13 майы Цхинвалы медицинон ахуыргæнæндоны банысан кодтой Медицинон хойы æппæтадæмон бон. Арфæйы ныхæстæй мадзал байгом кодта ахуыргæнæндоны ахуыргæнæг Къуылыхты Мадинæ. Уый фæстæ Мадинæ æрдзырдта сæ ахуыргæнинæгтæ, ахуыргæнæндоны сырæзтæй райдайгæйæ цы хæстон цаутæ цæуы, уым цæфтæн æххуыс кæны-ны хъуыддæгты активон хайад кæй истой гуырдзиаг-ирон хæсты рæстæджы сæ рауагъдонтæ Хъуылымбегты Светланæ, Медойты Вадим, Гæджиты Константин æмæ æндæртæ сæхи равдыстой æнувыд æмбæстæгтæй æмæ æппынæдзух уыдысты цæф хъахъхъæнджыты фарсмæ.
Ахуыргæнæндоны рауагъдонтæ ацы бонты дæр цæф хæстонтæн æххуыс кæнынц сæрмагонд æфсæддон операцийы. Ам сæхи хъæбатырæй æвдисынц Зассеты Алан, Владимир Кулеба, Цъæритты Венерæ æмæ æндæртæ.
Мадинæ ма арфæйы ныхæстæ загъта, ковиды рæстæджы йæ зонындзинæдтæ æмæ тыхтæ чи нæ бахæлæг кодта, уыдонæн, се ‘хсæн Хъуылымбегты Иринæ, Дудайты Заринæ, Козаты Иринæ æмæ æндæртæ.
Хуссар Ирыстоны Æнæниздзинад хъахъхъæныны министр Джыгкайты Томас та йæ арфæйы раныхасы загъта: «Тынг æхсызгон мын у, абон ам кæй æмбæлæм æмæ мын кæй ис фадат уæ профессионалон бæрæгбоны цытæн раарфæ кæнынæн. Абон Хуссар Ирыстоны ис тынг хорз медицинон ахуыргæнæндон æмæ уый руаджы медицинон хотæй æххæст стæм. Уе ‘ппæт дæр уарзут уæ дæсныйад, æххæст æй кæнут æмæ уын мæ зæрдæ зæгъы ноджы стырдæр æнтыстытæ. Нæ ахуыргæнæндон гом æрцыдис 1931 азы æмæ уæдæй фæстæмæ рауагъта цалдæр мин медицинон кусæджы. Стыр Фыдыбæстæйон хæсты рæстæджы та ам уыдис эвакуацион госпиталь», – банысан кодта министр.
Фыццаг курсы студенттæ дæр арфæ кодтой медицинон хотæн.
Хуссар Ирыстоны Æнæниздзинад хъахъхъæныны министрады Кады грамотæтæй уыцы бон хорзæхджын æрцыдысты Пухаты Светланæ, Гæззаты Бэлæ, Æлборты Ольгæ, Тыбылты Иринæ, Цоциты Мадинæ, Саулохты Мананæ æмæ æндæртæн, æдæппæтæй цыппор медицинон хойы.
Уæрæсейы Æнæниздзинад хъахъхъæныны министрады минæвар Гурулева Ольгæ та лæмбынæг æмæ бæстон æрдзырдта ацы бæрæгбон кæд, кæм æмæ кæй фæрцы фзынд, чи йæ дарддæр кодта æмæ йæ абонмæ чи æрхæццæ кодта, æппæт уыдæтты тыххæй.
Гæззаты Иван
