Ныхас – Ялтæйы V æхсæнадæмон экономикон форумы тыххæй

Информацион агентад «Спутник»-ы уагъд æрцыд радон брифинг, нæ республикæйы Информаци æмæ мыхуыры паддзахадон  комитеты сæрдар Хъотайты Марияйы хайадистæй. Брифингмæ хуынд æрцыд Республикæ Хуссар Ирыстоны Президенты Администрацийы сæргълæууæджы фыццаг хæдивæг Джуссойты Алан. Ныхасы сæйраг темæ уыд, ныртæккæ Ялтæйы цы V æхсæнадæмон экономикон форум уагъд цæуы, уый фæдыл.

Республикæ Хуссар Ирыстоны делегаци Президент Бибылты Анатолийы сæргълæудæй хайад исы, егъау экономикон æмæ политикон нысаниуæг кæмæн ис, уыцы форумы. Брифингы райдианы Джуссойты Алан фехъусын кодта, зæгъгæ, ныртæккæ Ялтæйы цæуæг V æппæтдунеон экономикон форумæн цы егъау нысаниуæг ис, уый бандавдзæн нæ республикæйы цардыл дæр. Йæ ныхæстæм гæсгæ,  ацы форумæн ис куыд экономикон, афтæ политикон нысаниуæг дæр. Йæ нысан у, цæмæй  Хъырыммæ зынгæ политиктæ æмæ бизнесментæ æрцæуой æмæ сæхæдæг суой æвдисæнтæ, Республикæ Хъырымы территори оккупацигонд кæй нæу, æмæ дзы йе ‘мбæстæгтæ кæй цæрынц сабыр æмæ хорз уавæрты. Джуссойты Алан куыд фехъусын  кодта, афтæмæй нæ республикæйы Президент стыр хъусдард здахы канд социалон нæ, фæлæ ма  æддагполитикон фарстатæм дæр. «Зæгъæм, аивгъуыйгæ аз нæ республикæйы Президентæн уыд бирæ хъуыддагон балцтæ, куыд Уæрæсейы Федерацимæ, афтæ фæсарæйнаг бæстæтæм дæр. Уыцы балцты рæстæджы фадат вæййы, цæмæй нæ республикæйы тыххæй дзурæм алыгъуызон политикон фæзуæттыл. Адæм нæ хъуамæ базоной æмæ нæ хъуамæ хъусой», – банысан кодта Джуссойты Алан.

Брифингы рæстæджы уæлдай хъусдард здæхт æрцыд продукцийы экспорт æмæ инвесторты нæ республикæмæ æрбаздахыны фарстамæ. «Кæй зæгъын æй хъæуы, алкæцы кондады рæзт дæр дæтты ног куысты бынæттæ. Ныфс мæ ис, æмæ Республикæ Хъырымы дарддæр дæр цы экономикон проекттæ æххæст цæудзысты, уыдоны нæ республикæ дæр хайад кæй исдзæн.  Нæ республикæйы экономикон рæзты перспективæты фарстатæм нæ Президент дары уæлдай хъусдард. Ныртæккæ Ялтæйы цы форум уагъд цæуы, уый ууыл дзурæг у, æмæ Уæрæсейы Федераци егъау хъусдард здахы канд Хъырымы Республикæмæ нæ, фæлæ ма уыцы паддзахадтæм, кæцытæ сты Уæрæсейы партнертæ», – фехъусын кодта Джуссойы фырт.

Йæ ныхæстæм гæсгæ, стыр нысаниуæг ис, æмгуыстады фæдыл алыгъуызон барадон документтыл къух фыст кæй æрцыдис, уымæн, уыдоны ‘хсæн 2019-2022 азты Сразыдзинады реализацийы планыл къух бафыст кæй æрцыд, уый.

Уый куыд загъта, афтæмæй Хуссар Ирыстон йæ сæны продукци æрвитдзæн ахæм бæстæтæм, кæцытæ цæттæ сты йæ балхæнынмæ. Йæ хъуыдымæ гæсгæ, нæ республикæйы нуазыны дон ис тынг бирæ, æрмæст хъæуы йæ рауагъд æрбæстон кæнын æмæ йæ  уый фæстæ егъау горæттæм æмæ бæстæтæм ласын. «Нæ республикæйы тынг æнтыстджынæй рæзынц нуазыны донæй пайда кæныны здæхтытæ. Ныртæккæ хъæуы сæ нымæц фылдæр кæнын, агурын хъæуы партнерты æмæ йæ хъæуы реализаци кæнын. Нæ республикæйы æмæ Хъырымы Республикæйы сæргълæуджытæ банысан кодтой, зæгъгæ, Хъырымы Республикæйы алцы дæр у стабилон æмæ дзы ис инвестицитæ бавæрæн. Ацы фæндагыл хъуамæ цæуа нæ республикæ дæр», – банысан кодта Джуссойты Алан.

Йæ ныхæстæм гæсгæ, историон факттæ дзурæг сты ууыл, æмæ Стыр Фыдыбæстæйон хæсты Хъырымы сæрыл тохы рæстæджы фæмард сты тынг бирæ ирæттæ. «Керчь æмæ Цхинвал кæй систы æфсымæрон горæттæ, уый æнæнхъæлæджы хъуыддаг нæу. Уымæн æмæ горæт Керчы сæрыл бирæ ирон туг ныккалд. Æмæ Стыр Уæлахизы бæрæгбоны къæсæрыл ацы къахдзæф у раст æмæ тынг хорз. Рох кæнын нæ хъæуы уый дæр, æмæ Хъырымы кæй цардысты нæ рагфыдæлтæ – скифтæ. Уыдонæн уыд сæхи ‘хца, денджызон флот, хъахъхъæд æрцыдысты кургантæ. Кæй зæгъын æй хъæуы,  рох кæнын нæ хъæуы скифаг сыгъзæринты дæр. Мæнмæ   тынг диссаг кæсы уый,  æмæ нæ  археологтæ цæмæннæ исынц хайад абоны онг Хъырымы къахæггæгты», – банысан кодта Джуссойты Алан.

ТАНДЕЛАТЫ Виленæ