20 ноябрæй 27 ноябрмæ Хуссар Ирыстоны территорийыл фыдракæнд не ‘рцыд. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Къуырийы дæргъы республикæйы фæндæгтыл æрцыдис фондз фæндагон-транспортон цауы. Авариты фæстиуæгæн рынчындонмæ алыгъуызон цæфтимæ бахаудтой ӕртӕ адæймаджы.
Алыгъуызон бархалыны фӕдыл горӕты милицийы управленийы кусджытӕ бӕрндзинадмӕ ӕркодтой дыууӕ адӕймаджы.
Фæндагон змæлды æдасдзинады инспекци къуырийы дæргъы сбæлвырд кодта 279 фæткхалæн цауы. Уыдонæй фараст шофыры разындысты нозтджынтӕ кӕнӕ та уыдысты наркотикты ӕндӕвдады бын.
Милицийы экономикон фыдракæндтæ ма æруадзыны фæдыл управленийы кусджытæ рейдон мадзæлттæ уадзыны рæстæджы дыууæ дуканийы баййæфтой уæййаг энергетикон нозтытæ 58 банкæйы бæрц. Дуканиты хицæуттыл бакодтой административон суагъæтæ æмæ сæ ныр тæрхондон бæрндзинадмæ æркæндзæн.
Наркотикты æрзылдыл контроль кæныны управленийы кусджытæ оперативон информацийы фæдыл баурæдтой 29 æмæ 27-аздзыд бынæттон цæрджыты, кæцытæм сæ зæрдæ фехсайдта наркотиктæй спайда кæнынмæ. 29-аздзыд горæттаг цæрæгæн медицинон басгæрсты рæстæджы рабæрæг ис марихуанайæ æмæ психотропон препарат «Лирикайæ» спайда кæныны факт. 27-аздзыд æмбæстаг нæ бакуымдта медицинон басгæрстмæ. Тæрхондон фæткхалджыты фæивар кодта фæйнæ 90 мин сомы.
21 ноябры рынчындонмӕ бахаудта 43-аздзыд горӕттаг цӕрӕг, кӕцы хӕдзары уӕвгӕйӕ фӕулӕфыд сыгъдхъӕстӕ.
22 ноябры милицимӕ фехъусын кодтой, зӕгъгӕ рынчындонмӕ уӕззау уавӕры бахаудта нӕ горӕты 28-аздзыд цӕрӕг. Куыд рабӕрӕг, афтӕмӕй ацы ӕм-бӕстаджы ныццавта ток.
23 ноябры Дзауы поселочы ссыгъд 73-аздзыд бынӕттон цӕрӕджы хисӕрмагонд хӕдзар. Бынатмӕ бацыдысты зынгхуыссынгӕнӕн службӕйы кусджытӕ ӕмӕ арт ахуыссын кодтой. Бӕстыхайы иу хай басыгъд. Зынгсирвӕзты аххосаг разынд электрон ток.
26 ноябры рынчындонмӕ уӕззау уавӕры бахаудтой 43-аздзыд горӕттаг цӕрӕг йе ‘ртӕ сывӕллонимӕ, хӕдзары уӕвгӕйӕ сыгъдхъӕстӕ кӕй фӕулӕфыдысты, уый аххосагӕй.
Горӕт Цхинвалы милицийы управленийы кусджытӕ баурӕдтой 40-аздзыд бынӕттон цӕрӕджы, кӕцымӕ сӕ зӕрдӕ фехсайдта наркотиктӕй спайда кӕнынмӕ. Фӕткхалӕг нӕ бакуымдта медицинон басгӕрстмӕ.
