НÆ ТЕАТРЫ ФÆЛЛОЙ ÆМÆ ЙÆ НОГ ХУЫНТÆ

Театралон афæлгæст

Алы адӕмӕн дӕр сӕ культурӕйы сӕйраг кувӕндон-артдзӕстыл нымад цӕуы театр. Хъӕздыг ӕмӕ бӕркадджын уыдис Хуссар Ирыстоны Паддзахадон драмон театры 2021-2022 азты 90 сезоны репертуар.

2021 азы театрыл сӕххӕст 90 азы. Уал азы дӕргъы национ культурӕйы размӕцыдӕн нӕ театры лӕггӕдты тыххӕй бирӕ ӕрцыд фыст ӕмӕ ныхас. Йӕ юбилейы тыххӕй мыхуыры рацыд сӕрмагонд нывӕфтыд чиныг «90 азы национ аивадӕн лӕггадгӕнгӕйӕ» (чиныджы автор-аразӕг Зӕгъойты Рада). Банысан кӕнын ма хъӕуы уый дӕр ӕмӕ 2020-2021 азты короновирусы аххосӕй театры коллективӕн дӕр сӕ куысты авналӕнтӕ зӕрдӕвӕндон нӕ уыдысты. Фӕлӕ уымӕ нӕкӕсгӕйӕ, низы уавӕр-иу куы фӕсабырдӕр, уӕд-иу сӕ куыстмӕ ӕрывнӕлдтой. 90 сезоны бынӕттон театрдзауты зӕрдӕтӕ барухс кодтой ног ӕвӕрд спектаклтӕй. Январы мӕйы уыд премьерæ Остъаты Аланы трагеди «Фӕстаг ӕвдисӕн» (ӕвӕрӕг режиссер Дзуццаты Т). Ацы спектаклы хайад райстой Цӕгат Ирыстоны Тӕбӕхсӕуты Балойы номыл Академион ӕмӕ Дыгурон театры артисттӕ дӕр. Апрелы мӕйы Туаты Д., комеди «Пӕсӕйы фӕндон» (реж. Цӕриаты В.). Майы мӕйы К.Гольдонийы комеди «Уазӕгдоны хицау» (реж. Чумаченко И). Июны мӕйы Н.Эрдман «Химарӕг» (реж.А.Размахов). Уыдонимӕ ма нӕ театры сценӕйыл ӕвдыст цыдис «Ӕз ус нӕ курын», «Дон Жуан», «Ды мӕ куы уарзай», «Сӕтти ӕмӕ Бӕтти» ӕмӕ ӕнд. Ацы спектакльтӕ ӕрмӕст Паддзахадон драмон театры сценӕйыл ӕвдыст нӕ цыдысты, фӕлӕ ма Республикӕйы районты культурӕйы галуанты, афтӕ – хъӕууон клубты дӕр.

Театры коллектив гастролон балцы уыдис Цӕгат Кавказ ӕмӕ Уӕрӕсейы горӕтты дӕр. Цӕгат Ирыстоны Тӕбӕхсӕуты Балойы номыл Академион театры сценæйыл æвдыст æрцыд Ж.Б.Мольеры «Дон Жуан» (реж. Джелыты Хъ.), Туаты Д. «Пæсæйы фæндон» (реж. Цæриаты В.). Банысан хъӕуы уый, ӕмӕ ацы спектакль ӕвӕрд кæй ӕрцыд Цӕгат ӕмӕ Хуссар Ирыстоны театрты артистты иумиаг хайадистӕй. Нӕ театры аивадон коллектив хуынд ӕрцыд ӕмӕ хайад райста бирӕ фестивалты.

Горæт Грознӕйы сентябры мӕйы 2022 азы ӕвдыст ӕрцыд Шекспиры «Юлий Цезарь» – реж. Т. Дзуццаты, ӕмӕ 2 октябры та г. Махачкалайы.

2021 азы октябры мӕйы г.Ярославлы театрдзаутӕ федтой спектакль «Къоста» – реж. Р. Габриа.

2022 азы апрелы мӕйы та ацы спектакль ӕвдыст ӕрцыд Санкт- Петербургы.

6 июны г. Керчы ӕвдыст ӕрцыд Ж.Ануйы «Антигона» – реж. Дзуццаты Т.

7 июны г.Тамбовы Н.Эрдман «Химарӕг» – реж.А.Размахов.

8 июны г.Воронежы Ж.Мольеры «Дон Жуан» – реж. Джелыты Хъ. Фестивалты хайадисджытӕ хорзӕхджын ӕрцыдысты дипломтӕй. Театры ӕрвыл сезоны рохуаты нӕ баззайынц чысыл театрдзаутӕ-сабитӕ дӕр. Репертуары бынат вӕййы аргъӕуттӕн. Уыимӕ ма сӕ февдисынц сабиты рӕвдауӕндӕтты дӕр.

Театры куыст ног сезоны рай-дианы размӕ Аивадон советӕн вӕййы рабадт. Уым скъуыддзаг ӕрцӕуы театры репертуармӕ ивгъуыд куыстытӕй бахӕссинаг цы вӕййы, афтӕ ма ног спектакльтӕ сывӕрын дӕр. Паддзахадон драмон театры 2022-2023 азты 91 ног театралон сезоны та театруарзджытӕ сценӕйыл фендзысты ахӕм спектаклтӕ:

Саулохты М. комеди «Усгур Гаци» – реж. Дзуццаты Т.А.Чехов «Денджызы Уари» – реж. А.Чумаченко. С. Стратиев «Автобус» –  реж. Цӕриаты В. Токаты А. комеди «Усгуртӕ» – реж. Джелыты Хъ. Остъаты А. комеди «Хӕлиудоны хӕлиу хабӕрттӕ»  – реж. Дзуццаты Т. Н.Гоголь «Ревизор» – реж. Р.Габриа.

Чысыл театрдзаутӕн-сабитӕн та ӕвдыст ӕрцӕудзӕн Остъаты А. аргъау – мюзикл «Ӕфсымӕртӕ» – реж. Дзуццаты Т.

ОСТЪАТЫ Алан