Ацы бонты филологон зонæдты кандидат, профессор Битарты Зойæ æмæ филологон зонæдты кандидат, ХИПУ-йы ахуыргæнæг Биазырты Аллæ 6-æм астæуккаг скъолайы 9, 10 æмæ 11-æм кълæсты ахуыргæнинæгтæн бакастысты лекцитæ мадæлон æвзаджы рæзты фарстаты тыххæй. Семæ ма уыд ХИПУ-йы ахуыргæнæг Плиты Серго дæр.
Йæ мадæлон æвзаджы проблемæтыл æппæт зæрдæйæ чи тыхсы, уыдонæй иу у Хуссар Ирыстоны паддзахадон университеты ахуыргæнæг, зонад-иртасæн институты зонадон кусæг, бирæнымæц зонадон куыстыты автор Битарты Зойæ. Уый йæ цард нывонд кæны мадæлон æвзагæн лæггад кæныны хъуыддагæн. Битарты чызг ахуыргæнинæгты раз ныхас кæнгæйæ, банысан кодта, зæгъгæ, мадæлон æвзагыл æнæмæнгæй дæр хъæуы дзурын. Уыимæ ма хъуамæ пайда кæнæм æндæр æвзæгтæй æрбайсгæ дзырдтæй, хъусдарын хъæуы ныхасы культурæмæ. Профессор йемæ æрбахаста Гæбæраты Никъалайы чиныг – «Афтæ цæмæн дзурæм», зæгъгæ, æмæ йын йæ мидисимæ базонгæ кодта скъоладзауты. Бирæ цæвиттонтæ дзы æрхаста. «Бирæтæ се ‘рвылбонон царды пайда кæнынц ахæм ныхæстæй, зæгъгæ, «байдыдта, «райдыдта», «вæййын байдыдта» «райдайын байдайы» æмæ афтæмæй бирæ хатт æртæ мивдисæджы дæр зæгъынц кæрæдзийы фæдыл. Уыдон иууылдæр сты, ныхасы культурæ, æвзаджы цы дзырдтæ чъизи кæнынц, ахæмтæ æмæ нæ хъæуы кусын æвзаджы сыгъдæгдзинадыл», – загъта Битарты Зойæ.
Цымыдисон уыд йæ лекци Биазырты Аллæйæн дæр. Уый дæр æрсидт скъоладзаутæм, цæмæй ахуыр кæной, уарзой æмæ кад кæной сæ мадæлон ирон æвзагæн. Лæмбынæг æрдзырдта Хетæгкаты Къостайы æнæмæлгæ сфæлдыстадыл. Ныридæгæн ма ахæм лекцитæ ахуыргæндтæ бакастысты нæ горæты ахуырадон уагдæттæй цалдæры æмæ дарддæр сæ лекцитæм байхъусыны фадат уыдзæн республикæйы районты скъоладзаутæн дæр.
Уазджытæ семæ æрбахастой чингуытæ æмæ сæ балæвар кодтой скъолайæн.
Ахуырдзаутæ лекцитæм хъуыстой стыр цымыдисæй. Скъолайы директор Гæззаты Юринæ бузныг загъта ХИПУ-йы минæвæрттæн, ахæм хъæуæг лекцитæ кæй бакастысты, уый тыххæй.
Нæ уацх.
