Чи у сæ сæйраг интересант?

Евроцæдис æмæ АИШ Гуырдзыстоны фæсарæйнаг агентты ныхмæ закъоны проекты критикæйы бын фæкодтой, фыссы америкаг журналист Род Дреер «The American Conservative»-йы: «Афтæ сæм кæсы, цымæ сын æцæгæлон паддзахæдты бындур ныззилыны бар  ис – æмæ сæ пълæнтты ахъаззаг хай бæттынц хæдбар коммерцион организацитимæ (НКО). Бахъыгдарыны фæнд кæмæ фæзына, уыдоныл та уайтагъд «Путины марионеткæйы» гакк (клеймо) нытъæпп кæнынц».

Цалынмæ йæ евроатлантикон «æрдхæрдтæ» тыхсынц æмæ æртхъирæнтæ кæнынц, уæдмæ æнæкæрон политикон зылдыл Гуырдзыстон традицион æгъдауæй зилдух кæны. Нæразыкæнынадон митингтæ та фылдæрæй-фылдæр хицауад хи къухтæм æрбайсыны фæдыл мидæгон тохы хуыз исын райдыдтой.

9 мартъийы хицауиуæггæнæг парти «Гуырдзиаг бæллиц» фæстæмæ асидт сарæзта фæсарæйнаг агентты фæдыл закъоны проектæн. Партийы фидиуæгы дзырдæуы, зæгъгæ, «ист закъоны проект æхсæнадон нæразыдзинад расайдта» æмæ «мæнг ныхæсты машинæйæн та бантыст закъоны проект негативонæй равдисын æмæ афтæмæй æхсæнады бæрæг хай сызмæнтын»

Фæстæмæ акъахдзæф кодта «Гуырдзиаг бæллиц» æви йæхи сценарийы фæлгæтты хъазы ацы бирæактон политикон спектаклы?

Бирæ азты дæргъы Гуырдзыстонæн не ‘нтысы кæлæнгонд политикон зылдæй рахизын æмæ йæ ризæгæй сдзæбæх уæвын. Оппозици цæмæдæр гæсгæ нымайы, зæгъгæ, сæ бæстæйы тынгад рæзынгæнæг «исты ахæм», æнæмæнг хъуамæ æрцæуа æмæ уæд фадат бындурон æгъдауæй фæивдзæн. Фæлæ  уал нырыонг ситуаци дæр стандартон сценаримæ гæсгæ йæ цыд кæны: исты цау æрцæуы, тынгад сырæзы, ныхмæлæуды акцитæ уынгтæм ракæлынц, адæм сæ тыппыртæ суадзынц, стæй уæд тынгад мынæг кæнын райдайы суанг иинæ инциденты онг.

Æрæджы дæр ма алцыдæр зилдух кодта, ныртæккæ ахæстоны бадæг экспрезиденты æнæзæгъинаджы алыварс æмæ уый оппозицийæн стыр ныфс уыди, ома, сæ кумиры хъысмæтæй спайда кæндзысты æмæ хицауады раппардзысты. Алы хатт дæр оппозици тырныдта гуырдзиаг мидæгон процесстæм ныгуылæйнæгты æрбаввахс кæнынмæ. Фæлæ-иу алы хатт дæр парти «Гуырдзиаг бæллиц»-æн  бантысти оппозицийы уæрæх фронт хицæн фрагменттыл ныддих кæнын.

Февралы кæроны гуырдзиаг змæлд «Адæмы тых»-ы уæнгтæ «æнæнхъæлæджы» парламентмæ балæвæрдтой фæсарæйнаг агентты фæдыл дыууæ закъоны проекты – «Фæсарæйнаг æндæвдады рæсугъдзинады тыххæй» æмæ «Фæсарæйнаг агентты регистрацийы фæдыл». Ацы документтæм гæсгæ фæсарæйнаг æндæвдады агенттыл нымад цæуынц æнæкоммерцион организацитæ æмæ дзыллон-информацион фæрæзтæ, кæцытæн сæ азон æфтиæгтæ сты фæсарæйнаг бæстæтæй цæуæг финанстæй. Номхыгъдæй 7 мартъийы гуырдзиаг парламент ацы документимæ сразы ис.

