Хуссарирыстойнаг æвзонг богалтæ æртæ сыгъзæрин æмæ иу бронзæ майданы рамбылдтой уæгъдибар хъæбысхæстæй Алагиры уагъдцæуæг Гæздæнты æфсымæрты номарæн турниры. Ерысты уæлахиздзаутæ систы Козаты Хетæг (+75 кг), Кокойты Денис (75 кг) æмæ Чилæхсаты Ибрагим (38 кг). Бронзæйон хорзæх та бафтыд Василий Кулебайы къухты (29 кг).
Спортсменты цæттæ кæнынц тренертæ Босыкты Вячеслав, Джыгкайты Роберт, Къацты Спартак, Пухаты Георги, Гæджиты Артур, Гæззаты Алан æмæ Джиголаты Андрей.
Футбол
Футболæй Уæрæсейы фыццаг дивизионы чемпионаты 32-æм туры Дзæуджыхъæуы «Алани» уазæгуаты хъазыд Мæскуыйы «Торпедо»-имæ. Фембæлд фæцис 0:0 хыгъдæй. Ацы хъазты фæстæ «Алани» 43 очкоимæ турнирон таблицæйы ахсы 8-æм бынат.
Уагъд æрцæудзысты ерыстæ
Республикæ Хуссар Ирыстоны хæдбардзинады акт райсыны цытæн уагъд æрцæудзысты спортивон мадзæлттæ. 24-25 майы спорты галуан «Олимп»-ы уыдзæн республикæйы чемпионат армрестлингæй. «Олимп»-ы ма 26-æм майы ерыстæ уагъд æрцæудзысты уæззау атлетикæйæ. 29-æм майы та организаци æрцæудзысты бæхты дугътæ. Куырдиæттæ ист цæуынц 27-æм майы онг. Ерысты хайад райсын сæ бон у кæй фæнды, уыдонæн.
Спортивон мадзæлтты организатор у РХИ-йы Фæсивæдон политикæ æмæ спорты фæдыл комитет.
ХУРИТЫ Батрадз
