæ проблемæтæ радзырдтой Президентæн «Нæ хæдзæрттæн нæй адрестæ. Нæ нæм фæкомынц такситæ. Тагъд æххуысмæ куы фæдзурæм, уæд куыд бамбарын кæнæм, кæдæм бацæуой, уый нæ фæзонæм. Алкæмæн дæр нæ ис иу адрес – «Питомник». Уæлдай æгуыдзæг уавæры у не ссæуæн фæндаг. Зымæджы бонты нæ, фæлæ ма нæм сæрд дæр зын цæуæн у».
Фембæлды рæстæджы Президент цæрджытæн бамбарын кодта «Питомник»-ы зæххытæ Цхинвалы районы дæлбар кæй сты, æмæ комкоммæ уыдон кæй хъуамæ скъуыддзаг кæной ацы фарстытæ. «Энергоресурс»-ы разамонæгæн та бардзырд радта, цыбыр æмгъуыдмæ æнæ рухс хæдзæрттæм электроны хæххытæ бауадзыны тыххæй. Иннæ фарстатæ дæр цадæггай скъуыддзаг кæй æрцæудзысты, уыцы ныфс бавæрдта цæрджытæн Гаглойты Алан.