Интригæйы сюжеты сæйраг нысаниуæг ссардзыстæм, лæмбынæг куы ахъуыды кæнæм æмæ куы бафæрсæм, политикон змæлд «Адæмы тых» номхуындæй ацы бонты цæмæн бахаста закъоны проект, кæд æмæ фароны сæрдæй райдайгæйæ Гуырдзыстоны æнæрынцойæ йæ фæдыл æнæкæрон дискусситæ цыдысты? Номхуындæй ацы бонты цæмæн бахъуыдис закъоны проект парламентыл сæмбæлын кæнын?

Уымæн æмæ Ныгуылæн æхцайы фæрæзтæй гуырдзиаг æнæкоммерцион ахадæн организацитæ хицауадæй æрдомдтой, зæгъгæ, сразы ут «рæстæгон техникон хицауад» саразыныл, кæннод уын мæнæ ультиматум – кæннод «сабырадон революцийы» амæттæгтæ суыдзыстут. Уыцы æртхъирæнтæн дзуапп раттын хъуыдис. Æмæ хицауиуæггæнæг парти дзуапп ссардта. Оппозици ахæм фæзылдмæ æдзæттæ разынд.

Уый рабæрæг ис, Тбилисы центрмæ оппозици йæ фарсхæцджыты куы ракодта æмæ сабыр митингы бæсты парламентыл хъула куы скодта, пъалицæйы æрдæм «Молотовы коктейлтæ» æмæ дуртæ тæхын куы райдыдтой, уæд. Пъалицæ та сын дзуапп радта цæссыгкалæн газ æмæ цыхцырæгон донкалæнтæй. Ныхмæлæуды акци цыбыр рæстæгмæ тыхон характер райста, барадхъахъхъæнæн органты кусджытæй бирæтæ фæцæфтæ сты, ныхмæдзæуджытæй 80 адæймаджы бæрц та сæ хулиганон архæйдтыты тыххæй  ахæстоны баурæдтой.

Оппозицийы æрдыгæй уый фыццаг стыр рæдыд уыдис

Дыккаг та уый мидæг ис, æмæ оппозици райдыдта дзурын, зæгъгæ, парти «Гуырдзиаг бæллиц» уæрæсейаг закъоны копийæ спайда кодта. Уымæй раздæр та Мæскуыйы æндæвдады рæзт оппозици сбаста æнæпаддзахадон организациты (НПО) архайдимæ, ома, комкоммæ уыдон Мæскуыйæ исынц финанстæ. Кæд æцæгдæр афтæ у, загъта сын Тбилиси, уæд ацы закъоны фæрцы æцæгдзинад рабæрæг уыдзæн.

Уалынмæ  коллективон Ныгуылæн «Гуырдзиаг бæллиц»-ыл йæхи ныццавта, зæгъгæ, куыд бауæндыдыстут фæсарæйнаг агентты ныхмæ арæзт закъон райсын æмæ афтæмæй (диссаг, æвæдза!) æцæг фыдгæнæг йæхи раргом кодта.

“Фæсарæйнаг агентты фæдыл разæвæрд Гуырдзыстоны евро-атлантикон фидæнæн æмæ ацы паддзахады æмбæстæгты экономикон, социалон æмæ æндæр хисæрмагонд тырнындзинæдтæн хæссы стыр тæссагдзинад. Ӕз сидын Гуырдзыстоны парламентмæ, цæмæй цæхгæр «нæ» зæгъой уыцы закъоны проектæн»,  – ныффыста Твиттеры Саманта Пауэр (Samantha Power), АИШ-ы раздæры æххæстбарджын минæвар ИНО-йы, ныртæккæ та АИШ-ы æхсæнадæмон рæзынады Агентады сæрдар. Гуырдзыстоны АИШ-ы минæварад уыцы закъоны проект комкоммæ хоны «Кремлы цырынгæнæн».  «Гуырдзиаг демократийыл саубон скодта»  – фыссы минæварад.

BBC, АИШ-ы Паддзахадон департамент, Евроцæдисы сæйраг дипломат Жозеп Боррель, организацитæ Human Rights Watch æмæ Amnesty International – иууылдæр тыхсынц æмæ тæрсын кæнынц, зæгъгæ, æндæр бæстæтæй финанстæ исæг хæдбар къордты æмæ дзыллон-информацион фæрæзты изоляци æмæ дискредитаци кæндзысты фæсарæйнаг агентты фæдыл закъонты проекттæ.

