Ацы аз Уæрæсейы уæлдæр ахуыргæнæндæттæм мидхъуыддæгты министрады хаххыл цы курсанттæ цæуынц, уыдонæн Кады Аллеяйы уагъд æрцыд цытджын церемони – Ард бахордтой, сæ Райгуырæн бæстæйыл иузæрдион кæй уыдзысты, уый тыххæй. Цытджын мадзалы хайад райстой Мидхъуыддæгты министрады къухдариуæгад криминалон милицийы къухдариуæггæнæг Мамиты Эриславы сæргълæудæй, ведомствойы ветерантæ, курсантты ныййарджытæ, хиуæттæ æмæ æмбæлттæ.
Мидхъуыддæгты министрады профессионалон цæттæгæнæн центры ахуыргæнæн курсытæ æнтыстджынæй каст чи фæцис æмæ уый фæстиуæгæн кæй бауагътой Ард бахæрыны цытджын мадзалмæ, уыдон æдæппæт уыдысты 15 адæймаджы. Райдианы сын уыд рæнхъон ралæуд æмæ сын Мамиты Эрислав раарфæ кодта, ахæм бæрнон къахдзæф саразынмæ сæ ныфс кæй бахастой, уый тыххæй. Министры фыццаг хæдивæг сæ бафæдзæхста, цæмæй, Уæрæсейы уæвгæйæ, ма рох кæной сæ райгуырæн бæстæ, хорз ахуыр кæной æмæ тырной аккаг специалисттæ суæвынмæ. Ӕрæмбырдуæвджытæ иу уысм æдзæмæй алæугæйæ ссардтой, йæ службæйон хæстæ æххæст кæныны рæстæджы чи фæмардис, уыцы милицийы кусджыты рухс нæмттæ.
Курсанттæн ма арфæйы ныхæстæ загътой сæ ныййарджытæ æмæ милицийы ветерантæ дæр. Милицийы раздæры булкъон Букъуылты Юрий йæ арфæйы ныхæсты банысан кодта, зæгъгæ ныры курсанттæй стыр ныфс æвæры, æвзыгъд кæй уыдзысты ахуырмæ дæр æмæ куыстмæ дæр, аккаг гой-мæгтæ сæ кæй рацæудзæнис сæ райгуырæн бæстæйæн æмæ милицийы ветерантæй къаддæр кæй нæ уыдзысты сæ службæйон архайды. Уæрæсейы хуыздæр уæлдæр ахуыргæнæндæтты сахуыр кæныны фадат сын кæй радтой, уый фæдыл курсанттæ дæр сæхирдыгæй раарфæ кодтой бæстæйы къухдариуæгадæн, Мидхъуыддæгты министрады сæргълæуджытæн æмæ сæ Ард бахæрыны церемонимæ чи бацæттæ кодта, æппæт уыдонæн.
Ард бахæрыны церемонийы фæстæ та курсанттæн цытджын уавæры радтой мидхъуыддæгты органты кусджыты службæйон æвдисæндартæ. Зæрдиаг арфæйы ныхæстимæ сын сæ лæвæрд-та милицийы раздæры инæлар-майор Уалыты Муртаз.
Кæронбæттæны æрæмбырдуæвджытæ систой зæрдылдарæн къамтæ.
ДЖИОТЫ Алыксандр
