УФ-йы Паддзахадон Думæйы Конституцион закъондæттынад æмæ горæты арæзтады хъуыддæгты Федерацийы Советы комитет срекомендаци кодта Уæрæсейы æфсады тыххæй æнæраст информацийы æмæ экстремистон архайдмæ æрсидтыты тыххæй исад сконфискаци кæныны фæдыл закъон хорзыл банымайыны тыххæй. Фейкты тыххæй ацы Закъон Паддзахадон Думæмæ рахастой 22 январы. Хъæппæрисы автортæ уыдысты 395 депутаты Думæйы сæрдар Вячеслав Володины сæргълæудæй. 31 январы Паддзахадон Думæйы депутаттæ æртыккаг, кæройнаг бакасты райстой документ.
***
Мæскуыйы Басманы тæрхондон фæсаууонмæ дыууæ мæймæ æрцахста фыссæг Борис Акунины уæрæсейаг æфсады тыххæй терроризм æмæ фейктæм сидтыты тыххæй хъуыддаджы фæдыл. Уый искуы Уæрæсемæ куы æрæздæха, уæд æй уайтагъд дæр æрцахсдзысты. Фæстаг дæс азы Акунин цæры Лондоны. Уæрæсе йæ балæвæрдта дунеон фæдагуырдмæ, фæлæ йæ Стырбритани нæ дæтты. Уæрæсейы Федерацийы Борис Акунин (йе ‘цæг ном Григорий Чхартишвили) нымад æрцыд фæсарæйнаг агентыл æмæ йæ бахастой террористтæ æмæ экстремистты номхыгъдмæ.
***
АИШ-ы штат Техас йæхи фæндонæй райдыдта къул аразын АИШ æмæ Мексикæйы арæныл. АИШ-ы ныры онг никæцы штат арæзта йæхи сæрмагонд арæнгæрон къул. Вашингтоны ацы инициативæ тынг нæ фæцыдис сæ зæрдæмæ, фæлæ сæ бон саразын ницы у. АИШ-ы конституци бар дæтты федералон домæнтæ мацæмæ дарынæн. «Мах алцæмæй дæр сифтонг кæндзыстæм арæны æдасдзинад», – фехъусын кодта Техасы губернатор Грег Эбботт.
***
Уæрæсейы Федерацийы Президент Владимир Путин интервью радта зынгæ америкæйаг журналист Такер Карлсонæн. Америкæйаг разамынад фæнд кодта Путинимæ журналисты фембæлд ма бауадзын. Уый тыххæй Карлсон йæхæдæг ныффыста социалон хызæджы.Афтæ ма Карлсон фæнд кæны Зеленскийæ дæр интервью райсын, фæлæ йæ нырма нæ зоны, Киевмæ куыд бахаудзæн, уый. Карлсон Уæрæсейы лидерæй интервью кæй райста, уый тыххæй йæ, гæнæн ис, бафхæрой.
***
Иу аз рацыд Турчы тыхджын зæххæнкъуысты бонæй. 6-æм февралы бæстæйы райдыдтой фыдохы мадзæлттæ амæттæгты рухс ном ссарыны тыххæй. Зæххæнкъуысты магнитудæ уыд 7,8. Турчы хуссайраг провинцийы йæ фæстиуæгæн ныппырх сты мингай хæдзæрттæ. 2023 азы 6 февралы райсомы 4.17 сахатыл, 65 секундмæ пырхæнты бын фæмард сты 53537 адæймаджы. Ноджы 6 мин адæймаджы та фæмард сты сыхаг Сирийы. Афтæмæй амæттæгты нымæц схызт 60 мин адæймаджы онг. Ацы зæххæнкъуыст бацыд фæстаг 100 азы иууыл мæлæтхæссæгдæр æрдзон катастрофæты нымæцмæ. Ныппырх ис 100 мин бæстыхайы, 2,3 милуаны агъуысты та хъыгдард баййæфтой. 700 мин адæймаджы абоны онг дæр цæрынц контейнерты.
***
Канадæйы оппозицион консервативон парти æрсидт бæстæйы премьер-министр Джастин Трюдомæ, цæмæй отставкæйы ацæуа, канадайæг парламентмæ 98-аздзыд украинаг националист Ярослав Хункуйы (Гуньку) кæй фæхуыдта, уый тыххæй. «Премьер-министр ныр цалдæр мæйы махæй хъазы, зæгъгæ, ницы бар дардтон раздæры нацистон салдаты фæхуындмæ. Ныр мах базыдтам, сæрмагондæй, йæхæдæг кæй фæхуыдта ацы адæймаджы, уый», – фехъусын кодта рабадты рæстæджы национ парламенты консерваторты лидер Пьер Пуальевр. Уый Трюдойы зæрдыл æрлæууын кодта, зæгъгæ, хъаугъайы фæстиуæгæн парламенты раздæры спикер Энтони Ротайы бахъуыд отставкæйы ацæуын.
***
Болгарийы фермертæ рацыдысты уынгтæм украинаг нæмыгонты импорт æруромыны домæнимæ. Фермерты инициативон комитет æрдомдта, цæмæй бæстæйы хъæууон хæдзарады министр Кирил Вытев отставкæйы ацæуа. Науæд аграритæ бартхъирæн кодтой æнæхъæн бæстæйы æнæразыдзинады акцитæй. Варненскы областы фермертæ трактортæй æрæхгæдтой Варна-Бургасы сæйраг магистраль. София-Варнайы магистралы та басыгътой хъæмп æмæ нæмыгонтæ, æмæ уый фæстæ артыл бакалдтой æхсыр.
***
Испайнаг фермертæ дæсгай трактортæй сæхгæдтой æппæт бæстæйы фæндæгтæ европæйаг хъæууонхæдзарадон секторы кризисон уавæры тыххæй. Уыдон баиу сты сæ францаг, нидерландаг, бельгийаг коллегæтимæ. Сæ хъуыдымæ гæсгæ, Евроцæдис дарддæр дæр ног сразыдзинæдтæ аразы æртыккаг бæстæтимæ сæрибар базарады тыххæй æмæ уымæй уæззаудæр кæнынц фермерты æмæ фосдарджыты проблемæ-тæ æппæт Евроцæдисы.
Информацион агентадты хъусынгæнинæгтæм гæсгæ