Саломе Зурабишвили ацы цауты тыххæй  йæ визит АИШ-мæ фæцыбыр кодта, фæстæмæ æрхæццæ ис æмæ карзæй бартхъирæн кодта «Гуырдзыстоны Европæйæ дардгæнæг” закъондæттæн инициативæйыл вето сæвæрынæй. Цымæ йæ нæ зоны, президентæн ацы бæстæйы  уадиссаг бартæ кæй нæй, цымæ йæ не ‘мбары, ветойы сæрты  парламент æмæ хицауад закъонмæ гæсгæ æнцонтæй  кæй ахиздзысты!

Хуссайраг сыхаджы хицауад сын дзуапп радта: «Мах та уæд ацы проект Венециайнаг къами-сы экспертизæмæ арвитдзыстæм. Ӕртæ мæйы æнхъæлмæ кæсын нæ бахъæудзæн. Ницы кæны. Ӕппынфæстаг, закъоны америкаг верси райсдзыстæм». Уыимæ ма «Гуырдзиаг бæллиц» сæ бæстæйы Евроцæдисмæ  кандидаты статус æмæ закъоны райстимæ чи бæтты, уыдоны «политикон спекулянттыл» нымайы. Куыд уынæм, афтæмæй ныртæккæ уал Гуырдзыстонæн цы пълан «Б» бацæттæ кодта Ныгуылæн, уый йæ нæ бахъæудзæн.

Фæлæ йæ æнцад нæ ныууаддзæн. Нырмæ куыд архайдта гуырдзиаг æхсæнады сызмæнтыныл, афтæ дарддæр Ныгуылæн йæ дестабилизацион куыст кæндзæн ацы бæстæйы. Гæнæн ис æмæ алыхуызон провокацион къахдзæфтæ кæндзысты, гæнæн ис æмæ фæсивæдæй искæй сакралон амæттаг сараздзысты. Цыбырдзырдæй, теоретикон æгъдауæй оппозицийы бон бирæ деструктивон къахдзæфтæ саразын у.

Практикæйы та Гуырдзыстоны хицауад æвдисы политикон æнæцудгæдзинад æмæ йæхи цæттæ кæны фидæны ныхмæдзыдон акцитæн дзуапп радтынмæ. Гуырдзыйы æхсæнадæн йæ фылдæр хай змæстыты фарс кæй нæ хæцы, уый хицауад зоны æмæ йæ уымæ гæсгæ фæнды равдисын йæ «моралон уæлдæрдзинад», цæмæй алчи дæр фена, тыхон акциты аххосджын æххæстæй оппозици кæй у.

Хуссар Ирыстон йæ тыхон структурæты ракодта  службæйы фæтыхджынгонд режиммæ

Фæссоветон паддзахæдты мидæгон хъуыддæгтæм АИШ-ы гуырымыхъ бабырсты фæдыл Абхазы Ӕддагон хъуыддæгты министр Инал Ардзинба загъта: “Нæ информацимæ гæсгæ мартъийы америкæгтæ бафæлвардзысты Гуырдзыстоны паддзахадон фæфæлдæхт саразын. Æмæ уый та тæссаг уыдзæн нæ регионы æдасдзинады архитектурæ-йæн. АИШ-ы сæйраг нысан у Хуссар Кавказы дыккаг фронт байгом кæнын».

Хуссар Ирыстон æмæ Абхазы лæмбынæг æмæ бæстонæй мониторинг кæнынц сыхаг бæстæйы ситуаци.

Нæ республикæйы Ӕдасдзинады совет сыхаг бæстæйы уавæры фæдыл Президент Гаглойты Аланы инициативæйы фæлгæтты оперативон æмбырд сарæзта æмæ Хуссар Ирыстоны тыхон структурæты службæтæн бауынаффæ фæтыхджынгонд режиммæ рахизын. Абхазы æмæ Хуссар Ирыстоны Ӕддагон хъуыддæгты министртæ Ардзин-ба Инал æмæ Джиоты Ӕхсар телефонон ныхасы сыхаг Гуырдзыстоны мидæгон ситуацийыл дзургæйæ, банысан кодтой нæ иудзинад  æмæ нæ паддзахæдты иумæйаг координацион архæйдтыты ахсджиагдзинад, ацы уавæр цы тæссагдзинæдтæ хæссы, уыдонæй нæ адæмты бахъахъхъæныны сæраппонд. Министртæ сæрмагондæй сбæлвырд кодтой Уæрæсейы Федерацийы роль, куыд регионы æдасдзинад æмæ сабырады гарант.

                   ДАМБЕГТИ Иринæ

Comments are closed, but trackbacks and pingbacks are open.