2017 азы кæрон Цхинвалы Республикон рынчындоны эксплуатацимæ лæвæрд æрцыд операцион-хирургион корпус. Уым бынат рахицæн кодтой гемодиализы центрæн дæр. Æмæ кæд хирургион-операцион хайад уайтагъд скуыста, уæддæр гемодиализы лæггæдтæ кæй хъæуы, уыцы рынчынты бахъуыд æнхъæлмæ кæсыны сæр.
Ныртæккæ нæ горæты ис 20 пациенты, кæцытæн хъæуы гемодиализы процедурæтæ аразын. Уыдон нырмæ æмбæлон медицинон æххуыс райсынмæ цыдысты Цæгат Ирыстонмæ. Уыцы медицинон хæрдзтæ æмæ фæндаггаджы аргъ рынчынтæн лæвæрдта паддзахад. Ныр нæхимæ фæзынд, уыцыиу рæстæджы цыппар пациентæн ахæм процедурæтæ кæм аразой, уый. Аппараттæй сæ иу у резервон, пайда дзы цæудзæн æрмæстдæр экстренон цауты рæстæджы.
Гемодиализы хайады нын куыд загътой, афтæмæй йæ уыргтæй чи тыхсы, ахæм рынчынтæ къуыри æртæ бон цыдысты Цæгат Иры республикон рынчындонмæ æмæ уым арæзтой гемодиализ. Уыдонæн Хицауад æххуыс кодта 20 мин сомы æрвылмæй дæр. Диализы процесс у тынг вазыгджын. Цы хостæ хъæуы, уыдон дæр сты зынаргъ. Хъуыд специалист, кæцы хъуамæ рацыдаид сæрмагонд ахуыр ацы ифтонгадтыл бакусыны тыххæй. Ныр уыцы фарстатæ официалонæй скъуыддзаг æрцыдысты æмæ иу къуырийы бæрц рынчынтæ сæхицæн хос кæнынц бынаты.
Республикон бирæпрофилон медицинон уагдоны сæргълæууæг Кокойты Маирбеджы ныхæстæм гæсгæ гемодиализы центр саразыныл Хицауад рагæй архайдта. Ам цы сæрмагонд аппараттæ ис, уымæй дарддæр хъуыд, цæмæй центр аразгæйæ цы арæзтадон æрмæджытæй пайда цыд, уыдон уыдаиккой гъæдджын. Æрмæджыты куы уыдаид зиан-хæссæг буарадтæ, уæд уыдон уæлдæфимæ иумæ æндæвтаиккой рынчынты æнæниздзинадыл. Уымæй дарддæр ма техникон фарстытæм дæр уыд хъусдард.
Ныр гемодиализ аразынмæ цæуынц 8 пациенты. Иннæтæ бæрæг аххосæгтæм гæсгæ Цæгат Ирыстонæй нæма æрыздæхтысты. Фæлæ сæ хиуæттæ куыд зæгъынц, афтæмæй уыдон дæр ног къуыри æрцæудзысты æмæ бынаты араздзысты гемодиализ.
УАЗÆГТЫ Марфа
Comments are closed, but trackbacks and pingbacks are open.