Мыхуыры рацыд сабиты уарзон журнал «Ногдзау»-ы ацы азы фæстаг, æхсæзæм номыр.
Куыд æрвылхатт, афтæ та ацы номыр дæр хъæздыг у алыгъуызон æрмæджытæй æмæ сæ нæ чысыл хуртæ бакæсдзысты æхсызгонæй. Поэт, фыссæг, Уæрæсейы Фысджыты цæдисы уæнг, Цæгат Ирыстон-Аланийы культурæйы сгуыхт кусæг у Будайты Милуся. Фыссæджы юбилейы цытæн журнал йæ фыццаг фарсыл ныммыхуыр кодта уац æмæ журналкæсджыты зонгæ кæны йæ цард æмæ сфæлдыстадон архайдимæ, ис дзы йæ къам дæр.
Ирыстоны зындгонддæр кувæндæттæй иу у Дзывгъисы дзуар. Уымæн йæ бæрæгбон вæййы Джеоргуыбайы фæстæ фыццаг хуыцаубоны. Ацы кувæндоны тыххæй журналкæсджытæ базонгæ уыдзысты, редакцийы бацæттæгонд æрмæг куы бакæсой, уæд. Ис дзы нывгæнæг Айларты Владимиры конд ныв дæр. Зæрдæйæн æхсызгон вæййы, журналы райдайгæ поэтты фæлварæн æмдзæвгæтæ мыхуырæй фенын. Ацы номыры бакæсæн ис Черноярскы скъолайы 6-æм къласы ахуыргæнинаг Босыкты Сæрмæты æмдзæвгæ «Ног азы бæллиц» (йæ ахуыргæнæг у Хуытъиаты Альбинæ) æмæ Хуссар Ирыстоны Цхинвалы 6-æм скъолайы 7-æм къласы ахуырдзау Бежанты Барсæгы æмдзæвгæ «Мæ Ирыстон». Уымæн та йæ ахуыргæнæг у Бесаты Лали. Дарддæр кæсджытæ базонгæ уыдзысты Михайловскы астæуккаг скъолайы 7 «в» къласы ахуыргæнинаджы уацмыс «Æрвгъуыз хæхты бæстæйы аргъау»-имæ (йæ ахуыргæнæг у Соттиты Дзерассæ). Æвзонг кæсджытæ æхсызгонæй базонгæ уыдзысты Сасиаты Исламы æмдзæвгæтæ «Зымæг» æмæ «Ног аз»-имæ. Поэзиуарзджыты ма йе ‘мдзæвгæтæ «Гæды æмæ мыст» æмæ «Ногдзау»-имæ баонгæ кæндзæн Дарчиты Мурат.
Редакци хорз кæны, ирон мыггæгты равзæрдыл кæй — кæнынц нæ кæстæртæ. Ацы номыры дæр сæ мыггаджы равзæрды историимæ зонгæ кæнынц Зилгæйы скъолайы ахуырдзаутæ Хуыбылты Тимур æмæ Таймураз. «Кæстæрты æгъдау» — ахæм сæргонды бын журнал фыццаг номырæй æхсæзæм номырмæ зонгæ кодта, кæстæртæ царды алы фадыджы дæр сæхи куыд хъуамæ дарой, уыдæттимæ. Æрмæг бацæттæ кодта Кучиты Руслан.
Китайы Ногазы бæрæгбон куыд нысан кодтой, уый базонæн ис журналы фæрстыл китайаг адæмон аргъау уырыссаг æвзагыл «Как в Китае начали праздновать Новый год» бакæсгæйæ.
Æвзонг журналкæсджытæ цымыдисаг уыдзысты Будайты Милусяйы «Бабайы лæдзæг» æмæ Джимиты Кларæйы аргъау «Æлдар æмæ мæгуыр лæджы хæрæг», стæй «Уызын заз куыд адавта». Журналы ма цымыдисон æмæ æнæмæнгхъæуæг æрмæджытæ ссардзысты ахæм рубрикæты бын, куыд «Базон-базонтæ», «Ахуыр кæнæм мадæлон æвзаг», «Ирыстоны зайæгойтæ æмæ цæрæгойтæ», «Æмбисæндтæ», «Сатана», «Зымæгон хъазт», сканворд, дзырдбыд æмæ æндæр æрмæджытæ.
Журнал аивадон æгъдауæй сфæлгонц кæныныл хорз бакуыстой Абайты Аркади, Гаппуаты Наталья æмæ Айларты Владимир.
Хуыбиаты Никъала
