Нæ горæты Æвзонг техникты станц кусы бирæ азты дæргъы æмæ техникæмæ цымыдисгæнæг ахуырдзау фæсивæды скъолайы ахуыры æдтейæ хотыхджын кæны сæрмагонд зонындзинæдтæй. Ардæм сывæллæттæ цæуынц стыр цымыдисимæ, иуæй дзы хорз зонындзинæдтæ кæй исынц, уый тыххæй æмæ иннæмæй та ныртæккæ ахуыр кæнынæн кæй фæзындис æмбæлон уавæртæ. Ацы ахуырадон уагдон дæр 2008 азы хæстон архайдтыты рæстæджы тынг бахъыгдард, фæлæ цалдæр азы размæ бындуронæй цалцæг æрцыд æмæ ивгъуыды проблемæтæ иуварс æрцыдысты.
Ацы ахуырадон уагдоны ис æндæр æмæ æндæр къордтæ, цыран фæсурокты 250 скъоладзау райсынц ног зонындзинæдтæ, кæцытæ стæй, практикон æгъдауæй равдисынц сæ бацæттæгонд мадзæлтты республикон æмвæзадыл.
Ныртæккæ станцы куыст куыд цæуы æмæ сæм дарддæр цы плæнттæ ис, уый тыххæй нын радзырдта ацы уагдоны ног директор Къалаты Нариман. Станцы директор куыд радзырд-та, афтæмæй сæ сæйраг хæс у, цæмæй ардæм цæуой фылдæр æвзонг лæппутæ æмæ чызджытæ æмæ исой æмбæлон зонындзинæдтæ. Цæмæй фылдæр сывæллæттæ æрбахонæм нæ ахуырадон уагдонмæ, уый тыххæй нæ ахуыргæнджытæ æрвылаз дæр ног ахуыры азы райдианы азилынц скъолатыл куыд горæты, афтæ районты дæр æмæ сын бамбарын кæнынц станцы куысты нысан æмæ дзы цавæр къордтæ ис, уый. Афтæ æрæмбырд кæнæм æрыгон чызджыты æмæ лæппуты. Сывæллæттæ куы фæцайдагъ вæййынц сæ ахуырыл, уæд уыдон сæ тæлмæнтæ фæдзурынц се ‘мбæлттæн, сæ къласæгтæн æмæ нæм афтæмæй семæ æрбакæнынц ног ахуыргæнинæгты», – зæгъы Къалаты Нариман.
Нæ республикæйы Ахуырад æмæ зонады министрады хъæппæрисæй Æрыгон техникты станцы баконд æрцыд робототехникæйы къорд, цæмæй, æндæр горæттау, нæ республи-кæйы сывæллæттæ дæр зонгæ кæной нырыккон техникæимæ.
«Робототехникæйы къорд байгом кодтам ног ахуыры азы, фæлæ роботтæ балхæдтам нырма цалдæр мæйы размæ. Цымыдисон цæмæй сты: ис сæрмагонд конструктор æмæ йæ хъуамæ сæмбырд кæнай. Фыст ын цæуы компьютерон программæ æмæ афтæмæй робот кусы удæгас принциптæм гæсгæ. Йæ арæзт у автоматикон. Иугæр куы скусы, уæд йæ разы, развæлгъау бацæттæгонд программæмæ гæсгæ, æвæры алыхуызон хæстæ æмæ сæ æххæст кæны. Уый сывæллæттæм æвзæрын кæны стыр цымыдис æмæ йæм бирæтæ цæуынц зæрдиагæй. Ацы ногдзинадимæ сывæллæтты зонгæ кæны, бирæ азты куысты фæлтæрддзинад кæмæ ис, уыцы ахуыргæнæг Плиты Инал. Ацы къорды кабинет у ифтонг, фæлæ йæ дарддæр дæр ног кæндзыстæм æмбæлон æмæ хъæуæг ифтонггæрзтæй», – зæгъы Нариман.
Æрæджы станцы кусджытæ уыдысты Цæгат Ирыстоны техникон центр «Квантори»-йы. Уый, кæй зæгъын æй хъæуы, ифтонг у зынаргъдæр техникæйæ æмæ дзы куыст дæр цæуы уæрæхдæрæй. Æмæ ныр директоры бæллиц у, цæмæй сæм уа нырыккондæр робототехникæ æмæ сывæллæттæ æмдзу кæной нырыккон технологиимæ.
Нариманы ныхæстæм гæсгæ сæ сæ цæгаттаг коллегæтæ хорз райстой, ауагътой сын мастер-къластæ. Уыимæ сæхимæ фæхуыдтой сывæллæтты дæр æмæ сæ акæндзысты сæ ахуыргæнджытимæ. Робототехникæйæ дарддæр ма станцы ис ахæм къордтæ, куыд арæхстджын къухтæ, хъæдæрмæджы куыст, электротехникæ, математикæ, компьютерон класс 3 D моделтæ аразæн, хъæдæрмæгыл нывæфтыдтæ аразæн æмæ æндæр ахæмтæ.
Уагдоны директор райгонд у, ахуырады министрадæй сæ ахадæн æххуысы, сæ проблемæтæ скъуыддзаг кæныны æдзух сæ фарсмæ кæй вæййынц, уый тыххæй.
Уый ма куыд радзырдта, афтæмæй сæм фылдæр кусынц пенсион кары чи ис, ахæм ахуыргæнджытæ. Ис дзы цалдæр æвзонг ахуыргæнæджы дæр, фæлæ директоры катайы æппары ацы ахуыргæнджыты чи раива, уыцы дæсны специалисттæ сæм кæй нæй, уый.
Раздæр станцы уыдис радиокружок, фæлæ 15 азы бæрц нæ куыста. Ныр сæм фæзындис, ацы хъуыддаг хорз чи зоны, ахæм специалист æмæ сывæллæттæн уадзы ахуыртæ. Ацы кабинет дæр цадæггай ифтонг кæнынц æмбæлон техникæйæ.
Уымæй дарддæр ма станцæн къордтæ ис Дзауы астæуккаг скъолайы, Цхинвалы скъола-интернаты æмæ дæсæм астæуккаг скъолайы. Сæ куыст сын абæрæг кæнынц станцы разамынад æмæ куы бахъæуы, уæд сæ фарсмæ æрбалæууынц æмæ сын раттынц æмбæлон амындтытæ.
Станцæн ис йæхи сæрмагонд автомашинæ æмæ сын уый сæ къух рог кæны – горæты дæрдтаг скъолатæй станцмæ æрбаласынц сывæллæтты.
Хицæн къордты ахуыргæнинæгты къухæй цы дзаумæттæ рацæуынц, уыдон аив кæй рауайынц, уымæ гæсгæ сын сæ æлхæнгæ дæр бакæнынц.
ЦХУЫРБАТЫ Ларисæ
Comments are closed, but trackbacks and pingbacks are open.