Кӕсыс ацы ӕрыгон авторты куыстытӕм ӕмӕ бахаудтӕ сӕ уацары, адӕймаджы цӕстытӕ сӕ атонын нӕ комынц, уымӕн ӕмӕ сӕ иуӕй иннӕ у мидисджындӕр, аив ӕмӕ хӕдхуыздӕр. Уыдоныл цæст хæсгæйæ, адӕймаг дисы дӕр бахауы, нӕ чысыл хуртӕ сӕ зӕрдӕмӕ арф кӕй айстой хуызфыссынад ӕмӕ сӕ фыццаг къахдзӕфтӕ кӕй кӕнынц уӕндонӕй. Ӕцӕгдӕр, сӕ афӕлгӕст царды алы фӕзындмӕ дӕр ныридӕгӕн у уӕрӕх ӕмӕ уымӕ гӕсгӕ сӕ куыстытӕ вӕййынц алыгъуызон, бавӕрынц дзы сӕ зӕрдӕйы хъарм ӕмӕ къухты арӕхстдзинад. Раст у, курдиат раргом кӕнын ӕмӕ райхалынӕн райдианы хъӕуы йе ‘нцой балӕууын. Иугӕр куы банкъарынц хистӕр фӕлтӕр нывгӕнджыты комулӕфт, уы сӕ фӕхайджын кӕнынц сӕ арӕхстдзинад ӕмӕ сӕ аивады тыхӕй, уӕд кӕстӕртӕ ноджы фӕныфсджындӕр вӕййынц ӕмӕ тынгдӕр аныгъуылынц сфӕлдыстадон гуылфӕнты.
Раст афтӕ у сӕ куыст ӕмӕ архайд Цхинвалы районы Къостайыхъӕуы нывгӕнӕн скъола-студийы ӕппӕт коллективӕн. Ацы хъуыддаджы се ‘нцой лӕууынц ӕмӕ кӕстӕр фӕлтӕрӕн цӕстуарзонӕй сӕ зонындзинӕдтӕ ӕмӕ бирӕазон фӕлтӕрддзинад амонынц скъола-студийы директор ӕмӕ ахуыргӕнӕг, Республикӕ Хуссар Ирыстоны адӕмон нывгӕнӕг Гӕбӕраты Барис, нӕ республикӕйы сгуыхт нывгӕнӕг Хуыбиаты Роберт ӕмӕ ӕрыгон нывгӕнӕг Зӕгъойты Игнат. Студийы ахуыр кӕнынмӕ тынг цымыдис кӕнынц ахуырдзаутӕ ӕмӕ уымӕ гӕсгӕ азӕй-азмӕ сӕ нымӕц дӕр кӕны фылдӕр, абоны онг уал сты 20. Ис дзы кӕстӕр ӕмӕ хистӕр къордтӕ ӕмӕ сын ахуыртӕ вӕййы алы бон дӕр бӕрӕгбӕлвырд темӕйӕ. Ахуыргӕнджытӕ алы скъоладзаумӕ дӕр сӕ хъус дарынц лӕмбынӕг, ахуыр сын кӕнынц се ‘взыгъддзинӕдтӕ ӕмӕ сын уымӕ гӕсгӕ фӕуадзынц уроктӕ ӕнцондӕрӕй вазыгджынмӕ. Сывӕллӕттӕн сӕ хъомылгӕнджытӕ цы куыстытӕ бахӕс кӕнынц, уыдоныл бакусынц зӕрдӕбынӕй, хъуыдыгӕнгӕ ӕмӕ сӕ уый фӕстиуӕгӕн рантысы зӕрдӕмӕдзӕугӕ конд нывтӕ. Скъола-студийы ахуыр кӕнынц ӕмӕ сомбон ныфсбавӕрӕн кӕмӕй ис, уыдон нымӕцмӕ хауынц Джиоты Дианӕ, Джергаты Альбинӕ, Тараты Иренӕ, Хуыбиаты Аннӕ, Бӕззаты Сӕрмӕт, Тыджыты Аланӕ, Хуыбиаты Ми-ленӕ, Джиоты Миланӕ ӕмӕ ӕндӕртӕ.
