Уæрæсейаг парламентон делегацийы уæнгтæ ма знон фембæлдысты Хуссар Ирыстоны Парламенты сæрдары хæдивæг Гасситы Петримæ. Уый бузныджы ныхæстæ загъта уæрæсейаг делегацийы минæвæрттæн сæ балц æмæ æххуысы тыххæй. Банысан кодта, уый ирд æвдисæн кæй у нæ æфсымæрон хæларадон ахастытæн. Мах, зæгъгæ, стыр ныфсытæ бæттæм ацы балцыл, куыд æхсæнпарламентон къамисы куысты фæлгæтты, афтæ Хуссар Ирыстоны цы уавæр сæвзæрд, уымæ æмбаргæ ахаст æвдисыны тыххæй. Ныфс бавæрдта, уæрæсейаг уазджыты балцы фæстæ Хуссар Ирыстоны Парламенты кæй æрбæстон уыдзæн æмбæлон куыст.
УФ-йы Федерацийы Советы Дунеон хъуыддæгты фæдыл комитеты сæрдар Константин Косачев ныфс бавæрдта хуссарирыстойнаг Парламенты куыст сæндидзын кæнынæй. Уымæн æмæ куыст фæкъуылымпы иуæй пандемийы рапарахатæй, аннæрдыгæй та республикæйы сæвзæргæ уавæры фæстиуæгæн. Йæ ныхæстæм гæсгæ, ныртæккæ ахсджиаг у, æмæ æппæт тыхтæй дæр хъуамæ æрæвналæм, цæмæй нæ парламентон æмгуысткæнынад æххæст гуырахстæй сæндидза.
Делегацийы скондыл дзургæйæ, Косачев банысан кодта, зæгъгæ, йæ уæнгтæ æнгом архайд кæнынц Хуссар Ирыстон æмæ Уæрæсейы ‘хсæн æхсæнпарламентон æмгуыстад рæзын кæныны фарстытыл.
Делегацийы сæргълæууæг йемæ æрхаста, 2008 азы октябры мæйы къухтæ цы сразыдзинадыл æрфыстæуыд, уый. Уыцы сразыдзинады уацты æвдыст ис нæ æмгуыстады мидис – кæрæдзийæн ахъазгæнæг экономикон бастдзинæдтæ фидар кæнын, адæмæн ахсджиаг культурæйы, ахуырады æмæ æндæр фадгуыты контакттæ рауæрæх кæнын.
Йæ ныхæстæм гæсгæ, сразыдзинадмæ гæсгæ хъæуы РХИ æмæ УФ-йы ‘хсæн закъондæттынад гармонизаци кæнын. Æмæ уыцы куыст ничи бакæндзæн парламентаритæй дарддæр. Уый у дыууæ бæстæйы ‘хсæн ахастыты ахсджиаг элемент. Уый тыххæй арæзт æрцыд æхсæнпарламентон æмгуысткæнынады фæдыл къамис дæр. Константин Косачевы ныхæстæм гæсгæ, аивгъуыйгæ азты уый куыста эффективонæй. Йæ фæстаг рабадтæн арæзт ис лæмбынæг суагъæ, цыран бæрæг нысан у 2020 азы куыстæн лæмбынæг план.
«Уыцы планы фылдæр хай нырма нæу реализацигонд. Уый у перспективæйы нæ архайды дарддæры программæ. Ногæй нæ ницы хъæуы æрымысын, фæлæ хъæуы æрбадын æмæ иумæ бакусын. Уæрæсейаг фарс уымæ цæттæ у, нæ балцы сæйраг нысаниуæг дæр уый у – нæ хуссарирыстойнаг коллегæтæ дæр цас цæттæ сты куыстмæ, уый базонын. Ныртæккæ Парламенты политикон тыхты æхсæн цы æнæразыдзинад сæвзæрд, уый бæстæ æмæ адæмы интерестæй бæрзонддæр ма хъуамæ уа», – дзырдта уый.
Хуссар Ирыстоны коллегæтимæ бадзурын æмæ размæ цæуынæн хъæуы Хуссар Ирыстоны Парламенты нормалон куыст. Уый у дыууæфарсон æмгуыстады ахсджиаг инструмент æмæ хъуамæ архайа æххæст гуырахстæй. Уымæйдæр хуссарирыстойнаг здæхты ис федералон закъæттæ, кæцыты хъæуы уæлæмхас куыст. Уыдон сты Хъахъхъæнынады министрад æмæ Мидхъуыддæгты министрадтæй кармæ гæсгæ кæй æрвитынц, уыдонæй сахъатджынтæ чи сты, уыдоны тыххæй закъон.
Константин Косачевы ныхæстæм гæсгæ план цæуы ацы сразыдзинад ратификаци кæныныл, уый фæдыл ис лæмбынæг архайды план. Фæлæ уый ратификаци хъуамæ æрцæуа дыууæфарсонæй.
Гасситы Петр ныфс бавæрдта уæрæсейаг коллегæты нысаниуæгджын балцы фæстиуæгæн, куыд æхсæнпарламентон къамисы фæлгæтты, афтæ уавæр дæр цæхгæр кæй фæивдзæн æмæ конструктивон куыст биноныг кæй æрцæудзæн.
Нæ уацх.
Comments are closed, but trackbacks and pingbacks are open.