Мидхъуыддæгты министрад хъусын кæны

4-æм мартæй 11-ӕм мартмӕ Хуссар Ирыстоны территорийыл æрцыдис иу фыдракæнд. Наркотикон буарадтӕй ӕнӕзакъонӕй пайда кӕныны тыххӕй урӕд ӕрцыдысты цалдӕр ӕмбӕстаджы. Уымӕй уӕлдай ма республикӕйы фӕндӕгтыл ӕрцыд 3 фæндагон-транспортон цауы. Иу аварийы фæмард 37-аздзыд сылгоймаг.

Планон рейдон мадзӕлттӕ уадзыны рӕстӕджы Фӕндагон змӕлды ӕдасдзинады инспекци къуырийы дӕргъы рабæрæг кодта 263 фӕткхалӕн цауы. Уыдонӕй 11 уыдысты нозтджынӕй машинӕ скъӕрыны цаутӕ.

Алыгъуызон бархалынæдты фӕдыл бӕрндзинадмӕ конд ӕрцыдысты 14 адӕй-маджы.

Ленингоры районы мидхъуыддæгты управленийы фæдагуырды хайады кусджытæ баурæдтой Ленингоры поселочы 34-аздзыд æмæ 30-аздзыд цæрæджы, кæцытæ æнæзакъонæй спайда кодтой наркотикон буарад «марихуана»-йæ. Сæ хъуыддаг сын дарддæр æвзардзæн тæрхондон.

Горæт Цхинвалы мидхъуыддæгты управленийы фæдагуырды хайады кусджытæ баурæдтой 31-аздзыд æмæ 30-аздзыд Цхинвалы цæрджыты, кæцытæ æнæзакъонæй спайда кодтой наркотикон буарад «марихуана»-йæ. Уыдонæн дæр сæ хъуыддаг æвзардзæн тæрхондон.

Дзауы районы Едысы хъæуы ссыгъд 77-аздзыд бынæттон цæрæджы хисæрмагонд хæдзар. Арт ахызт сыхаг хæдзармæ дæр, кæцыйы хицау цæры горæт Дзæуджыхъæуы. Зынгсирвæзты фæстиуæгæн дыууæ хæдзары дæр басыгъдысты.

Цхинвалы районы Залдайы хъæуы ссыгъд хисæрмагонд хæдзар, кæцыйы хицау у 75-аздзыд Залдайы хъæуггаг, фæлæ ам нæ цардис. Рæстæгмæ дзы цардис 86-аздзыд сылгоймаг. Хæдзармæ фæндаг кæй нæй, уый аххосæй зынгхуыссынгæнæн машинæйæн йæ бон нæ бацис йæ ахуыссын кæнын æмæ хæдзар  басыгъд.

Дзау – Цхинвалы фæндаджы 3-æм километры æрцыдис фæндагон-транспортон цау. Дзауы районы Мсхлебы хъæуы 37-аздзыд цæрæг сылгоймаг нæ сарæхстис йæ автомашинæ «Chevrolet Lacetti» скъæрын æмæ фæсвæд афæлдæхт. Аварийы фæстиуæгæн шофыр фæмард.

4-æм марты горæт Цхинвалы Октябры уынгæй Советон уынгмæ азилæны æрцыд фæндагон-транспортон цау. Нæ горæты 37-аздзыд цæрæг нæ сарæхст йæ автомашинæ «Mersedes» скъæрын, фехæлдта фæндагон фæткойтæ æмæ сæмбæлд æндæр автомашинæ «BMW»-йыл, кæцыйы шофыр разынд Цхинвалы районы Цъунары хъæуы 21-аздзыд цæрæг. «BMW»-йы шофырмæ нæ разынд бары гæххæттытæ.

9-æм марты горæт Цхинвалы Ленины уынгæй Советон уынгмæ азилæны æрцыд фæндагон-транспортон цау. Цхинвалы 23-аздзыд цæрæг нæ сарæхст йæ автомашинæ «BMW» скъæрын, фехæлдта фæндагон змæлды фæткойтæ æмæ сæмбæлд фæндагон нысаны цæджындзыл. Шофыр разынд нозтджын.