Ныртæккæ Республикæ Хуссар Ирыстоны Фæсарæйнаг хъуыддæгты министрады куыст æмæ архайд здæхт у дунеон аренæйы йæ хайадисты географи уæрæх кæнынмæ. Бæстæйы æддагон политикæ бæлвырд кæны бæстæйы сæргълæууæг, ацы министрад та практикон æгъдауæй реализаци кæны, республикæйы къухдариуæгад кæуыл кусы, уыцы дипломатон æмæ политикон фадæттæ. Раздæр куыст цы бастдзинæдтыл цыд, уыдон ногæй æндидзыд æрцыдысты, агуырд цæуы ног хæлæрттæ, ног контакттæ.
Куыд зонæм, афтæмæй Фæсарæйнаг хъуыддæгты министр Медойты Димитр æмæ горæт Цхинвалы администрацийы сæргъ-лæууæг Коцты Алан уыдысты Италийы. Уымæй дарддæр, ацы министрад 29 майы цы ахсджиаг цау фехъусын кодта Республикæ Хуссар Ирыстон, Сирийы Арабаг Республикæ æмæ Абхазы Республикæ кæй банымадтой кæрæдзийы хæдбардзинад æмæ минæварадты æмвæзадыл кæрæдзиимæ масштабон дипломатон ахастытæ саразынвæнд кæй кæнынц, уый тыххæй.
Ацы ахсджиаг æмæ æхсызгон цауты фæдыл Медойты Димитрæн уыд брифинг республикæйы информацион фæрæзты минæвæрттимæ. Æддагполитикон ведомствойы сæргълæууæг уал ирон дипломатийы боны цытæн арфæ ракодта хуссарирыстойнаг дипломаттæн, нæ бæстæйы дипломатон службæйы ветерантæн. Куыд банысан кодта, уымæ гæсгæ нын ацы аз зæрдæвæрæны мæй хъæздыг уыд нысаниуæгджын цаутæй. Æрдзырдта, 29 майы паддзахадон хæдбардзинад расидыны Акт райсыны бон нысан кæнын нæ къухты куыд бафтыд, ууыл. Уæд, зæгъгæ, горæт блокадæйы уавæрты уæвгæйæ, Парламенты бæстыхайы бункеры æрæмбырд сты депутаттæ æмæ ауагътой РХИ-йы Уæлдæр Советы уæлвæт-кон сесси æмæ бæстæйы æмбæстæгты æдасдзинад ифтонг кæныны нысанæн расидтысты хæдбардзинады Акт.
Уымæй размæ Зары фæндагыл цы æбуалгъ трагеди æрцыд – сабыр цæрджыты куы ныццагъдæуыд, æдзух нæ ныхмæ хæстон архæйдтытæ, æппæт уыцы цаутæ фыццаг сæвзæрст Парламенты депутатты сразæнгард кодтой ацы историон Акт райсынмæ, кæцы ссис нæ паддзахаддзинады бындур. Уæдæй фæстæмæ райдыдта нæ бæстæйы æндæр истори, кæцы къорд азты сæрты мах æркодта Уæрæсейы Федерацийы æрдыгæй нæ паддзахадон хæдбардзинад банымайынмæ. Уый фæстæ нын нæ хæдбардзинад банымадтой къорд бæстæтæ уыцы нымæцы ИНО-йы хайадисæг бæстæ-тæ хайадисджытæ дæр.
Италимæ балцы фæдыл дзургæйæ, Медойты Димитр банысан кодта, Римы кæй уæвынад кæны Хуссар Ирыстоны Фæсарæйнаг хъуыддæгты министрады офис. Уыдонимæ нын ис æдзухон бастдзинад, уырдыгæй цы фæндæттæ, хъуыдытæ ис, уыдонмæ здæхт цæуы лæмбынæг хъусдард. Уымæй дарддæр æддагполитикон уагдоны офисæн бастдзинад ис, Италийы чи цæры, чи ахуыр кæны, уыцы ирæттимæ.
Ацы аз уалдзæджы райдианы Итали фæндон æрбавдыста, Цхинвал æмæ Градары горæтты æхсæн бастдзинæдтæ биноныг кæныны фæдыл. Медойты Димитр куыд банысан кодта, уымæ гæсгæ куыст цæуы цалдæр æмвæзады – цы бæстæты кусынц, уым æхсæнпад-дзахадон æмæ æхсæнпарламентон контакттæ бæстон кæнын, политикон партитæ æмæ æхсæнадæмон организациты ‘хсæн бастдзинæдтæ аразын.
«Нæ минæвæртты куысты фæстиуæгæн цымыдисдзинад сæвзæрд италиаг горæт Градаримæ ахастытæ биноныг кæныны фæдыл. Ацы горæтимæ ахастытæ райтынг кæныны фæндондзинад уыд нæ дзуапп », – дзырдта министр.
Италийы райгондæй сæмбæлдысты не ‘мзæххонтыл. Балцы программæ йемы-дзаг уыд мадзæлттæй – официалон фембæлдтытæ, культурон программæтæ. Градары администрацийы уагъд æрцыд баныхæстæ æмæ бафыст æрцыд Сразыдзинад. Сразыдзинадмæ гæсгæ горæты хæдзарад, экономикæ, культурон фадгуыты дыууæ горæтты администрацитæ кæндзысты æмгуыстад. Уымæй дарддæр дыууæ горæт хайад исдзысты ахсджиаг мадзæлтты, уадздзысты тымбыл фынгтæ æмæ кæрæдзимæ цæудзысты Хуссар Ирыстон æмæ Градары фæсивæдон организациты делегацитæ. Уый уал у æмгуыстады райдиан.