Скъола-студийы ӕнтыстыл банымайын хъӕуы, ӕрвылаз дӕр хайад кӕй райсынц Сочимӕ хӕстӕг, Лазаревскы горӕты уагъдцӕуӕг пленэр-конкурсы. Уырдӕм ацӕуынц сӕрды мӕйы, баззайынц дзы цалдӕр боны. Уым ӕрдзы хъӕбысы сӕхи аирхӕфсыны фӕстӕ ӕрӕвналынц сӕ сӕйраг хӕс ӕххӕст кӕнынмӕ, ома Лазаревскы алы ӕвзонг нывгӕнӕг дӕр хъуамӕ сӕххӕст кӕна дыууӕ куысты. Уыдонӕй иу вӕййы, йӕхи зӕрдӕмӕ цы цӕуы, уый сныв кӕнын ӕмӕ иннӕ та вӕййы бахӕсмӕ гӕсгӕ. Кӕй зӕгъын ӕй хъӕуы, сӕ разы ӕнцон хӕстӕ нӕ вӕййы, фӕлӕ ӕвзыгъд ӕмӕ курдиатджын фӕлтӕр ӕрӕвналынц сӕ бӕрнон хъуыддаг бӕс-тонӕй ахицӕн кӕнынмӕ ӕмӕ сын вӕййы зӕрдӕрухсгӕнӕн фӕстиуджытӕ. Уырдӕм сӕ тыхтӕ фӕлварынмӕ ӕрцӕуынц Уӕрӕсейы горӕттӕ Томск, Тулӕ ӕмӕ ӕндӕр регионтӕй, афтӕ ма Цӕгат Кавказы республикӕтӕй тынг бирӕ æрыгон нывгæнджытæ. Конкурсы активон хайад кӕй райсынц ацы скъола-студийы хъомылгæнинæгтæ, уый тыххӕй сӕ иутӕн саккаг кӕнынц фыццаг бынӕттӕ, свӕййынц призертӕ ӕмӕ хорзӕхджын ӕрцӕуынц майдантӕ ӕмӕ дипломтӕй. Уымӕй дарддӕр ма амӕйразмӕ хайад райстой ӕмӕ призон бынӕттӕ бацахстой, Уӕрӕсейы цы сфӕлдыстадон конкурс уагъд цыд, уым дӕр. Студийы хайадисджытӕ се сфӕлдыстадимӕ алы аз дӕр базонгӕ кӕнынц куыд Цхинвалы районы ӕмбӕстӕгты, афтӕ ма сын равдыстытӕ уыд Знауыры, Мугуты заставӕйы, Дзауы, Дменисы ӕмӕ ӕндӕр бынӕтты. Ныр та фӕнд кӕнынц Ленингормӕ сӕ куыстыты равдыст ахӕссын ӕмӕ уыдонимӕ бынӕттон фӕллойгӕнджыты базонгӕ кӕнын.
Къостайыхъӕуы скъола-студи кӕстӕртӕн йӕ дуӕрттӕ бакодта 2014 азы. Ацы хъуыддагыл зӕрдиагӕй бацархайдтой Ахуырады ми-нистрад, районы адӕмон ахуырады хайад ӕмӕ скъолайы педагогон коллектив ӕмӕ ныр фондз азы ӕнтысгӕйӕ размӕ цӕуы, ис сын зӕрдӕрухсгӕнӕн фӕстиуджытӕ. Фӕлӕ уыцы ӕнтыстыл не ‘рлӕудзысты, дарддӕр дӕр сӕ ӕрвылбонон фӕллойӕ аккаг хуынтӕ кӕй бахӕсдзысты нывкӕнынады аивадмӕ, сомбонӕн аккаг фӕлтӕр кӕй хъомыл кӕндзысты, ууыл ис зӕрдӕдарӕн.
Хуыбиаты Никъала
Comments are closed, but trackbacks and pingbacks are open.