«Ногдзау»-ы æхсæзæм номыр

Мыхуыры рацыд æмæ йæ кæсджытæм фæхæццæ сабиты уарзон журнал «Ногдзау»-ы 2020 азы фæстаг, æхсæзæм номыр. 110 азы сæххæст фыссæг Дзадтиаты Тотырбеджы райгуырдыл. Уый тыххæй журнал йе ‘взонг кæсджыты зонгæ кæны фыссæджы цард æмæ сфæлдыстадимæ, ис дзы йæ къам дæр.

Журналы уазæг ацы номыры у «Ногдзау»-ы конкурсты уæлахиздзау Муриты Элинæ æмæ дзуаппытæ дæтты редакцийы фарстатæн.

«Бæрæгбæттæ», зæгъгæ, ахæм рубрикæйы бын та дыгурон æвзагыл мыхуыр æрцыд ирон адæмы бæрæгбонтæй сæ иу – «Зыгуымон æхсæв». Ирон адæммæ бирæ раппæлинаг æгъдæуттæ ис æмæ редакцийы коллектив архайы, цæмæй уыдонимæ зонгæ кæной кæстæр фæлтæры дæр. Ацы номыры дæр рубрикæ «Æгъдæуттæ»-йы йæ кæсджыты зонгæ кæны «Бинонты фынг»-имæ. Уымæй дарддæр «Ногдзау» зæрдиагæй архайы, сфæлдыстадон æмæ нывкæнынады аивадмæ æмхиц чи у, уыдон уацмыстæ йæ фæрстыл æвдисынмæ. Ацы номыры дæр бакæсæн ис Дзæуджыхъæуы 18-æм скъолайы 8-æм «А» къласы ахуырдзау Гоцъоты Алинæ æмæ Беслæны 7-æм скъолайы 9-æм къласы ахуырдзау Хуыбаты Моникæйы æмдзæвгæтæ «Гæлæбу» æмæ «Мæ уарзон Ир!»-æн, стæй рубрикæ «Аргъау»-ы та 43-æм скъолайы 9-æм къласы ахуырдзау Дурнева Валерияйы уацмыс «Æнахуыр фын» æмæ рубрикæ «Радзырд»-ы та Дзæуджыхъæуы 5-æм скъолайы 8-æм къласы ахуырдзау Хадаты Миленæйы «Цолайы рæдыд».

Зарæджы аивадмæ æмхиц чи у, уыдон та базонгæ уыдзысты поэт Къадзаты Станиславы  ныхæстыл фыст зарæг «Ногбоны æхсæв»-имæ, музыкæ йын ныффыста Гæздæнты Булат, зарæджы ныхæстимæ сты йæ нотæтæ дæр. Рубрикæ «Таурæгъ»-ы бакæсæн ис Ногхъæуы астæуккаг скъолайы 6-æм къласы ахуырдзау Хъараты Альбинæйы фыст уацмыс «Сайын хорз нæу». «Хистæрты сфæлдыстад сабитæн»-ы та нæ чысыл хуртæ æхсызгонæй бакæсдзысты Хъæцмæзты Азæйы æмдзæвгæ «Тæрхъусы зард». Хорз у, редакци кæстæрты кæй зонгæ кæны, Ирыс-тонæн кад чи скодта, уыцы сахъгуырд хæстонтимæ. Ныр дæр та рубрикæ «Иры намыс»-ы дзырдæуы, Фыдыбæстæйон хæсты историйы зынгæ фæд чи ныууагъта, уыцы сахъгуырд инæлар-лейтенант Абациаты Дзамболат (Дмитри) Константины фыртыл. «Æфсымæрон адæмты сфæлдыстад»-ы та мыхуыр æрцыдысты Хъæрæсе-Черкесийы поэттæ Ас-кербий Киреев, Асан Найманов æмæ 9-æм къласы ахуыргæнинаг Ибрагим Есенеевы æмдзæвгæтæ уырыссаг æвзагыл. «Аивад»-ы рубрикæйы та журнал йæ кæсджыты зонгæ кæны «Ерысы кафт»-имæ.

Змейкæйы 2-æм скъолайы 5-æм къласы ахуырдзау Кæркуысты Аланæ рубрикæ «Ирон хъæутæ»-йы фыссы йæ райгуырæн хъæуы фæзынды историйыл. Дзæуджыхъæуы 8-æм скъолайы 7-æм къласы ахуырдзау Бæцæзаты Валерия та фыссы йæ мыггаджы тыххæй. «Ногдзау»-ы ма цымыдисон æмæ ахсджиаг æрмæджытæ мыхуыр æрцыдысты ахæм рубрикæты бын, куыд «Ирыстоны зайæгойтæ æмæ цæрæгойтæ, «Базон-базонтæ», «Ахуыр кæнæм ирон æвзаг», «Æмбисæндтæ», стæй сканворд æмæ дзырдбыд. «Ногдзау» аивадон æгъдауæй сфæлгонц кæныныл зæрдиагæй бакуыстой нывгæн-джытæ Мамсыраты Хасан, Айлар-ты Владимир æмæ Абайты Аркади.                                              

Хуыбиаты Никъала