Ацы бонты нæ адæм банысан кодтой нæ Хæдбардзинады бон расидыны бæрæгбон.
Бæрæгбон. Цы ма ис уыцы дзырдæй адджындæр зæрдæйæн. Бирæ бæрæгбонтæ банысан кæнынц нæ адæм æмæ нын уыдонæй иууыл зынаргъдæртæй сæ иу у. Раст у, нæ алы бæрæгбонты дæр райзæрдæ вæййæм, фæлæ се ‘хсæн уæддæр вæййы хицæндзинæдтæ. Ацы бæрæгбон иумæйаг у нæ республикæйы цæрджытæн, алкæмæн дæр æмхуызон зынаргъ у. Уымæн æмæ уыцы бон 2008 азы 26 августы æнæаххос туг æмæ цæстысыгæй удæст зæхмæ ныккастысты сæрибар хуры рухс тынтæ. Ирон адæмы хуыздæр цардхъуаг хъæбултæ сæ цард цы сæрибардзинады тыххæй радтой, уый æппынфæстаг нæ къухты бафтыд.
Ацы зынгæ цау æрмæст Хуссар Ирыстоны цард нæ фæивта, фæлæ ма фæивта, куыд федтам, афтæмæй Кавказы æмæ æппæт Европæйы геополитикон равæрд дæр. Фæлæ йæм, куыд дæргъвæтин, тугхъулон фæндагыл фæцыдыстæм, 1920 азау 2008 азы августы хæст дæр никуы ферох уыдзæнис нæ адæмæй. Уæд гуырдзиаг лæгмартæ æмæ се ‘ххуырст адæм хъазуатонæй æххæст кодтой сæ хæслæвæрд. Дæрæн кодтой, сыгътой, мардтой цас сæ бон уыд, уыййас, æмæ цин кодтой, цас сын æнтыст, ууыл. Æхсызгон хъыдзы кодта Саакашвилийы зæрдæ фырцинæй, йæ цъаммар фæндтæ æххæст кодтой. Йе ‘мцæдисонтæ йын хъусын кодтой, æнæауæрдонæй кæй марынц, уыдон сæ сыджытыл сæмбæлын дæр кæй нæ уадзынц, кæй сæ ныгæнынц кæртыты, цæхæрадæтты. Хъусын ын кодтой, ныккæндты цы сабитæ, сылгоймæгтæ æмæ зæрæдтæ бааууон кодтой сæхи, уыдоны дæр уым кæй марынц, æнæхъæн горæт сыгъд æмæ пырх кæй æрцыд. Уæд алчи нæ зыдта, телефонтæм гæсгæ кæй бæрæг кодтой, чи кæм æмбæхст, уыцы бынат. Махæй алчи дæр дзырдта йæхионмæ. Базыдтой-иу нæ цъаммæрттæ. Нæ ныл бацауæрстой, æвæццæгæн сæм цинау каст утæппæт æдых сылгоймæгты, сабиты тугæвдылдæй, уонгæскъуыдтæй фенын. Комкоммæ нæ фехстой, 30 адæймагæй фылдæрæй кæм бадтыстæм, уырдæм, Коцойты Арсены уынджы 43-æм фондзуæладзыгон хæдзары ныккæндмæ. Фæлæ уыцы цæфтæ хæдзары фидар къултæ баурæдтой æмæ сирвæзтыстæм пырхæнты ‘хсæнæй. Нæ сын бантыст сæ фæндтæ кæронмæ сæххæст кæнын. Уæрæсейы æххуысæй сырд дæрæн æрцыдысты гуырдзыйы æфсад. Нæ зæхх, йæ адæм сæрибарæй сулæфыдысты. Йæ хæдфæстæ та нымад æрцыд нæ хæдбардзинад… Стыр цины бæрæгбон у ацы бон махæн, фæлæ ма нын уый æрымысын кæны, æнæхъæн бинонтæй чи фæцагъды сты, зæронд, æдых адæмæй, нæ царбæллон фæсивæдæй сæ фæндтæ æрдæгыл кæмæн фескъуыдысты, уыдоны иууылдæр. О, æрымысæм сæ ацы стыр цинæй йемыдзаг æмæ тугæвдылд бæрæгбоны. Бæргæ… фæлæ æндæр гæнæн нæ уыд. Ахæм у ацы хъæлдзæг бæрæгбон. Цины æмæ цæссыгæвдылд бæрæгбон.
Уый уыд гуырдзиаг “демократи”-йы фæстиуæг. Фæлæ рæстдзинад фæуæлахиз вæййы кæддæриддæр. Саакашвили æмæ йе ‘мхъузæттæ нæ бахынцыдтой, мах Стыр Уæрæсейы æмбæстæгтæ кæй стæм æмæ нæ рæстæй æфхæрын кæй нæ бауадздзæн, йæ дæлбазыр нæ кæй бакæндзæн… Абон дæр ма нæ хъусты зæлынц Владимир Путины ныхæстæ: “Зын у ууыл ахъуыды кæнын дæр æмæ Хуссар Ирыстоны цы æрцыд, уый фæстæ Гуырдзыстоны скондмæ бацæуын домын. Мах æмбарæм, Хуссар Ирыстоны адæм цы уавæры бахаудтой – фесæфтой сæ хæдзæрттæ, сæ исад. Мах уыцы адæмы сæ тыхсты иунæгæй нæ ныууадздзыстæм”. Разындысты сæ дзырды хицау. Æмæ æппынфæстаг сæххæст нæ адæмы стыр бæллиц. 25-æм августы Уæрæсейы Паддзахадон Думæ фæндон рахаста æмæ æмхъæлæсæй загътой депутаттæ Хуссар Ирыстонæн Гуырдзыстонимæ цæрæн нал ис, цы сырдон митæ бакодтой, уый фæстæ. Уыцы уынаффæ æрвыст æрцыд, абон махæн, табуйаг чи ссис, уыцы президент Медведевмæ. Æмæ æрцыд, цæмæ æнхъæлмæ кастыстæм цæргæ цæрæнбонты, уыцы стыр цау. 26 августы нымад æрцыд Хуссар Ирыстоны хæдбардзинад. О, фæлæ нын куыд зынаргъ слæууыд, уыцы хæдбардзинад. Уадз фехъуысæд, уыцы бæстæм, ацы циндзинады тыххæй чи фæмард æмæ йæ цард чи радта, уыдонмæ. Кæд дзы уыдонæн рацæрын нал бантыст, уæддæр Хæдбар Ирыстоны зæххыл амондджынæй цæрæнт сæ кæстæртæ.
БЕСТАУТЫ Валя
