Мидхъуыддæгты министрад хъусын кæны

1-æм июнæй 8-æм июнмæ Хуссар Ирыстоны территорийыл  æрцыдис иу фыдракæнд, фæлæ нырма нæ раргом ис. Наркотикон буарадтæй æнæзакъонæй спайда кæныны тыххæй урæд æрцыдысты цалдæр æмбæстаджы. Уымæй уæлдай ма республикæйы фæндæгтыл æрцыдис æртæ фæндагон-транспортон цауы. Авариты фæстиуæгæн рынчындонмæ алыгъуызон цæфтимæ бахаудтой æртæ адæймаджы.

Фæндагон змæлды æдасдзинады инспекци къуырийы дæргъы сбæлвырд кодта 188 фæткхалæн цауы. Уыдонæй 8 уыдысты нозтджынæй машинæ скъæрыны цаутæ.

Æхсæнадон фæтк фехалыны фæстиуæгæн бæрндзинадмæ конд æрцыдысты 2 адæймаджы.

5-æм июны горæт Цхинвалы æхсæвы 11 сахатмæ æввахс фыдгæнджытæ дуртæй ныппырх кодтой РХИ-йы Юстицийы министры фатеры рудзгуытæ. Республикæйы барадхъахъхъæнæг органтæ уадзынц оперативон-агурæн мадзæлттæ, цæмæй рабæрæг кæной æмæ бæрндзинадмæ æркæной фыдгæнджыты.   

6-æм июны Знауыры районы Бехъмары хъæуы æрцыдис æнамонд цау – фæмард 29-аздзыд бынæттон цæрæг. Ацы æмбæстаг йæ 28-аздзыд æфсымæр æмæ йæ 26-аздзыд сиахсимæ, кæцы цæры горæт Цхинвалы, цæугæдоны ахстой кæсаг æмæ сæ ток ныццавта. Фыдбылыз æрцæуыны фæстиуæгæн æрыгон лæппу бынаты фæмард.

Цхинвалы районы милицийы управленийы фæдагуырды кусджытæ баурæдтой Присы хъæуы 41-аздзыд цæрæджы, кæцымæ сæ зæрдæ фехсайдта наркотикон буарад «морфин»-æй æнæзакъонæй спайда кæнынмæ. Фæткхалæджы горæт Цхинвалы тæрхондон фæивар кодта 10 мин сомы.

2-æм июны милицийы наркотикты æрзылдыл контроль кæныны æмæ горæт Цхинвалы милицийы управленийы фæдагуырды кусджытæ оперативон информацийы фæдыл басгæрстой горæттаг 62-аздзыды хисæрмагонд хæдзар æмæ дзы ссардтой дыууæ гæны къутæры. Фæткхалæджы горæт Цхинвалы тæрхондон фæивар кодта 2500 сомы.

Горæт Цхинвалы милицийы управленийы фæдагуырды кусджытæ баурæдтой горæттаг 23-аздзыд цæрæджы, кæцымæ сæ зæрдæ фехсайдта наркотикон буарадæй спайда кæнынмæ. Фæткхалæг нæ бакуымдта медицинон басгæрстмæ æмæ йæ горæт Цхинвалы тæрхондон фæивар кодта 8 мин сомы.

Горæт Цхинвалы рынчындонмæ бахаудта 14-аздзыд бынæттон цæрæг. Æнæххæст кары сывæллон фæхъæстæ угарон газæй æмæ йын дохтыртæ бакодтой фыццаг медицинон æххуыс.

Цхинвалы районы Сатихъары хъæуы 53-аздзыд цæрæг нæ сарæхст йæ автомашинæ «ВАЗ-2107» скъæрын æмæ Цхинвал-Дменисы фæндаджы 6-æм километры фæсвæд афæлдæхт. Аварийы фæстиуæгæн шофыр æмæ йæ бæлццон, Сатихъары хъæуы 35-аздзыд цæрæг алыгъуызон цæфтимæ бахаудтой рынчындонмæ.

Знауыры районы Зæдбадæны хъæуы æрцыд фæндагон-транспортон цау. Цхинвалы районы Гуджабары хъæуы 36-аздзыд цæрæг нæ сарæхст йæ автомашинæ «ВАЗ-2107» скъæрын, фехæлдта фæндагон фæткойтæ æмæ сæмбæлд хиды бетонæй арæзт парапетыл. Аварийы фæстиуæгæн шофыр уæззау цæфтимæ бахаудта рынчындонмæ.

Горæт Цхинвалы 32-аздзыд цæрæг нæ сарæхст йæ автомашинæ «LEXUS – 460» скъæрын, фехæлдта фæндагон фæткойтæ æмæ Знауыры районы Убиаты хъæуы сæмбæлд бетонæй арæзт цæджындзыл.