Мидхъуыддæгты министрад хъусын кæны

5-æм сентябрæй 12-æм октябрмæ Хуссар Ирыстоны территорийыл æрцыд дыууæ фыдракæнды æмæ дзы иу раргом ис. Республикӕйы фӕндӕгтыл ӕрцыд дыууæ фæндагон-транспортон цауы. Авариты фæстиуæгæн рынчындонмæ уӕлӕнгай цӕфтимӕ бахаудтой дыууæ адæймаджы.

Фæндагон змæлды æдасдзинады инспекци къуырийы дæргъы сбæлвырд кодта 221 фæткхалæн цауы. Уыдонæй 5 уыдысты нозтджынæй машинæ скъæрыны цаутæ.

Ӕхсæнадон фæтк фехалыны фæстиуæгæн административон æфхæрд баййæфта иу адæймаг.

6-æм октябры Цхинвалы районы Ортъеуы хъæуы басыгъд горæт Цхинвалы 41-аздзыд цæрæджы хисæрмагонд хæдзар. Зынгхуыссынгæнæн службæйы кусджытæ æрæгмæ фехъуыстой хабар æмæ сын нал бантыст йæ ахуыссын кæнын.

9-æм октябры горæт Цхинвалы милицийы хайадмæ горæттаг 44-аздзыд цæрæг балæвæрдта хъаст, зæгъгæ, мын Цхинвалы районы Хеиты хъæуæй æфсæйнаг контейнерæй адавдæуыд 8 видеофыссæн камерæйы, 2 электрикон моторы, компьютеры монитор, 50 иуæджы алыгъуызон фильтртæ, 25 иуæджы бæрзонд æлхъывдады шлангтæ æмæ ма æндæр техникон гæрзтæ. Къæрныхтæ æдæппæт разиан кодтой 200 мин сомы бæрц.

11 октябры æхсæвы Цхинвалы рынчындонмæ кардæй цæфтимæ бахаудта республикæ Азербайджаны 52-аздзыд æмбæстаг. Оперативон-агурæн мадзæлттæ ауадзыны фæстиуæгæн рабæрæг, фыдракæнд кæй сарæзта республикæ Азербайджаны æндæр æмбæстаг.

Ленингоры районы Кенканы хъæуы 56-аздзыд цæрæджы æрцахстой Ленингоры районы арæнхъахъхъæнджытæ. Фæткхалæг æрвыст æрцыд карантинмæ Ленингоры рынчындонмæ 14 боны æмгъуыдмæ.

Джиоты Аланы проспектæй Советонты уынгмæ азилæны 38-аздзыд горæттаг цæрæг нæ сарæхст йæ автомашинæ «Lexus» скъæрынмæ, фехæлдта фæндагон фæткойтæ æмæ сæмбæлд æндæр автомашинæ «ВАЗ-2107»-ыл, кæцыйы шофыр та разынд нæ горæты 46-аздзыд цæрæг.

Цхинвал-Дзауы фæндаджы 1-æм километры æрцыд фæндагон-транспортон цау. Цхинвалы районы Дампъалеты хъæуы 17-аздзыд цæрæг горæтмæ цæугæйæ нæ сарæхст йæ автомашинæ «Лада Нива» скъæрынмæ æмæ ныццавта стур. Аварийы фæстиуæгæн шофыр æмæ йæ бæлццон, 44-аздзыд Цхинвалы районы Дампъалеты хъæуы цæрæг, алыгъуызон цæфтимæ бахаудтой рынчындонмæ.