Медойты Димитр сæрмагондæй банысан кодта, Сразыдзинад бафыст кæй æрцыд дыууæ æвзагыл – ирон æмæ италиаг.
Коцты Алан æрхуыдта йæ коллегæйы Хуссар Ирыстонмæ. Уымæ гæсгæ италиаг горæты делегаци бабæрæг кæндзæн нæ бæстæйы.
Сириимæ биноныг æрцыд
историон цау
Сириаг Арабаг Республикæимæ дипломатон ахастытæ биноныг кæныны фæдыл куыст цыд фæстаг цалдæр азы. Медойты Димитр куыд банысан кодта, уымæ гæсгæ ма Уæрæсейы Хуссар Ирыстоны Æххæстбарджын минæвар куы уыд, уæддæр сын уыд хорз ахастытæ Сирийы минæварадимæ. Мæскуыйы Сирийы минæваримæ арæх æмбæлдысты алыгъуызон мадзæлтты. Фæстаг фембæлд сын уыд Санкт-Петербурджы экономикон форумы, цыран бæстæйы сæргълæууæг Бибылты Анатоли ноджыдæр фембæлд Мæскуыйы Сирийы минæваримæ æмæ æруынаффæ кодтой идеятæ реализаци кæныны амæлттыл. Уымæй размæ дæр Бибылты Анатолийы сæргълæудæй уагъд æрцыд ноджы иу фембæлд Хуссар Ирыстоны делегацийæн. Уым дæр дзырд цыд дыууæфарсон ахастыты фарстытыл.
«Уыцы ахастыты фæстиуæгæн 29 майы нæ бæс-тæйы историйы æрцыд ахсджиаг цау. Хуссар Ирыстоны адæм райзæрдæйæ сæмбæлдысты Сирийы хи-цауады уынаффæйыл. Уымæй нæ бæстæты ‘хсæн райтынг сты сæрмагонд ахастытæ, кæцытæ уы-дзысты хæрзвадат, хæларадон, æфсымæрон», – банысан кодта министр.
Ацы историон къахдзæфы фæдыл Президент Бибылты Анатоли дæр йæ сидты бузныджы ныхæстæ загъта Сириаг Арабаг Республикæйы къухдариуæгæн. Уымæн æмæ ахæм ахсджиаг æмæ бæрнон уынаффæтæ исын хуымæтæг нæу. Ацы цау нæ бæстæйыл дæр æвæры бæрндзинад. Уый мах исæм нæхимæ æмæ архайдзыстæм ахæм здæхты, цæмæй нæ ацы бæстæимæ дыууæфарсон ахастытæ æркæной нæ бæстæтæ æмæ адæмты æрбангом кæнынмæ, уой фидар æмæ ахъаз кæной сабырад æмæ стабилондзинадæн.
Медойты Димитр куыд банысан кодта, уымæ гæсгæ мах ныфс ис, æмæ Сирийы адæм, ныртæккæ уым цы зындзинæдтыл æмбæлынц, уыдоныл фæтых уыдзысты.
«Сирийы бæстæ нын нæ хæдбардзинад – РХИ-йы хæдбардзинады Акт райсыны бон 29 майы æмæ Уæрæсе Хуссар Ирыстоны паддзахадон хæдбардзинад банымайыныл дæс азы сæххæсты къæсæрыл кæй банымадта, уый символикон цау у. Ацы цау айхъуыст дунейыл, нæ министрадмæ цæуы алырдыгæй телтæ æмæ арфæйы фыстæджытæ нæ хæлæрттæй», – дзырдта Медойты Димитр.
Фидæны ахастытыл дзургæйæ, уый банысан кодта, мах бирæ хæттыты кæй фехъусын кодтам, цæттæ кæй стæм уыцы фæндагыл иумæ рацæуынмæ æмæ нæ ахастытæ фидарæй фидардæр кæ-нынмæ.
Сирийы регион æгасæй у цивилизацийы авдæн. Мингай ирæттæн Сири ссис сæ дыккаг райгуырæн бæстæ. Уым цæры бирæ ирон бинонтæ, кæцытæ бахъахъхъæдтой се ‘взаг, ахсынц алыгъуызон паддзахадон ахсджиаг бынæттæ æмæ намысджынæй службæ кæнынц сириаг паддзахадæн.
Дамаскы архайы сириаг-ирон æхсæнад. Уыимæ министрадæн рагæй фæс-тæмæ ис хъарм ахастытæ. Æмæ нæ ахастытæ ноджы фенгомдæр уыдзысты уыцы бæстæйы, дипломатон мисси бакæнынæй.
Медойты Димитры ныхæстæм гæсгæ, нæ бæстæйы дунеон банымады райсгæ курс дарддæр кæндзæн, ууыл куыст цæуы æрвылбон дæр, нæ оппонентты ‘рдыгæй ныхмæлæудтытæм нæ кæсгæйæ. Уымæн æмæ мах цæуæм раст фæндагыл нæ иумиаг нысанмæ.
Къæбулты Маринæ
Comments are closed, but trackbacks and pingbacks are open.