Нæ республикæйы цæрджытæ æрмæст хъæуты нæ, фæлæ ма горæты дæр бирæ азты дæргъы тыхсынц æнæфыййау фосæй – стуртæ фæрахау-бахау кæнынц уынгты æмæ фæндаггæрæтты. Уый фæстиуæгæн арæх æрцæуы фæндагон-транспортон цаутæ, стæй ма фос разиан кæнынц адæ-мы цæхæрадæттæн дæр – батонынц æмбондтæ æмæ сын скуынæг кæнынц сæ фæллой. Кæд æмæ бирæтæ тæрхондонмæ бахъаст кæнынц æмæ аххосджынтæ ивар æрцæуынц, уæддæр фосы хицæуттæ нæ сæттынц. Æвæццæгæн сын ивар бафидын аслам-дæр лæууы фыййау баххуырсынæй.
Милицийы фадыгон инспектортæ арæх фæзилынц фосы хицæуттыл æмæ фермерон хæдза-рæдтыл. Бафæдзæхсынц сæ, цæмæй сæ фос дзæгъæл ма уадзой, æмæ ма сын сæ къухтæ дæр æрфыссын кæнынц, «нæ фехъуыстон мауал зæгъут».
Цхинвалы районы фадыгон инспектор Цхуырбаты Ибрагим куыд зæгъы, афтæмæй дзæгъæл фос зиан хæссынц хицæн æмбæстæгтæн æмæ паддзахадон фæллойæн дæр.
«Бынæттон цæрджытæ нæм арæх бахъаст кæнынц, дзæгъæл фос сын сæ æмбондтæ куы ныппырх кæнынц, сæ тыллæг сын куы фесафынц, сæ уыгæрдæнтæ сын куы ныссæндынц, уæд. Мах æртымбыл кæнæм административон æрмæджытæ æмæ сæ арвитæм тæрхондонмæ – æндæр нын закъоны фæлгæтты ницы саразæн ис. Рæстæгæй-рæстæгмæ азилæм, фос чи дары, уыдоныл, æмæ сæ бафæдзæхсæм, цæмæй фыййау дарой. Фæлæ хъыгагæн, уавæр нæ хуыздæр кæны», – зæгъы фадыгон инспек-тор.
Дзæгъæл фосы арæх фенæн ис Цхинвалы уынгты дæр æмæ сæ фæстæ ссæстæй ныууадзынц цъæх нæутæ, бахсынынц дидинæгдæттæ æмæ талатæ. Хатгай ма фæндæгтыл машинæтæн æдæрсгæ аскъæрæн дæр нал вæййы.
ДЖИОТЫ Алыксандр
Comments are closed, but trackbacks and pingbacks are open.